ސައުދީ އެމްބަސީއިން ނޫސްވެރިންނަށް ފައިސާ ބަހައިފި

ދިވެހިރާއްޖޭގައި ހުންނަ ސައުދީ އަރަބިއްޔާގެ އެމްބަސީގައި އާދީއްތަ ދުވަހު އޮތް އިވެންޓެއް ކަވަރު ކުރަން ދިއަ ނޫސްވެރިންނަށް ފައިސާ ދީފިއެވެ.

ތިން މަސް ތެރޭގައި ގުރުއާން ހިތުދަސްކުރި އޯޓިޒަމް ހުންނަ ކުއްޖެއްކަމަށްވާ އަލްހާފިޒް އަހުމަދު ނަބީހުއަށް ހިތްވަރު ދިނުމުގެ ގޮތުން އޭނާއާ ސައުދީ އެމްބަސީން ބައްދަލުކުރުމަށް ބޭއްވި އިވެންޓް ކަވަރު ކުރި ނޫސްވެރިންނަށް ސިޓީއުރައެއް ދީފައިވަނީ އިވެންޓް ނިމުމުން ނޫސްވެރިން ވަކިން ހާޒިރުކުރުމަށްފަހުގައެވެ.

ނޫސްވެރިންނަށް ދިނީ ކޮން އެއްޗެއްކަން ނޫސްވެރިންނަށް އެނގިފައިވަނީ އެމްބަސީއިން ނުކުތުމަށްފަހު ސިޓީއުރަ ބަލާލުމުންނެވެ.

ކޮންެމެ ނޫސްވެރިޔަކަށް ދިން ސިޓީ އުރައިގައިވަނީ 500 ރުފިޔާއެވެ.

ނޫސްވެރިންގެ އަޚްލާގީ މިންގަޑުތައް ކަނޑައަޅާ އުސޫލެއް ބަޔާންކޮށް ހަދިޔާގެ ގޮތުގައި ހިފޭނެ މިންވަރެއް ރާއްޖޭގައި ކަނޑައަޅާފައެއް ނުވެއެވެ.

ދިވެހި ރާއްޖޭގައި ބާއްވާ އެކި އިވެންޓްތަކާއި ނޫސްވެރިންގެ ބައްދަލުވުންތައް ފަދަ ކަންކަން ނިންމުމަށްފަހު ސައިފޮދެއް ނުވަތަ ކެއުމެއް އޮތް ނަމަވެސް ފައިސާ ދިނުމަކީ މިހާތަނަށް އޮތް ސަގާފަތެއް ނޫނެވެ.