ޑުޓާޓޭގެ ޝަރީއަތްތައް ހުކުރު ދުވަހު އައިސީސީގައި ފަށަނީ

ފިލިޕީންސްގެ ކުރީގެ ރައީސް ރޮޑްރީގޯ ޑުޓާޓޭގެ މައްޗަށް އުފުލާފައިވާ ދައުވާތަކުގެ ޝަރީއަތުގެ ފުރަތަމަ އަޑު އެހުން ހުކުރު ދުވަހު އޮންނާނެ ކަމަށް، ބައިނަލްއަޤުވާމީ ޖިނާއީ ކޯޓު (އައިސީސީ) އިން ބުނެފި އެވެ.

ޑުޓާޓޭގެ މައްޗަށް އުފުލާފައިވާ ދައުވާ އަކީ އޭނާގެ ވެރިކަމުގެ ދުވަސްވަރު މަސްތުވާ ތަކެއްޗާ ދެކޮޅަށް ހިންގި އޮޕަރޭޝަންގައި ނުހައްގުން މީހުންތަކެއް މަރާލާފައިވާ ކަމުގެ ދައުވާ އެވެ.

ނެދަލެންޑްސްގެ ވެރި ރަށް ދަ ހޭގް ގައި ހުންނަ އައިސީސީގެ ބަންދުގެ ދަށަން އޭނާ ގެނެވުނީ ނުހައްގުން މީހުންތަކެއް މަރާލަފައިވާ މައްސަލައިގައި، އެ ކޯޓުން ނެރުނު އަމުރެއްގެ ދަށުން ފިލިޕީންސްގެ މެނީލާ އެއާޕޯޓުން ހައްޔަރު ކޮށްގެންނެވެ.

ޑުޓާޓޭ އައިސީސީ އަށް ހާޒިރު ކުރެވޭނީ ހުކުރު ދުވަހުގެ މެންދުރު ފަހު ޖީއެމްޓީން 13:00 ގައެވެ. މަސްތުވާ ތަކެއްޗާ ދެކޮޅަށް ޑުޓާޓޭ ހިންގި ހަރުކަށި ކެމްޕޭނުގެ ތެރޭގައި މަސްތުވާ ތަކެތި ބޭނުން ކުރާ މީހުންނާއި، ވިއްކާ މީހުން ކަމަށް ބެލެވޭ ގިނަ އަދަދެއްގެ މީހުން މެރި ކަމަށް ބައިނަލްއަޤުވާމީ މުޖުތަމައުން ތުހުމަތުކުރެ އެވެ.

މި މައްސަލަ ބެލުމަށް އައިސީސީ އިން ތަހުގީގެއް ފަށައި، އޭނާ ހައްޔަރު ކުރުމުގެ އަމުރެއް ވަނީ ނެރެފަ އެވެ. ޑުޓާޓޭ ހައްޔަރު ކުރުމަ ގުޅިގެން އަނިޔާ ލިބުނު ފަރާތްތަކުގެ އާއިލާ އާއި، ބައެއް އެހެން ފަރާތްތަކުން ވެސް ވަނީ އެކަމަށް މަރުޙަބާ ކިޔައިފަ އެވެ.