އެމެރިކާގެ ހަނގުރާމަ މަތީ މަތިންދާ ބޯޓެއް ކަނޑަށް ވެއްޓިއްޖެ

ރަތް ކަނޑުގައި ޙަރަކާތްތެރި ވަމުންދާ އެމެރިކާގެ ކެރިއަރ އިން މަތިންދާބޯޓަކާއި، ޓްރެކަރެއް ކަނޑަށް ވެއްޓިފައިވާ ކަމަށް އެ ޤައުމުގެ އަސްކަރިއްޔާ އިން ހާމަކޮށްފި އެވެ.

ހެރީ އެސް ޓްރޫމަން ކެރިއަރުގެ ހެންގަރ ބޭގައި ހުރި އެފް/އޭ18 އީ ސުޕަރ ހޯނެޓް އަދި ޓޯ ޓްރެކަރެއް ކަނޑަށް ވެއްޓިފައި ވަނީ އެ އުޅަނދުތައް ހިންގަން އުޅުމުގެ ތެރޭގައި ފަޅުވެރިންގެ އަތުން ކޮންޓްރޯލް ގެއްލުމާ ގުޅިގެންނެވެ. 

މި ހާދިސާގައި ނޭވީގެ އެއް ފަޅުވެރިޔަކަށް ކޮންމެ ވެސް ވަރެއްގެ އަނިޔާތަކެއް ލިބިފައިވާ ކަމަށް ވެސް ވަނީ ހާމަކޮށްފަ އެވެ. އެމެރިކާގެ އޮފިޝަލަކާ ހަވާލާދީ މީޑިއާ ތަކުގައި ބުނެފައިވާ ގޮތުން، އެ ހާދިސާ ހިނގާފައި ވަނީ ހޫތީންގެ މިސައިލް ހަމަލާ އަކުން ސަލާމަތްވުމަށް ކެރިއަރު ކުއްލި ގޮތަކަށް އަނބުރާލުމާ ގުޅިގެންނެވެ. ނަމަވެސް، އެ އޮފިޝަލުގެ ނަމެއް ހާމަކޮށްފައި ނުވެ އެވެ.

ހޫތީން އިން ވަނީ މީގެ ކުރިން ވެސް ޓްރޫމަން އަށް އަމާޒުކޮށް ހަމަލާ ދީފަ އެވެ. އެމެރިކާގެ ނޭވީ އިން ބުނެފައިވާ ގޮތުގައި، ޓްރޫމަން ކެރިއަރ ސްޓްރައިކް ގުރޫޕް އަދި އެއަރ ވިންގް އަށް މި ހާދިސާގެ ސަބަބުން އެއްވެސް ބުރުލެއް އަރާފައި ނުވާ ކަމަށެވެ.

މިއަހަރުގެ ތެރޭގައި ހޫތީން އިން ދިން ހަމަލާތަކާ ގުޅިގެން އެމެރިކާ އަށް ވަނީ 5 އެކްކިޔޫ-9 ރީޕަރ ޑްރޯން ގެއްލިފަ އެވެ. މި ޑްރޯންތަކުގެ އަގަކީ ގާތް ގަނޑަށް 30 މިލިއަން އެމެރިކާ ޑޮލަރެވެ. 

މި ހާދިސާއާ ގުޅޭ އިތުރު ތަހުގީގުތައް ކުރިއަށް ގެންދާ ކަމަށް ވެސް އެމެރިކާގެ އަސްކަރިއްޔާ އިން ވަނީ ހާމަކޮށްފަ އެވެ.