ރަޝިޔާ އާއި ޔުކްރެއިންއާ ދެމެދު ކުރިއަށްދާ ހަނގުރާމަ ހުއްޓުމުގެ މަޝްވަރާތަކަށް ޔުކްރެއިންގެ ވަފުދެއް އިނގިރޭސިވިލާތުގެ ވެރި ރަށް ލަންޑަނަށް ދިޔުމަށް ނިންމާފައިވާ ކަމަށް، ޔުކްރެއިންގެ ރައީސް ވުލެޑިމިއަރ ޒެލެންސްކީ ވިދާޅުވެއްޖެ އެވެ.

ޒެލެންސްކީ ވިދާޅުވެފައިވާ ގޮތުގައި ޔުކްރެއިންގެ ވަފުދުގެ ބޭފުޅުން އިނގިރޭސިވިލާތަށް ދިޔުމަށް ހަމަޖެހިފައި ވަނީ ބުދަ ދުވަހު އެވެ.

މި މަޝްވަރާ ތަކަކީ ފްރާންސްގެ ވެރި ރަށް ޕެރިހުގައި ބޭއްވުނު ބައްދަލުވުމަށް ފަހު ކުރިައަށް ގެންދެވޭ މަޝްވަރާ ބައްދަލުވުމެކެވެ. އެ ބައްދަލުވުމުގައި އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވަނީ ތިން އަހަރު ދުވަހުގެ ހަނގުރާމަ ނިންމުމަށް އެމެރިކާގެ ޕްލޭން ހުށަހަޅުއްވާފަ އެވެ.

އެމެރިކާގެ ރައީސް ޑޮނަލްޑް ޓްރަމްޕް ވަނީ ހުރިހާ ފަރާތްތަކަށް ވެސް ހަނގުރާމަ ހުއްޓުވުމަށް ގޮވާލައްވާފަ އެވެ. ނަމަވެސް، ރަޝިޔާގެ ރައީސް  ވްލަޑިމިއާ ޕުޓިން އިއުލާން ކުރެއްވި ކުރު މުއްދަތުގެ ހުއްޓުމަށް ފަހު ވެސް، ގިނަ މަޝްވަރާތަކެއް ކުރެވުނު ނަމަވެސް، ރަޝިޔާގެ ފަރާތުން އެއްވެސް މުހިންމު ހައްލެއް ހޯދިފައި ނުވެ އެވެ.

މީގެ އިތުރުން ޒެލެންސްކީ ވިދާޅުވެފައި ވަނީ ޝަރުތެއް ނެތި ހަނގުރާމަ ހުއްޓާލުމަކީ، އަމާންކަމާ ދިމާލަށް އެޅޭނެ އެންމެ ފުރަތަމަ ފިޔަވަޅު ކަމުގައި ވާން ޖެހޭ ކަމަށެވެ. 

ބައްދަލުވުމުގައި އިތުރު ކޮން ފަރާތްތަކެއް ބައިވެރިވާނެކަން ޒެލެންސްކީ ހާމަ ނުކުރެއްވި ނަމަވެސް، ރޫބިއޯ ވަނީ އެމެރިކާގެ ވަފުދެއް ބައިވެރިވާނެ ކަމަށް މީގެ ކުރިން އިޝާރާތް ކުރައްވާފަ އެވެ.