އަފްޣާނިސްތާނުގައި ހަރަކާތްތެރިވާ ތާލިބާން ފަދަ ހަނގުރާމަވެރި ޖަމާއަތްތަކަށް ޕާކިސްތާނުން ރައްކާތެރިކަމާއި މަދަދު ފޯރުކޮށްދޭނަމަ ޕާކިސްތާނަށް އެމެރިކާ އިން ދީފައިވާ އަސްކަރީ ރަހްމަތްތެރިކަމުގެ މަގާމު ގެއްލިގެން ހިނގައިދާނެ ކަމަށް އެމެރިކާ އިން ބުނެފިއެވެ.
އެމެރިކާ އިން ޝަރަފުވެރިކަމާއެކު ބަލައިގަންނަ އަސްކަރީ އެހީތެރިއެއްގެ ގޮތުގައި ޕާކިސްތާނު އޮތް އޮތުން، އަފްޣާނިސްތާނުން ހަނގުރާމަވެރި ޖަމާއަތްތަކަށް ރައްކާތެރިކަން ފޯރުކޮށްދޭނަމަ ގެއްލިގެން ހިނގައިދާނެ ކަމަށް އެމެރިކާގެ ޚަރިޖީ ވަޒީރު ރެކްސް ޓިލާސަން އަންގާރަ ދުވަހު ޕާކިސްތާނަށް އިންޒާރު ކުރެއްވިއިރު ރައީސް ޑޮނަލްޑް ޓްރަމްޕް ދާދިފަހުން ވިދާޅުވީ އަފްގާނިސްތާނުގައި ހަަރަކާތްތެރިވާ ހަނގުރާމަވެރިންނާ ދެކޮޅަށް ހަނގުރާމަ ކުރަމުންދާ އަފްޣާނިސްތާނު ސިފައިންނަށް އެމެރިކާ އިން ވާގިވެރިވުމަށް ވައުދުވެވަޑައިގަންނަވާ ކަމަށެވެ.
ޕާކިސްތާނަކީ ނޮން-ނޭޓޯ އެލެޔަންސް ޕާޓްނަރެކެވެ. ޓީލާސަން ވިދާޅުވީ ނޮން-ނޭޓޯ އެލެޔަންސްގެ ގޮތުގައި ޕާކިސްތާން އޮންނަ އޮތުމުގެ ސަބަބުން އެގައުމަށް ބިލިއަން ޑޮަލަރުގެ އެހީ ލިބޭ ކަމަށާއި އަދި އެމެރިކާ އިން ޒަމާނީ އަސްކަރީ ޓެކްނޮލޮޖީ ފޯރުކޮށްދޭ ކަމަށެވެ. ޓިލާސަން ވިދާޅުވީ އެމެރިކާ އިން ޕާކިސްތާނާއެކު މަސައްކަތް ކުރަން ބޭނުންވާ ކަމަށެވެ.
ދާދިފަހުން ރައީސް ޓްރަމްޕް ވިދާޅުވީ އަފްޣާނިސްތާނުގައި ކުރަމުންދާ ހަނގުރާމައިގައި ބޭންވަނީ "މޮޅުވާން" ކަމަށާއި އަދި އެމެރިކާ އަސްކަރިއްޔާގެ ބާރު ގަދަކުރަން ކަމަށެވެ.
ވޮޝިންޓަންގެ މިލިޓަރީ ބޭސްއެއްގެ ކައިރީގައި ދެއްވި ތަގުރީރެއްގައި ރައީސް ޓްރަމްޕް ވިދާޅުވީ މިހާރު އަފްޣާނިސްތާނު ހަނގުރާމައިން އެމެރިކާ އަށް ބޭރު ނުވެވޭނެ ކަމަށެވެ. އެހެން ނަމަވެސް މިއަދާ ހަމައަށް އައި އިރު އެމެރިކާ އޮންނަން ޖެހޭނީ އެ ހަނގުރާމައިން އަތްދޫކޮށްލައިގެން ކަމަށް ގަބޫލުކުރައްވާ ކަމަށް ވެސް ޓްރަމްޕް ވިދާޅުވިއެވެ. ނުސީދާ ގޮތެއްގައި ޓްރަމްޕް ވިދާޅުވީ އަފްޣާނިސްތާނުގެ ހަނގުރާމައިން ކާމިޔާބު ނުލިބި އޮތީ ކުރީގެ ސަރުކާރުތަކުން އެޅި ފިޔަވަޅުތަކުގެ ސަބަބުން ކަމަށެވެ.
އެމެރިކާގެ 8،400 ސިފައިން މިހާރު އަފްޣާނިސްތާނުގައި ދަނީ ހަަރަކާތްތެރި ވަމުންނެވެ.
