ރޫނީ އަނެއްކާވެސް ތާރީހުގެ ތެރެއަށް

ހޯމަ ދުވަހުގެ ރޭ މެންޗެސްޓާ ސިޓީއާއި ދެކޮޅަށް ކުޅުނު މެޗުގައި ކާމިޔާބު ކުރި ލަނޑާއިއެކު ވޭން ރޫނީ އަނެއްކާވެސް ރިކޯޑު ފޮތްތަކުން ޖާގަ ހޯދައިފިއެވެ.

ރޫނީ މެންޗެސްޓާ ސިޓީއާއި ދެކޮޅަށް ކާމިޔާބު ކުރި ލަނޑަކީ އޭނާ ޕްރިމިއާ ލީގުގައި މިހާތަނަށް ކާމިޔާބުކުރި 200 ވަނަ ލަނޑެވެ. މީގެ ކުރިން ޕްރިމިއާ ލީގުގައި 200 ލަނޑު ކާމިޔާބު ކޮށްފައިވާ ހަމަ އެކަނި ކުޅުންތެރިޔަކީ އަލަން ޝިއަރާއެވެ.

ޝިއަރާއަކީ މިހާތަނަށް ޕްރިމިއާ ލީގުގައި އެންމެ ގިނަ ގޯލު ކާމިޔާބު ކުރި ކުޅުންތެރިޔާއެވެ. ބްލެކްބާން ރޯވާސްއާއި ނިއުކާސަލް ޔުނައިޓެޑަށް ކުޅުނު 441 މެޗުގައި ޝިއަރާވަނީ 260 ލަނޑު ޖަހާފައެވެ.

ޝިއަރާވަނީ ޓުވިޓާރ މެދުވެރިކޮށް ރޫނީއަށް މަރުހަބާ ކިޔާފައެވެ. މެޗަށް ފަހު ވާހަކަ ދައްކަމުން ރޫނީ ބުނެފައިވަނީ ޕްރިމިއާ ލީގުގައި 200 ލަނޑު ޖެހުމުން ވަރަށް އުފާވާ ކަމަށާއި ޝިއަރާގެ ރިކޯޑު މުގުރާލުމަށް އޭނާ މަސައްކަތްކުރާނެ ކަމަށެވެ.

އެވަޓަންގެ ކޯޗު ރޮނާލްޑް ކޯމަން ވެސް ވަނީ ރޫނީއަށް މަރުހަބާ ކިޔާފައެވެ. އެގޮތުން އޭނާ ބުނެފައިވަނީ ރޫނީއަކީ ތަޖުރިބާ ހުރި މޮޅު ކުޅުންތެރިޔެއް ކަމަށާއި 200 ލަނޑު ޖެހުމަކީ ވަރަށް ހުނަރުވެރި ކުޅުންތެރިޔަކަށް ނޫނީ ނުވާނެ ކަމެއްކަމަށެވެ.

މިހާތަނަށް ޕްރިމިއާ ލީގުގައި ދެވަނައަށް އެންމެ ގިނަ ލަނޑު ކާމިޔާބުކުރި ކުޅުންތެރިޔަކީ ރޫނީއެވެ. އޭނާ ވަނީ މިހާތަނަށް މެންޗެސްޓާރ ޔުނައިޓެޑާއި އެވަޓަންއަށް ކުޅުނު 462 މެޗުގައި 200 ލަނޑު ކާމިޔާބު ކޮށްދީފައެވެ.