އިންޑިއާގެ ބޮޑުވަޒީރު ނަރެންދުރަ މޯދީ ލަންކާ އަށް ވަޑައިގަންނަވައިފި

ހުކުރު ދުވަހުގެ ހަވީރު ރަސްމީ ދަތުރުފުޅެއްގައި އިންޑިއާގެ ބޮޑުވަޒީރު ނަރެންދުރަ މޯދީ ލަންކާ އަށް ވަޑައިގަންނަވައިފި އެވެ.

ތިން ދުވަހުގެ ރަސްމީ ދަތުރުފުޅެއްގައި ލަންކާ އަށް މޯދީ ވަޑައިގަންނަވާފައި ވަނީ ބިމްސްޓެކް (ބޭ އޮފް ބެންގަލް އިނިޝިއޭޓިވް ފޯ މަލްޓި ސެކްޓޯރަލް ޓެކްނިކަލް އެންޑް އިކޮނޮމިކް ކޯޕަރޭޝަން) ގެ ސަމިޓެއްގައި ބައިވެރިވެވަޑައިގެންނެވުމަށް ބެންކޮކަށް ކުރެއްވި ދަތުރުފުޅު ނިންމަވާލެއްވުމަށް ފަހުގައެވެ.

މޯދީ ލަންކާ އަށް ވަޑައިގެންނެވި ވަގުތު ކޮންމެވެސް ވަރަކަށް ވާރޭ ވެހުނު ނަމަވެސް އިންޑިއާގެ ބޮޑުވަޒީރަށް ލަންކާ ސަރުކާރުގެ ފަސް ޓޮޕް މިނިސްޓަރުން އޭނާ އަށް މަރުޚަބާ ކިޔުމަށް ނުކުތުމަކީ، މޯދީގެ މި ދަތުރުފުޅަށް ލަންކާ ސަރުކާރުން ދޭ މުހިންމުކަން ހާމަވެގެންދެއެވެ.

މީޑިއާ ރިޕޯޓްތައް ބުނާ ގޮތުން މި ދަތުރުފުޅުގެ ތެރެއިން ލަންކާގެ ރައީސުލްޖުމްހޫރިއްޔާ އަނޫރާ ކުމާރާ ދިއްސާނަޔަކޭއާ އެކު ފުޅާ ދާއިރާއެއްގައި މަޝްވަރާ ކުރައްވާނެ އެވެ. މި މަޝްވަރާތައް ކުރިއަށް ދާނީ ހޮނިހިރު ދުވަހު އެވެ.

މި ބައްދަލުވުމަށްފަހު އިންޑިއާ އާއި ލަންކާ އިން އެކި ދާއިރާތަކުން ހާސިލް ކުރެވިދާނެ ރަނގަޅު 10 ވަރަކަށް ނަތީޖާ ފާހަގަކުރެވޭނެ ކަމަށް މީޑިއާތަކުން ވަނީ ރިޕޯޓްކޮށްފަ އެވެ.

މޯދީ ލަންކާ އަށް ދަތުރުފުޅަކީ ލަންކާ އަށް ދިމާވެފައިވާ އިގްތިޞާދީ ދަތިކަމުން އަރައިގަތުމަށް އެ ގައުމުން މަސައްކަތް ކުރަމުންދާ ދަނޑިވަޅެއްގައި ކުރަމުންދާ ދަތުރެކެވެ. މީގެ ތިން އަހަރު ކުރިން އެގައުމު ބޮޑު އިގްތިސާދީ އަނދަވަޅަކަށް ވެއްޓުނު އިރު އިންޑިއާއިން ވަނީ 4.5 ބިލިއަން ޑޮލަރުގެ މާލީ އެހީތެރިކަން ފޯރުކޮށްދީފަ އެވެ.

މިއީ 2019 ވަނަ އަހަރަށް ފަހު ޕީއެމް މޯދީ ލަންކާ އަށް ކުރެއްވި ފުރަތަމަ ދަތުރުފުޅެވެ. އަދި މިއީ ލަންކާގެ މިހާރުގެ ރައީސް އަނޫރާ ކުމާރާ ދިއްސާނާޔަކޭގެ ވެރިކަމުގައި ވާތުފިޔައިގެ ނޭޝަނަލް ޕީޕަލްސް ޕަވަރ އިއްތިހާދު ވެރިކަމަށް އައުމަށްފަހު މޯދީ އެ ގައުމަށް ކުރައްވާ ފުރަތަމަ ދަތުރުފުޅު ވެސްމެއެވެ.