ލިވަޕޫލަށް ކުރިން ކުޅުނު ލެޖެންޑް ސްޓީވެން ޖެރާޑް ލިވަޕޫލް ޖޯޒީގައި ރަހްމަތްތެރިކަމުގެ މެޗެއް ކުޅޭ ގޮތަށް ހަމަޖެހިއްޖެއެވެ.

އަންނަ މޭއި މަހު އޮސްޓްރޭލިއާގައި ކުޅޭ މި މެޗުގައި ލިވަޕޫލް ޖޯޒީގައި ޖެރާޑް ފެންނާނެކަން ހާމަކޮށްފައިވާއިރު، ލިވަޕޫލާ އިދިކޮޅަށް ނިކުންނާނީ އޭ ލީގްގެ ސިޑްނީ އެފްސީ އެވެ.

ސިޑްނީ އެފްސީގެ 12 ވަނަ އަހަރީ ދުވަސް ފާހަގަކުރުމުގެ ގޮތުން ކުޅޭ މި މެޗުގައި ޖެރާޑްގެ އިތުރުން ލިވަޕޫލްގެ ތަރިން ކަމަށްވާ ޖެމީ ކަރޭގާ، ޑެނިއަލް އެގާ އަދި ސްޓީވް މެކްމާނަމަން ވެސް ލިވަޕޫލް ޖޯޒީގައި ފެނިގެންދާނެ އެވެ.

މިދިޔަ އަހަރުގެ ނޮވެމްބަރު މަހު ޕްރޮފެޝަނަލް ފުޓުބޯޅަ ކުޅުން ހުއްޓާލި ލިވަޕޫލްގެ 18 އަހަރުން ދަށުގެ ޓީމާ ޖެރާޑް ހަވާލުވާން އުޅޭ ކަމަށް ދަނީ އަޑުތައް ފެތުރެމުންނެވެ. އެހެންނަމަވެސް މިކަން އަދި އެއްވެސް ފަރާތަކުން ކަށަވަރުކޮށްނުދެއެވެ.

ލިވަޕޫލް ޖޯޒީގައި ކުޅޭ މެޗާ ބެހޭ ގޮތުން ޖެރާޑް ބުނި އަނެއްކާވެސް ލިވަޕޫލް ޖޯޒީގައި މެޗެއް ކުޅެން ފުރުސަތު ލިބުމުން އުފާވާ ކަމަށާއި، ހާއްސަކޮށް ވަރުގަދަ ސްކޮޑަކާއެކު ކުޅެން ލިބުމަކީ ވެސް އުފަލެއް ކަމަށެވެ.

ލިވަޕޫލަށް ކުޅުނު 700 އަށްވުރެ ގިނަ މެޗުގައި 186 ލަނޑު ކާމިޔާބުކޮށްފައިވާ ޖެރާޑް ވަނީ އެ ކްލަބާއެކު ތިން ފުޓްބޯލް ލީގް ކަޕް، ދެ އެފްއޭކަޕް، ޔުއެފާ ޗެމްޕިއަންސް ލީގު، ޔުއެފާ ކަޕް، ޔުއެފާ ސުޕާ ކަޕް އަދި އެފްއޭ ކޮމިއުނިޓީ ޝިލްޑް ކާމިޔާބުކޮށްފަ އެވެ.

ޖެރާޑް އޭނާގެ ކެރިޔަރު ނިންމާލާފައި ވަނީ އެމެރިކާގެ އެލްއޭ ގެލެކްސީގަ އެވެ. އެގޮތުން އޭނާ ވަނީ އެ ކްލަބަށް ކުޅުނު 38 މެޗުގައި ފަސް ލަނޑު ކާމިޔާބުކޮށްފައެވެ.