"މާސްޓާފުޑްސްގެ" ކުކިން ސޯސްއެއް ރާއްޖޭގައި ވިއްކުމާއި ބޭނުން ކުރުން އެމްއެފްޑީއޭއިން މަނާކޮށްފި
5 މާރިޗު 2025 | ބުދަ 14:04މި އުފެއްދުމުގެ ލޭބަލްގައި އެލާޖެންގެ މައުލޫމާތު ހިމަނާފައިނުވޭ
މާސްޓަރ ފުޑްސް ކްރީމީ ޗިކަން އެންޑް މަޝްރޫމް ސޯސްފުޅިއެއް
"މާސްޓާފުޑްސްގެ" ކުކިން ސޯސްއެއް ރާއްޖޭގައި ވިއްކުމާއި ބޭނުން ކުރުން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އިން މަނާކޮށްފިއެވެ.
ބުދަ ދުވަހު އެމްއެފްޑީއޭއިން ބުނީ މާރސް އޮސްޓްރޭލިއާ އިން ތައްޔާރުކޮށްފައިވާ ''މާސްޓަރ ފުޑްސް ކްރީމީ ޗިކަން އެންޑް މަޝްރޫމް ކުކިންގް ސޯސް''ގެ އެކުލެވިގެންވާ ތަކެތީގެ ތެރޭގައި ބިސް ހިމެނޭ ކަމަށެވެ. ނަމަވެސް މި އުފެއްދުމުގެ ލޭބަލްގައި އެލާޖެންގެ މައުލޫމާތު ހިމަނާފައިނުވާތީ މި އުފެއްދުން ބާޒާރުން ނެގުމަށް އެކުންފުނިން އަންގާފައިވާ ކަމަށެވެ.
އެމްއެފްޑީއޭއިން ބުނީ މިއުފެއްދުން ދިވެހިރާއްޖެއަށް އެތެރެވެފައިވާ ކަމުގެ މައުލޫމާތު ދުނިޔޭގެ ސިއްހަތު ޖަމިއްޔާގެ އިންޓަރނޭޝަނަލް ފުޑް ސޭފްޓީ އޮތޯރިޓީސް ނެޓްވާރކް މެދުވެރިކޮށް އަންގާފައިވާ ކަމަށެވެ. މިގޮތަށް އެލާޖަންގެ މައުލޫމާތު ލޭބަލުގައި ހިމަނާފައި ނުވުމަކީ މި އުފެއްދުން ބޭނުންކުރާ ފަރާތްތަކުގެ ސިއްހަތަށް ނުރައްލަކަލެއް ދިމާވެދާނެ ފަދަ ކަމެއް މެދުވެރިވުމުގެ ފުރުސަތު އޮތް ކަމެއް ކަމަށް އެފަރާތުން ފާހަގަކޮށްފައިވާ ކަމަށް އެމްއެފްޑީއޭއިން ބުނެއެވެ.
އެހެންކަމުން ރައްކާތެރިކަމުގެ ފިޔަވަޅެއްގެ ގޮތުން އެ އުފެއްދުން ރާއްޖެއަށް އެތެރެ ނުކުރުމަށާއި ނުވިއްކުމަށް ވަނީ އަންގާފައެވެ.
