ކޮމިޓީގެ ލަފާ އަޅުގަނޑަކަށް މުހިންމެއް ނޫން: މިނިސްޓަރ މުއްތަލިބު
މިނިސްޓަރުގެ މަގާމުގައި ހަވާލުވެ ހުންނެވީ އެބޭފުޅާ ކަމަށާއި އެހެންކަމުން މުހިންމު ވާނީ މިނިސްޓަރު ނަގާ ޑިސިސަންތައް
ޢިމާރާތް ކުރުމާއި ބިނާރާބެހޭ ވުޒާރާގެ ވަޒީރު ޑރ. އަބްދުالله މުއްޠަލިބު
ރައީސް ސާލިޙް ގެ ސަރުކާރުގެ ގެދޮރުވެރިޔާ ސްކީމް ގެ ދަށުން ދޫކުރި 4000 ފްލެޓްގެ މައްސަލައިގައި ލަފާދިނުމަށް ރައީސް ޑރ. މުޙައްމަދު މުއިއްޒު އުފެއްދެވި ކޮމިޓީ އަކީ ލިސްޓާއި މެދު ލަފާދިނުމަށް އުފެއްދެވި ކޮމީޓީއެއް ކަމަށާއި ނަމަވެސް އެ ކޮމިޓީގެ ލަފާ މުހިންމު ނޫންކަމަށް ހައުސިންގ މިނިސްޓަރ ޑރ. އަބްދުﷲ މުއްތަލިބް ވިދާޅުވެއްޖެއެވެ.
މިނިސްޓަރ މުއްތަލިބު މިފަދައިން ވިދާޅުވީ ރައީސުލްޖުމްހޫރިއްޔާގެ އޮފީހުގައި ބުރާސްފަތި ދުވަހު ކުރިއަށް ދިއަ ނޫސް ވެރިންގެ ބައްދަލުވުމުގައި ރާއްޖެ އެމްވީގެ ނޫސްވެރިއާ ކުރެއްވި ސުވާލަކަށް ޖަބާބު ދެއްވަމުންނެވެ.
ގެދޮރުވެރިޔާ ސްކީމްގެ ދަށުން ރައީސް މުއިއްޒު އަށް ލަފާ އެރުވުމަށް އެކުލަވާލި ކޮމިޓީގެ ރިޕޯޓު ނެތް ކަމަށް ހައުސިންގ މިނިސްޓްރީން ބުނެފައިވަނީ މި މަހުގެ 19 ވަނަ ދުވަހުގައެެވެ.
ހައުސިންގ މިނިސްޓްރީން މިހެން ބުނެފައި ވަނީ މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން އެ ރިޕޯޓު ހޯދުމަށް ހުށަހަޅައިގެން ވެސް ރިޕޯޓު ލިބިފައި ނުވާތީ އިންފޮމޭޝަން ކޮމިޝަނަރ އޮފީހަށް ހުށަހެޅި ޝަކުވާ އަކާ ގުޅިގެން މެއި މަހުގެ 19 ވަނަ ދުވަހު ބޭއްވި އަޑު އެހުމުގައެވެ.
ފަހި ޔޫނިއަން އިން އެދިފައިވަނީ ގެދޮރުވެރިޔާ ސްކީމްގެ ދަށުން ފްލެޓް ގެ ކަންކަން ކުރިއަށް ގެންދިއުމަށް ލަފާ ދިނުމަށް ރައީސުލް ޖުމްހޫރިއްޔާ އުފެއްދެވި ލަފާދޭ ކޮމިޓީން ކުރި މަސައްކަތުގެ ތަފްސީލާއި، ކޮމިޓީން އެކުލަވާލި ރިޕޯޓާއި، ކޮމިޓީގައި ހިމެނޭ ފަރާތްތަކަށް ފައިސާގެ ގޮތުގައި ޚަރަދު ކުރި އެއްޗެއްގެ ތަފްސީލު ހޯދުމަށެވެ.
ހައުސިންގ އެޑްވައިޒަރީ ކޮމިޓީގެ ތަފްސީލު ހޯދުމަށް ހުށަހެޅުމުން ފަހި ޔޫނިއަން އަށް ހައުސިންގ މިނިސްޓްރީން ދިން ޖަވާބުގައި ބުނެފައިވަނީ، ހައުސިންގ މިނިސްޓްރީ ހިނގަމުން ދިޔަ އިމާރާތް އެނދުމުގެ ސަބަބުން މިނިސްޓްރީގެ ސާވަރ އަށް ގެއްލުންތަކެއް ލިބިފައިވާތީ ސާވަރގައި ހުރި މައުލޫމާތު ރިކަވަރ ކުރުމުގެ މަސައްކަތް ކުރިއަށްދާތީ، މައުލޫމާތު ރިކަވަރ ކުރެވުނުހާ އަވަހަކަށް އެ މައުލޫމާތު ހިއްސާ ކުރާނެ ކަމަށެވެ.
ރާއްޖެ އެމްވީގެ ނޫސްވެރިއާ މިނިސްޓަރާއި އަމާޒުކުރެއްވި ސުވާލުގައި ބުނެފައިވަނީ ގެދޮރުވެރިޔާ ސްކީމްގެ ދަށުން ރައީސް މުއިއްޒު އަށް ލަފާ އެރުވުމަށް އެކުލަވާލި ކޮމިޓީގެ ރިޕޯޓު ނެތް ކަމަށް ހައުސިންގ މިނިސްޓްރީން ބުނެފައިވާ ކަމަށާއި އިންފޮމޭޝަން މިނިސްޓްރީގައި ކުރިއަށް ދިއަ އަޑުއެހުމެއްގައި އެ ރިޕޯޓުގެއްލިފައިވާ ކަމަށް ހައުސިންގ މިނިސްޓްރީގެ ބޭފުޅަކު ވިދާޅުވެފައިވާ ކަމަށެވެ. އަދި އެ ރިޕޯޓު ގެއްލުނީ ކީއްވެތޯއާއި ގެއްލުުނު ސަބަބު ބަޔާންކޮށްދިނުމަށް އެދޭ ކަމަށެވެ.
މި ސުވާލުގެ ޖަވާބުގައި މިނިސްޓަރ މުއްތަލިބު ވިދާޅުވީ ގެދޮރުވެރިޔާ ސްކީމްގެ ދަށުން ރައީސް މުއިއްޒު އުފެއްދެވި އެ ކޮމިޓީ އަކީ ގެދޮރުވެރިޔާ ސްކީމްގެ ޕްރޮސެސްއަށް ލަފާދީ މިނިސްޓަރަށް ލަފާދެއްވުމަށް އުފައްދާފައިވާ ކޮމިޓީއެއް ކަމަށެވެ.
މިނިސްޓަރ ވިދާޅުވީ އެ ވިދާޅުވާ ރިޕޯޓު އެބަޮއޮތް ކަމަށާއި އޭރު ހައުސިންގ މިނިސްޓްރީން އެ ރިޕޯޓު ނެތްކަމަށް ވިދާޅުވެފައި ވަނީ އަލިފާނުގެ ހާދިސާގައި މިނިސްޓްރީގެ ސާވަރ ތައް އަނދައިގެން ދިއަދިއުމުން ކަމަށެވެ.
މިނިސްޓަރ ވިދާޅުވީ މިނިސްޓަރުގެ މަގާމުގައި ހަވާލުވެ ހުންނެވީ އެބޭފުޅާ ކަމަށާއި އެހެންކަމުން މުހިންމު ވާނީ މިނިސްޓަރު ނަންގަވާ ޑިސިސަންތައްކަމަށާއި ހުރިހާ ޒިންމާއެއްވެސް ނަގްނަވަން ޖެހިވަޑައިގަންނަވާނީ ޚުދު މިނިސްޓަރު ކަމުން ރައީސް އުފެއްދެވި ކޮމިޓީން ދީފައި ހުރި ލަފަޔަކީ އެމަނިކުފާނަށް މުހިންމު ލަފައެއް ނޫން ކަމަށް ވަނީ ވިދާޅުވެފައެވެ.
އަޅުގަނޑު އެއްވެސް ވަރަކަށް، އަޅުގަނޑު ހަވާލުވެފަ މިނިސްޓަރު ކަމުގައި، އަޅުގަނޑޭ ހުރީ، އަޅުގަނޑު ގަބޫލުކުރިގޮތުގައި އަޅުގަނޑޭ މިނިސްޓަރަކީ، އަޅުގަނޑޭ ޑިސިސަން ނަންގަން ޖެހޭނީ. އަޅުގަނޑޭ ޒިންމާވާނީ. އެހެންވީމާ ކޮމިޓީއަކުން އަދި ނިންމާފައި އޮތް ނިންމުމެއް އޮތަކަސް، ކޮމިޓީއަކުން އެޑްވައިސް ތަކެއް ދީފައި ހުއްޓަކަސް އެއީ ދެން އަޅުގަނޑަށް އެހާ މުހިންމު ކަމެއްނޫނޭ، އެއަށް ބަލައިގެން ކުރިއަށް ދިއުމަކީ. އެހެންވީމާ އަޅުގަނޑު އެ ރިޕޯޓެއް ނުވެސް ބަލަން. ނުވެސް ކިޔަން. އެއަށް ސަމާލުކަމެއްވެސް ނުދެން. އެ ރިޕޯޓު ހޯދާކަށްވެސް ނޫޅެން އަޅުގަނޑެއް.ހައުސިންގ މިނިސްޓަރ ޑރ. އަބްދުﷲ މުއްތަލިބް
މިނިސްޓަރ މުއްތަލިބު އިތުރަށް ވިދާޅުވީ އޭރު ބޭއްވި އަޑުއެހުމުގައި މިނިސްޓްރީގައި ރިޕޯޓުނެތްކަމަށް ބުނި ނަމަވެސް އެ ރިޕޯޓުގެ ސްކޭން ކޮޕީއެއް ލިބިފައި އެބައޮތް ކަމަށެވެ. އަދި އެ ރިޕޯޓު ވެރިފައި ކޮށްފައި ބޭނުންވާ ފަރާތަށް ދޫކޮށްލާނޭ ކަމަށް މިނިސްޓަރު ވިދާޅުވިއެވެ. އަދި އެ ރިޕޯޓުގައި ހުރީ ސްކީމުގައި ހުރި ގޯސްވާހަކަކަމަށް ވެސް މިނިސްޓްރު ވިދާޅުވިއެވެ.
