ހަފުތާއެއްގެ ތެރޭގައި ހަނގުރާމަ ހުއްޓޭނެ ކަމަށް ޓްރަމްޕް ވިދާޅުވެއްޖެ

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ، ހަފުތާއެއްގެ ތެރޭގައި ހުއްޓޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

މީގެ ކުރިން ވެސް ޓްރަމްޕް ވަނީ ހަނގުރާމަ ހުއްޓުމަކަށް އަންނާނެ ކަމަށާއި، އެއްބަސްވުމަކަށް އާދެވޭނެ ކަމުގެ އުންމީދު އޮތް ކަމަށް ވިދާޅުވެފަ އެވެ. 

ޓްރަމްޕް ވިދާޅުވީ އިސްރާއީލާއި ހަމާސްއާ ދެމެެދު ކުރިއަށްދާ ހަނގުރާމަ ކުރިއަށް އޮތް ދުވަސްތަކުގެ ތެރޭގައި ހުއްޓޭނެ ކަމަށާއި، އެކަމުގެ އުންމީދު ވެސް ބޮޑު ކަމަށެވެ. އަދި ޓްރަމްޕް ވިދާޅުވެފައި ވަނީ، "އަޅުގަނޑުމެން" މިހާރު މަޝްވަރާތައް ކުރިއަށް ގެންދަމުން އަންނަ ކަމަށާއި، އުންމީދަކީ ހަފުތާއެއްގެ ތެރޭގައި ހަނގުރާމަ ހުއްޓޭނެ ކަމުގެ އުންމީދު އޮތް ކަމަށެވެ. 

އެމެރިކާގެ ރައީސް ޓްރަމްޕް މިހެން ވިދާޅުވެފައިވާއިރު، ޓްރަމްޕްގެ ފަރާތުން މެދު އިރު މައްޗަށް ކަނޑައަޅުއްވާފައި ހުންނަވާ ޚާއްސަ މަންދޫބު ސްޓީވް ވިކްޓޮފް ވެސް ވަނީ ހަނގުރާމަ ހުއްޓޭނެ ކަމުގެ އުންމީދު ފާޅު ކޮށްފަ އެވެ. އަދި ހަނގުރާމަ ހުއްޓާލުމަށް ކުރަމުން އަންނަ މަސައްކަތް ވަރަށް އުންމީދީ ކަމަށް ވެސް އޭނާ ވަނީ ވިދާޅުވެފަ އެވެ. 

އެެމެރިކާ އިން ހުށަހަޅާފައި ވަނީ 60 ދުވަހުގެ މުއްދަތަކަށް ހަނގުރާމަ ހުއްޓާލުމަށެވެ. އެހެން ނަމަވެސް، އިސްރާއީލާއި ހަމާސްއާ ދެެމެދު އުފެދިފައިވާ ޚިޔާލު ތަފާތުވުންތަކުގެ ސަބަބުން އެއްބަސްވުން މިހާތަނަށް ކުރިއަށް ގެންދެވޭ ގޮތް ވަނީ ބުނެފަ އެވެ. 

އެމެރިކާގެ ރިޔާސީ ދެ ވަނަ ދައުރަކަށް ވަޑައިގެން ޓްރަމްޕް ގެންދަވަނީ ޣައްޒާ ހަނގުރާމަ ހުއްޓާލުމަށް ވަރަށް ބޮޑަށް ބާރު އަޅުއްވަމުންނެވެ. މިދިޔަ ހަފުތާގެ ތެރޭގައި ޓްރަމްޕް ވަނީ އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫއާ ވެސް ބައްދަލު ކުރައްވައިފަ އެވެ.

ނަމަވެސް، ޣައްޒާގައި އިސްރާއީލް އިން ހިންގަމުން އަންނަ ހަނގުރާމަ އަންނަނީ އެއް ދުވަހުން އަނެއް ދުވަހަށް ފުޅާ ކުރަމުންނެވެ.