ރާއްޖެޓީވީ ނޫސްވެރިންގެ މައްސަލައިގައި އަދުލް އިންސާފުގެ ހުރިހާ ދޮރެއްގައި ޓަކި ޖަހާނަން: ހަސީން
ފުލުހުންނަކީ މައުސޫމް ބައެއް ކަމަށް ބެލެން ނެތް
ރާއްޖެޓީވީގެ ނޫސްވެރިޔާ ލީވާން އަލީ ނާސިރު ކޯޓް ނުކުތުމުން، އޭނާގެ ގައިގައި ރާއްޖެޓީވީގެ މުހްސިން ބައްދާލާއިރު، ވިސާމް ފަހަތުގައި
ގާނޫނު ތަންފީޒްކުރާ މުވައްޒަފެއްގެ މަސައްކަތަށް ގަސްދުގައި ހުރަސްއެޅުމުގެ ކުށުގެ ދައުވާ ސާބިތުކޮށް، ރާއްޖެޓީވީގެ ނޫސްވެރިޔާ މުހައްމަދު ވިސާމާއި ލީވާން އަލީ ނާސިރު ޖޫރިމަނާކުރި މައްސަލައިގައި އަދުލު އިންސާފް ނިޒާމްގެ ހުރިހާ ދޮރެއްގައި ޓަކި ޖަހާނެ ކަމަށް ގާނޫނީ ވަކީލް އަބްދުﷲ ހަސީން ވިދާޅުވެއްޖެއެވެ.
އަންގާރަ ދުވަހުގެ ރޭ ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން ވިސާމާއި ލީވާންގެ ގާނޫނީ ވަކީލް ހަސީން ވިދާޅުވީ ވިސާމާއި ލީވާން ގާނޫނު ތަންފީޒް ކުރާ މުވައްޒަފެއްގެ ވާޖިބަކަށް ހުރަސްއެޅިކަމަށް ބުނެ ދައުލަތުންކުރި ދައުވާ ސާބިތުކޮށް، ކޮންމެ ނޫސްވެރިޔަކު 28،800 ރުފިޔާއިން ޖޫރިމަނާކުރި މައްސަލައަކީ އިންސާފުގެ ހަމަތަކުން ކިރައިފި ނަމަ ސާބިތުވާނެ މައްސަލައެއް ކަމަށް ގަބޫލްނުކުރައްވާ މަށެވެ. ދައުވާ ސާބިތު ކުރުމަށް ފުލުހުންގެ ސްޕެޝަލިސްޓް އޮޕަރޭޝަންސް (އެސްއޯ)ގައި މަސައްކަތް ކުރާ ފަސް ފުލުހަކު ދީފައިވާ ހެކިބަސްތަކުގައި ބޮޑަތި ފުށުއެރުންތަކެއް ހުރިކަން ފާހަގަކުރަމުން ހަސީން ވިދާޅުވީ އެ މައްސަލަ ހައި ކޯޓުގައި އިސްތިއުނާފް ކުރާނެ ކަމަށެވެ. ހައި ކޯޓުން ކާމިޔާބު ނުލިބިއްޖެ ނަމަ ސުޕްރީމް ކޯޓަށް ވެސް ހުށައަޅާނެ ކަމަށް ވެސް ހަސީން ވިދާޅުވިއެވެ.
ހަސީން ވިދާޅުވީ ފުލުހަކު ބުނާ ކޮންމެ ބަހަކީ ހެކިބަހެއް ކަމަށް ބަލާއިގެން ފުލުހުންނަކީ މައުސޫމް ބައެއް ކަމަށް ބެލެން ނެތް ކަމަށެވެ. ކިތެންމެ ފުލުހުންގެ މައްޗަށް މަސްތުވާ ތަކެތީގެ މައްސަލައާއި މަރާމާރީގެ މައްސަލަ ތަކުގައި ޖިނާއީ ކުށް ސާބިތުވެފައިވާ ކަމަށް ވެސް އޭނާ ވިދާޅުވި އެވެ.
ވިސާމާއި ލީވާންގެ ކުށުގެ ރެކޯޑެއް ނެތްކަމަށް ބުނެ، އެ ދެ ނޫސްވެރިން 28،800 ރުފިޔާއިން ޖޫރިމަނާ ކުރުމަކީ ކުޑަ އަދަބައެއް ނޫން ކަމަށް ހަސީން ވިދާޅުވި އެވެ.
މި މައްސަލާގައި ވިސާމާއި ލީވާންގެ މައްޗަށް ހުކުމް ކުރި އިރު މި ނޫސްވެރިންނަށް ފުލުހުން އަނިޔާކުރި ކަމަށް ބުނާ މައްސަލަ ނޭޝަނަލް އިންޓެގްރިޓީ ކޮމިޝަނުގައި ހުއްޓުފިއިވާކަން ފާހަގަކުރަމުން ހަސީން ވިދާޅުވީ ކޯޓްގައި ހެކި ބަސް ދިން ފުލުހުންނަކީ ވިސާމާއި ލީވާނަން އަނިޔާކުރި ފުލުހުން ކަމަށެވެ.
ރާއްޖެޓީވީން ބުނީ ނޮވެމްބަރު 2، 2015 ވަނަ ދުވަހުގެ ރޭ ރާއްޖެޓީވީގެ ޗީފް އޮޕަރޭޓިން އޮފިސަރު ހުސައިން ފިޔާޒު މޫސާއާއެކު ލީވާނާއި ވިސާމް ހައްޔަރުކުރިއިރު، ހައްޔަރުކުރުމުގެ ތެރޭގައި އާއި ހައްޔަރު ކުރުމަށް ފަހު އަނިޔާކޮށްފައިވާކަން ބަޔާނުގައި ވަނީ ބުނެފައެވެ. އެގޮތުން ވިސާމުގެ ލޯމަތީގައި ޖަހައި ލޯ ދުޅަކޮށްލާފައިވާއިރު، ފިޔާޒުގެ ކަންފަތް މަތީގައި ޖަހައި ކަންފަތުގެ އެތެރެ ފަޅާލައި، ލޭ ދުއްވާލާފައިވާ ކަމަށް ރާއްޖެޓީވީން ވަނީ ބުނެފައެވެ.
ވިސާމުގެ މައްޗަށް ފުލުހުންގެ ދައުރަށް ހުރަސް އެޅުމުގެ ކުށުގެ ދައުވާ ވެސް އުފުލާފައިވާއިރު، އެ މައްސަލައިގެ އަޑުއެހުމެއް މިމަހުގެ 31 ވަނަ ދުވަހަށް ވަނީ ތާވަލުކޮށްފަ އެވެ. އަދި ރާއްޖެޓީވީގެ ސީއޯއޯ ހުސެއިން ފިޔާޒް މޫސާގެ މައްޗަށް ހިންގާ ޝަރީއަތުގެ އަޑުއެހުމެއް މިމަހުގެ 29 ވަނަ ދުވަހަށް ތާވަލުކޮށްފައިވާއިރު، ކެމަރާމަން އާދަމް ޒަރީރުގެ މައްޗަށް ކޮށްފައިވާ ދައުވާގެ ހުކުމް ކުރުން އަންނަ ފެބްރުއަރީ މަހުގެ 27 ވަނަ ދުވަހަށް ވަނީ ތާވަލުކޮށްފަ އެވެ.
