ޣައްޒާ ހަނގުރާމަ ހުއްޓާލުމުގެ އެއްބަސްވުން ލަސްވާތީ އިސްރާއީލުގެ ރައްޔިތުން ނަތަންޔާހޫ ގެކޮޅު ކައިރީގައި މުޒާހަރާ ކޮށްފި

އިސްރާއީލުގެ ސަރުކާރުން ޣައްޒާ ހަނގުރާމަ މުޅިން ހުއްޓާލުމުގެ އެއްބަސްވުން ލަސްކުރާތީ އިސްރާއީލުގެ ރައްޔިތުން ނަތަންޔާހޫ ގެކޮޅު ބޭރުގައި މުޒާހަރާ ކޮށްފިއެވެ.

ހަނގުރާމަ ހުއްޓާލުމުގެ އެއްބަސްވުުމުގެ ފުރަތަމަ ފިޔަވަހީގެ މުއްދަތު ހަމަވުމުން ނަތަންޔާހޫގެ ސަރުކާރުން އަމިއްލަ އަށް ނިންމާފައިވަނީ ހަނގުރާމަ ހުއްޓާލުމުގެ ދެވަނަ ފިޔަވަހީގެ މަޝްވަރާތަކަށް ނުގޮސް ފުރަތަމަ ފިޔަވަހި ދިގު ދަންމާލުމަށެވެ. އެހެން ނަމެވެސް ހަމާސް އިން ވަނީ އެގޮތް ގަބޫލު ނުކުރާނެ ކަމަށް ބުނެފައެވެ.

އެއްބަސްވުން ފުރިހަމައަށް ތަންފީޒުކުރުން ލަސްކުރުމާ ގުޅިގެން އާދިއްތަ ދުވަހުގެ ރޭ ބޮޑު އިހުތިޖާޖެއް އިސްރާއީލުގައި ވަނީ ކުރިއަށް ގެންގޮސްފައެވެ.

އެއްބަސްވުމުގެ ދެވަނަ މަރުހަލާ ކުރިއަށް ނުގެންދިއުމުގެ ސަބަބުން އިސްރާއީލުގައި މުޒާހަރާ ކުރި ފަރާތްތަކުގެ ހަމައެކަނި ކަންބޮޑުވުމަކީ ހަމާސް އިން ހައްޔަރު ކޮށްފައިތިބި ރަހީނުންގެ މައްސަލަ ކަމަށް ވީނަަމެވެސް، ހަނގުރާމަ ހުއްޓާލުމުގެ ފުރަތަމަ ފިޔަވަހީގެ މުއްދަތު ހަމަވުމާއެކު އާދިއްތަ ދުވަހުން ފެށިގެން ޣައްޒާގައި ދިރިއުޅޭ ފަލަސްތީނު ރައްޔިތުންނަށް އެހީގެ ތެކެތި ފޯރުކޮށްދިނުމަށް އިސްރާއީލުން ވަނީ ހުރަސް އަޅާފައެވެ.

އެއްބަސްވުމުގެ ފުރަތަމަ ފިޔަވަހި ހޮނިހިރު ދުވަހު ނިމުނު ނަމަވެސް، ދެވަނަ ފިޔަވަހީގެ މަޝްވަރާތައް ކުރިއަށް ދާއިރު ހިއުމެނިޓޭރިއަން އެހީ ޣައްޒާއަށް ފޯރުކޮށްދިނުން ކުރިއަށް ދާނެ ކަމަށް އެއްބަސްވުމުގައި ބަޔާން ކޮށްފައި ވެއެވެ.

އެހެންނަމަވެސް، އާދިއްތަ ދުވަހު އިސްރާއީލުން ކުއްލިއަކަށް ވަނީ "ވިޓްކޮފް ޕްލޭން" މިނަމުގައި އައު ހުށަހެޅުމެއް ހުށަހަޅާފައެވެ. އެމެރިކާ އިން ކަނޑައަޅާފައި ހުންނަވާ ޚާއްސަ އެންވޯއީ، ސްޓީވް ވިޓްކޮފް ގެ ނަމުގައި ހާމަ ކުރި މި ޕްލޭނުގެ ދަށުން ހައްޔަރުކޮށްފައިވާ މީހުންގެ ތެރެއިން ދެބައިކުޅަ އެއްބައި މީހުން ވަގުތުން ދޫކޮށްލުމަށްފަހު، ދާއިމީ ހުއްޓުމަކަށް އެއްބަސްވުމަކަށް އާދެވުމުން އަނެއްބައި މީހުން ދޫކޮށްލާ ގޮތަށް ވަނީ ހުށަހަޅާފައެވެ. މިއާއެކު އެންމެ ފުރަތަމަ އެއްބަސްވި އެއްބަސްވުން ތާކުންތާކު ނުޖެހި ދިޔައީ ކަމަށް ރިޕޯޓުތައް ބުނެއެވެ. ޣައްޒާ އަށް ދަތިކުރުމުގެ ފިޔަވަޅު އިސްރާއީލުން އެޅިއިރު އެމެރިކާ އަކުން ވެސް އަދި ވިޓްކޮފްގެ ފަރާތްޕުޅުންވެސް އިތުރު ޕްލޭނެއް އޮތްކަން ހާމަ ކުރައްވާފައެއް ނެތެވެ.

އިސްރާއީލުން މިހާރު ވަނީ ޣައްޒާ އަށް ތަކެތި ހިފައިގެން ވަންނަ މަގުތައް ބަންދުކޮށް އެހީ ލިބުން މުޅިން ހުއްޓުވާފައެވެ. މިކަމުގެ ސަބަބުން ޣައްޒާގައި ކާބޯތަކެތީގެ އަގުތައް އިންތިހާ އަށް ދަނީ އުފުލެމުން ކަމަށް ރިޕޯޓަތަކުގައި ވެއެވެ.

ޔުނިސެފްއިން ވަނީ 16 މަސްދުވަހުގެ ހަނގުރާމައިން ހަލާކުވެފައިވާ ޣައްޒާގެ ކުޑަކުދިންނާއި ޢާއިލާތަކަށް އެހީގެ ބްލޮކޭޑްގެ ސަބަބުން ނުރައްކާތެރި ނަތީޖާތަކެއް ކުރިމަތިވާނެކަމުގެ އިންޒާރު ދީފައެވެ.

އަނެއްކޮޅުން ކާބޯތަކެތީ ދަތިކަން ކުރިމަތި ކުރުވާ މުޅި އާބާދީ އަށް ގެއްލުން ދިނުމާ ބެހޭ ގޮތުން ލަންޑަން ސްކޫލް އޮފް އިކޮނޮމިކްސްގެ ޕްރޮފެސަރ ޖެރީ ސިމްޕްސަން ވިދާޅުވި ގޮތުގައި، ޖެނީވާ ކޮންވެންޝަންގެ ދަށުން ޖަމާޢީ އަދަބު ދިނުމަކީ މަނާކަމެކެވެ.

މީޑިއާ ރިޕޯޓުތައް ބުނާގޮތުގައި އިސްރާއީލުގެ ރިޒާވް ގައި ހިމެނޭ 400،000 ސިފައިން ޚިދުމަތައް ނެރުމަށް ބޭނުންވާ ބިލެއް އިސްރާއީލު ސަރުކާރުން ވަނީ ގާނޫނު ހަދާ މަޖިލިހަށް ހުށަހަޅާފައެވެ.

މަސްރަހް ދިރާސާ ކުރާ ފަރާތްތަކުން ބުނާ ގޮތުގައި ބޮޑުވަޒީރު ނަތަންޔާހޫގެ ވިސްނުންފުޅުގައި ހުރީ ހަނގުރާމަ މުޅިން ހުއްޓާލުމަކަށް ނޫނެވެ. އާދިއްތަ ދުވަހުގެ ރޭ ބޮޑު ވަޒީރުގެ ގެކޮޅުގެ ކައިރީގައި މުޒާހަރާ ކުރި މީހުން ގޮވަމުން ދިޔައީ ހަނގުރާމަ މުޅިން ހުއްޓާލުމުގެ އެއްބަސްވުން ފުރިހަމަ ނުވުމުގެ ޒިންމާ އަޅުައްވަން ޖެހެނީ ބޮޑު ވަޒީރުގެ އިސްތަށިފުޅުގައި އަކަނި ކަމުގައެވެ.