ލ. މާންދޫގައި ހިނގި އެކްސިޑެންޓެއްގައި ޒުވާނަކު ނިޔާވެއްޖެއެވެ.

މައުލޫމާތު ލިބިފައިވާ ގޮތުގައި އެކްސިޑެންޓުގައި ނިޔާވީ ލ.މާބައިދޫ، 35 އަހަރުގެ އިބްރާހިމް ނައުޒަމް ނަމަކަށް ކިޔާ ޒުވާނެކެވެ.

ޒުވާނަކު ނިޔާވިކަން ގަމު ހޮސްޕިޓަލްގެ ސީއީއޯ އަބްދުލްހައްނާން އަބްދުއްރަހީމް ވަނީ ރާއްޖެއެމްވީއަށް ކަށަވަރުކޮށް ދެއްވާފައެވެ.

އޭނާ ވިދާޅުވީ އެކްސިޑެންޓްވެ ޒުވާނަކު މަގުމައްޗަށް ވެއްޓިފައިވާތީ އެމްބިއުލާންސް ފޮނުވައިދިނުމަށް އެދި ހުކުރު ދުވަހުގެ ރޭ 2:50 ގައި ރިޕޯޓު ލިބިފައިވާ ކަމަށެވެ. އެ ޒުވާނާ ހޮސްޕިޓަލަށް ގެނައިއިރު ވެސް އެއްވެސް ހަރަކާތެއް ނެތް ކަމަށާއި، ވަރަށް ބޮޑަށް ޒަހަމްވެފައިވާ ކަމަށެވެ. އަދި ނިޔާވި ކަމަށް ޑޮކްޓަރުން ކަނޑައަޅާފައިވަނީ ހޮނިހިރު ދުވަހުގެ ހެނދުނު 8:20 ގައި ކަމަށެވެ.

މައުލޫމާތު ލިބިފައިވާ ގޮތުގައި އެ ޒުވާނާގެ ބޮލަށް ވަނީ ވަރަށް ބޮޑަށް އަނިޔާވެފައެވެ. އަދި އެކްސިޑެންޓް ހިނގާފައިވަނީ ސައިކަލް ކޮންޓްރޯލް ނުވެ، މާންދޫ ބެންޑުގެ ބެޑު ފާރުގައި ޖެހުމުގެ ސަބަބުންނެވެ.

މިއެކްސިޑެންޓާ ގުޅޭގޮތުން ފުލުހުންގެ ބަހެއް ވަނީ ލިބޭ ގޮތް ނުވެފައެވެ.

އެކްސިޑެންޓެއްގައި މާބައިދޫ ޒުވާނަކު ނިޔާވިއިރު، ހުކުރު ދުވަހުގެރޭ ހުޅުމާލޭގައި ވެސް ސައިކަލަކުން ވެއްޓި އަނިޔާވި ޒުވާނާގެ ހާލު ސިރިއަސްވެ އަށް އައިޖީއެމްއެޗްގެ އެމަޖެންސީގައި ދަނީ ފަރުވާ ދެމުންނެވެ. މިފަހަކަށް އައިސް މާލެސިޓީގެ އިތުރުން އަތޮޅުތެރޭގައި އެކްސިޑެންޓްތައް ހިނގާ މިންވަރު ވަނީ ވަރަށް ބޮޑަށް އިތުރުވެފައެވެ. އަދި އެކްސިޑެންޓްތަކާ ގުޅިގެން ގިނަ ބައެއްގެ ފުރާނަ ގެއްލިފައިވެ އެވެ.