ސޫދާނުގެ ހަނގުރާމަވެރި ޖަމާޢަތަކުން 127 ރަހީނުން މިނިވަން ކޮށްފި
މިނިވަންކުރި މީހުންގެ ތެރޭގައި 109 ސިފައިން ހިމެނޭ
ދެކުނު ސޫދާނުގެ ބައެއް ހަނގުރާމަވެރިން
ސޫދާނުގެ އިދިކޮޅު ހަނގުރާމަވެރި ޖަމާޢަތަކުން ރަހީނު ކޮށްފައި ތިބި 127 މީހަކު މިނިވަން ކޮށްފިއެވެ.
ސޫދާން ޕީޕަލްސް ލިބަރޭޝަން މޫވްމަންޓްގެ އިރުމަތީ ގޮފިން މިނިވަން ކުރި މީހުންގެ ތެރޭގައި ހިމެނެނީ ސޫދާނު އަސްކަރިއްޔާގެ 109 ސިފައިންނާއި އާންމުންގެ 18 މީހުންނެވެ. މި ރަހީނުން މިނިވަން ކުރުމާއި ގުޅިގެން، ސޫދާނު އަސްކަރިއްޔާގެ ތަރުޖަމާނު، ބްރިގޭޑިއަރ އަޙުމަދު ޚަލީފާ އަލް ޝާމީ ވިދާޅުވީ، ސޫދާނުގެ އަސްކަރިއްޔާއިން ދެކެނީ މިއީ ސުލްޙައާއި ގާތަށް އެޅުނު ފިޔަވަޅެއްގެ ގޮތުގައި ކަމަށެވެ.
އާދީއްތަ ދުވަހު މިނިވަންކޮށްފައިވާ ރަހީނުންނަކީ ކޮން އިރަކު ރަހީނު ކުރި ބައެއްކަން އަދި ޔަޤީން ނުވި ނަމަވެސް މި މީހުންނަކީ ސޫދާން ޕީޕަލްސް ލިބަރޭޝަން މޫވްމަންޓްގެ އިރުމަތީ ގޮފިން އާންމުކޮށް ހަނގުރާމަކުރާ އަޒްރަގު ކޯރުގެ އައްސޭރިއާއި ދެކުނު ކުރްދުފާން ސަރަޙައްދުން ރަހީނު ކޮށްފައިވާ ބައެއްކަން ސޫދާނުގެ އަސްކަރިއްޔާއިން ވަނީ ޔަޤީންކޮށްދީފައެވެ.
އަޒްރަގު ކޯރުގެ އައްސޭރިއާއި ދެކުނު ކުރްދުފާންއަކީ، ސޫދާން ދެބަޔަކަށް ބަހައި، 2011 ވަނަ އަހަރު އުތުރާއި ދެކުނު ސުދާނެގ ނަމުގައި ދެ ޤައުމެއް އުފެއްދިއިރު، ދެކުނު ސޫދާނާއި ގުޅެން ބޭނުންވި ނަމަވެސް، އެ ފުރުޞަތު ދީފައި ނުވާ ދެ ސަރަޙައްދެވެ.
ދެކުނު ސޫދާންގައި ހަރަކާތްތެރިވާ ސޫދާން ޕީޕަލްސް ލިބަރޭޝަން މޫވްމަންޓްގެ އިރުމަތީ ގޮފި އުފައްދައި އުތުރު ސޫދާންގައި އެ ޤައުމުގެ ސަރުކާރާއި ދެކޮޅަށް ހަނގުރާމަ ކުރަން ފެށީ ދެ ޤައުމު ބެހުމުގައި އުފެދުނު މި ކޯޅުމަށްފަހުއެވެ.
އަދި މި ކޯޅުމާއި ހަނގުރާމައިގެ ތެރޭގައި ދެ ސޫދާނެގ ދެމެދުގައި ތާށިވި އަޒްރަގު ކޯރުގެ އައްސޭރިއާއި ދެކުނު ކުރްދުފާންއަށް ދިއުން އިންސާނީ އެހީދޭ ފަރާތްތަކަށް މަނާކޮށްފައިވާއިރު، އދ އިން ލަފާކުރާ ގޮތުގައި އިންސާނީ އެހީއަށް ބޭނުން ޖެހިފައިވާ އެތައް ހާސް މީހުންނެއް ވަނީ އެ ދެ ސަރަޙައްދުގައި ތާށިވެފައެވެ.
