ބޮޑު ކަންނެލި މަސްވެރިން ކަންބޮޑުވަނީ ޕްރައިވެޓް ކުންފުނިތަކުން ކަންނެލީގެ އަގު ވައްޓާލާތީ ކަމަށް ރައްޔިތުން މަޖިލީހުގެ ކެންދޫ ދާއިރާގެ މެންބަރު މައުރޫފް ޛާކިރު ވިދާޅުވެއްޖެއެވެ.

މެންބަރު މައުރޫފް ވިދާޅުވީ، ގާތްގަނޑަކަށް ސާޅީހަކަށް ފަންސާހަކަށް ދޯނީގެ ދިވެހި މަސްވެރިން ކަންނެލި ނުކުރިފައި ތިބުމަކީ ޖޯކެއް ނޫންކަމަށާއި އެތައް އާއިލާއެއްގެ ބޮޑު ކަންނެލި މަސްވެރިން މަސް ނުކިރި ލަސްވާ ކޮންމެ ދުވަހަކަށް ޕްރައިވެޓް ކުންފުނިތަކުން ކަންނެލީގެ އަގު ދަނީ އިންތިހާއަށް ވައްޓަމުން ކަމަށެވެ.

250 ފްލީޓު އޮތް މުޅި ކަންނެލި ސިނާއަތް މިއަދު 150 އޮޑިއަށް ތިރިވެގެން ދާކަމަށާއި ކަންނެލި މަސްވެރިން ދެހަފްތާ ވަންދެން ބޭރު ކަނޑުގައި ބުރަ މަސައްކަތުން މަސްބާނާފައި ފެކްޓްރީން 80 އަށް ގަންނާނަމޭ ބުނެގެން ގޮސް ކަނެލި ޖެޓީއަށް ވަންނައިރަށް މަހުގެ އަގު 40 ރުފިޔާ އަށް އަގު ވައްޓާލާފައި ހުންނަކަމަށް މައުރޫފް ފާހަގަކުރެއްވިއެވެ.

ބުރަ މަސައްކަތް ކޮށްގެން މަސް ބާނާއިގެން އައީމަ އެއަށް އަގު ކިޔާލަނީ ހިތުހުރި އަގެއް ކަމަށާއި ކަންނެލި މަސްވެރިން ތިބީ "ވިއްކަންޔާ ވިއްކަންވީ ނުވިއްކަންޔާ ގެއަށް ދާންވީ" އެހާލަތުގައި ކަމަށް މައުރޫފް ވިދާޅުވިއެވެ. އަދި 120 ޓަނަކީ މަދު އަދަދެއް ނޫންކަމަށާއި މިދިޔަ އަހަރުތަކާއި ބަލާއިރު މަސް އެކްސްޕޯޓު ކުރެވޭ މިންވަރު ހުރީ އިންތިހާއަށް ދަށްވެފައިކަން މައުރޫފް ފާޖހަގަކުރެއްވިއެވެ.

މައުރޫފް ވިދާޅުވީ ޕީއެންސީގެ މެންބަރުންވެސް މި މައްސަލަ ބަލައިގަތީ މިކަމުގެ ހައްސާސްކަން އެނގިވަޑައިގަންނަވާތީ ކަމަށެވެ. އަދި އެއްވެސް މެންބަރަކު މިކަމާ ސަމާސާ ނުކުރަށްވާ ރަނގަޅަށް މިކަމުގައި ބަހުސްކޮށް ރައީސުލްޖުމްހޫރިއްޔާ ވެވަޑައިގެންނެވި ވައުދު ފުއްދޭނެ ގޮތަކަށް މިކަން ކުރިއަށް ގެންދިއުމަށް މައުރޫފް ވަނީ ގޮވާލައިފައެވެ.

ވައުދުވީގޮތަށް 80 ރުފިޔާއާއި 100 ރުފިޔާއާއި ދޭތެރޭގެ އަގު ކަންނެއްޔަށް ދީ މިފްކޯއަށް ކަންނެލި ގަންނަ ނަމަ މި މައްސަލައަށް ވަރަށްބޮޑު ހައްލެއް ލިބިގެންދާނެ ކަމަށް މައުރޫފް ވިދާޅުވިއެވެ.