މޮރީނިއޯ ޕްރެމިއަރ ލީގުގެ ތާރީޚުގެ ތެރެއަށް!

އިނގިރޭސި ލީގުގައި އާދިއްތަ ދުވަހުގެ ރޭ ޗެލްސީގެ މައްޗަށް ހޯދި މޮޅާއެކު ޕްރިމިއަރ ލީގުގައި މިހާތަނަށް އޭނާ ކޯޗުކޮށްދިން ޓީމަކާ ދެކޮޅަށް ނުކުތް ކޮންމެ ޓީމެއް ވެސް މަދުވެގެން އެއްފަހަރު ބަލިކުރުމުގެ ރެކޯޑް ހޯސޭ މޮރީނިއޯ ހަދައިފިއެވެ.

ޗެލްސީގެ އެއް ނަންބަރު ކޯޗަކީ އަދި ވެސް އޭނާ ކަމަށް ބުނަމުންގެންދާ މޮރީނިއޯ އިނގިރޭސި ލީގުގައި އޭނާއާ ދެކޮޅަށް ނުކުތް 34 ޓީމް ބަލިކުރުމުގެ ރެކޯޑް ހެދި މެޗުން ޗެލްސީ ބަލިކުރީ 0-2ގެ ނަތީޖާއަކުންނެވެ.

ޗެލްސީގައި ކާމިޔާބު އަހަރުތަކެއް ހޭދަކުރުމަށް ފަހު ޔުނައިޓެޑާއި މޮރީނިއޯ ގުޅުނީ ވެންހާލް އެ މަޤާމުން ދުރުކުރުމުންނެވެ.

ޔުނައިޓެޑާ ހަވާލުވުމުން އެތައް ބައެއްގެ ފާޑުކިނ އަމާޒްވި ނަމަވެސް މޮރީނިއޯ ވަނީ މިހާތަނަށް ޕްރިމިއާ ލީގުގައި ވާދަކުރި 34 ޓީމް މަދުވެގެން އެއްފަހަރު ބަލިކޮށްފައެވެ.

އިނގިރޭސި ފުޓްބޯޅައިގެ ބޮޑު ބާރެއް ކަމަށްވާ މެންޗެސްޓަރ ޔުނައިޓެޑްގެ ކޯޗުކަމާ މޮރީނިއޯ ހަވާލުވުމުން އެންމެ ބޮޑަށް އޭނާއަށް ފާޑުކިޔުން އަމާޒްވީ ޗެލްސީގެ ސަޕޯޓަރުންގެ ފަރާތުންނެވެ.

މޮރީނިއޯ ވަނީ މީގެ ކުރިން ޗެލްސީގެ ސަޕޯޓަރުންގެ ފާޑު ކިޔުންތަކަށް ރައްދުދިނުމުގެ ގޮތުން ޗެލްސީގެ އެއް ނަންބަރު ކޯޗަކީ އަދިވެސް އޭނާ ކަމަށް ބުނެފައެވެ. މޮރީނިއޯ މިހެން ބުނެފައި ވަނީ އިނގިރޭސި އެފްއޭކަޕްގެ ކުއާޓަރ ފައިނަލްގައި މެންޗެސްޓަރ ޔުނައިޓެޑާއި ޗެލްސީ ބައްދަލުކުރި މެޗުގައި ޗެލްސީގެ ސަޕޯޓަރުން އޭނާއަށް ފާޑުކިޔައި އަޑުގަދަކޮށް ހެދުމުންނެވެ.

މެޗަށް ފަހު މޮރީނިއޯ ބުނެފައިވަނީ ޗެލްސީގެ އެއް ވަނަ ކޯޗަކީ އަދިވެސް އޭނާ ކަމަށެވެ. އަދި އެހެން ކޯޗެއް ޗެލްސީ އަށް ހަތަރު ލީގު ހޯދައިނުދޭހާ ހިނދަކު އޭނާ މަޤާމު ނުގެއްލޭނެ ކަމަށް އޭނާ ބުންޏެވެ.