ޔުކްރެއިން އާއި ރަޝިއާ ދެމެދުގައި ކުރިއަށްދާ ހަނގުރާމަ 30 ދުވަހުގެ މުއްދަތަކަށް ހުއްޓާލުމުގެ ހުށަހެޅުމެއް ހުށަހަޅާފައި ވަނިކޮށް، ކާސްކް ސަރަހައްދުގައި ތިބި ޔުކްރެއިންގެ ސިފައިން ވީ އެންމެ އަވަހަކަށް ބަލި ކުރުމަށް، ރަޝިއާގެ ރައީސް ވްލަޑިމިއާ ޕުޓިން އެ ޤައުމުގެ ސިފައިންގެ އިސްވެރިންނަށް އަމުރު ކުރައްވައިފި އެވެ.

އޯގަސްޓު މަހުގެ ހަ ވަނަ ދުވަހު އުކްރެއިން ސިފައިން ރަޝިއާގެ ބޯޑަރު ހުރަސްކޮށް، ކާސްކް ސަރަޙައްދުގެ ބައެއް އަތުލައި ގަތެވެ. މިއީ ރަޝިއާގެ ސަމާލުކަން އިރުމަތީ އުކްރެއިންގެ ކުރި މަގުން އެއްކިބާކޮށް، މަޝްވަރާތަކު ގައި ބޭނުން ކުރެވޭނެ ބާރެއް ހޯދުމުގެ މަޤްޞަދުގައި ކުރި ކަމެކެވެ.

ރަޝިއާގެ މިލިޓަރީ އިން މަޢުލޫމާތު ދީފައިވާ ގޮތުން، މިދިޔަ އަހަރުގެ ފަހު ކޮޅު ޔުކްރެއިންގެ ބާރުތަކުގެ ދަށުގައި 1,300 އަކަ ކިލޯ މީޓަރުގެ ސަރަޙައްދެއް އޮތްއިރު، މިހާރު އެ ސަރަޙައްދު ވަނީ 200 އަކަ ކިލޯމީޓަރަށް ކުޑަވެފަ އެވެ.

ރަޝިއާގެ ޖެނަރަލް ސްޓާފްގެ އިސްވެރިޔާ ވެލެރީ ގެރަސިމޮވް ވިދާޅުވި ގޮތުގައި، ފާއިތުވި ފަސް ދުވަހުގެ ތެރޭގައި 24 އާބާދީއެއް އަނބުރާ ހޯދައި، 400 އަށް ވުރެ ގިނަ ޔުކްރެއިން ސިފައިން ހައްޔަރު ކޮށްފައިވެ އެވެ.

އެހެން ނަމަވެސް، ޔުކްރެއިންގެ ސިފައިންގެ އެންމެ އިސްވެރިޔާ އޮލެކްސަންޑަރ ސިރްސްކީ ވަނީ، ސުޖާ ސަރަޙައްދު ގައި ހަނގުރާމަ ކުރިއަށްދާ ކަމަށާއި، ބޭނުންވާ މުއްދަތަކަށް ކާސްކް ގައި ހަރަކާތްތެރި ވާނެ ކަމަށް ބުނެފަ އެވެ.

މި ހަފުތާގެ ކުރީ ކޮޅު، ސައުދީ އަރަބިއްޔާ ގައި ބޭއްވުނު މަޝްވަރާތަކަކަށް ފަހު، އެމެރިކާ އިން ވަނީ އުކްރެއިނަށް ހަތިޔާރު ފޯރުކޮށްދިނުމާއި، އިންޓެލިޖެންސް މައުލޫމާތު ހިއްސާ ކުރަން އަލުން ފަށަން ނިންމައިފަ އެވެ.

ރަޝިއާ އިން އިން ބުނާ ގޮތުން، މި މަޝްވަރާތަކުގެ ނަތީޖާތައް ދިރާސާ ކުރަމުންދާ ކަމަށާއި، އެމެރިކާގެ ފަރާތުން އިތުރު ތަފްސީލުތަކަށް އިންތިޒާރު ކުރަމުން އަންނަ ކަމަށެވެ.