ޖަރުމަނުގެ ޓާ ހޯދުމަށް ބާސެލޯނާ އިން މަސައްކަތް ކުރަނީ

ބަޔާ ލެވަކޫސަން އަށް ކުޅެމުން އަންނަ ޖަރުމަނުގެ ޑިފެންޑަރު ޖޮނަތަން ޓާ ހޯދުމުގެ މަސައްކަތް، ސްޕެއިންގެ ބާސެލޯނާ އިން ކުރަމުން އަންނަ ކަމަށް މީޑިއާ ރިޕޯޓުތައް ބުނެފި އެވެ.

ހެމްބާގާ ދޫކޮށްލުމަށް ފަހު، އުމުރުން 28 އަހަރުގެ ޓާ ލެވަކޫސަން އަށް ބަދަލުވީ 2015 ވަނަ އަހަރު އެވެ. އެ ކުލަބާ އެކު އޭނާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް އޭނާގެ އެއްބަސްވުން އައު ކުރުމާ މެދު މިހާތަނަށް ލެވަކޫސަން އިން ވަކި ނިންމުމެއް ނުނިންމާ ކަމަށް ރިޕޯޓުތަކުގައި ވަނީ ބުނެފަ އެވެ.

މީޑިއާ ތަކުގައި ބުނެފައިވާ ގޮތުން ބާސެލޯނާ އިން އަންނަނީ އޭނާ ހޯދުމުގެ މަސައްކަތް ކުރަމުންނެވެ. އެގޮތުން އަންނަ އަހަރު އޭނާގެ އެއްބަަސްވުމުގެ މުއްދަތު ހަމަވުމުން، ހިލޭ ޓްރާންސްފާއެއްގައި އޭނާ ހޯދުމަށް ބާސެލޯނާ އިން މަސައްކަތް ކުރަމުން އަންނަ ކަމަށް ވެސް ވަނީ ބުނެފަ އެވެ. ބާސެލޯނާގެ އިތުރުން ޓާ ހޯދުމުގެ ޝައުޤުވެރިކަން ޖަރުމަނުގެ ބަޔާން މިއުނިކުން ގެންގުޅޭ ކަމަށާއި، ނަމަވެސް އޭނާ ހޯދުމުގެ ރޭހުގެ ކުރީގައި އުޅެނީ ބާސެލޯނާ ކަމަށް ވެސް ވަނީ ބުނެފަ އެވެ.

އެގޮތުން ބާސެލޯނާގެ ސްޕޯޓިން ޑައިރެކްޓަރު ޑެކޯ އާއި ޓާގެ އެޖެންޓު ޕިނީ ޒަހަވީއާ ދެމެދު ކާމިޔާބު މަޝްވަރާތަކެއް ކުރެވެމުން އަންނަ ކަމަށް ވެސް ރިޕޯޓުތަކުގައި ވަނީ ބުނެފަ އެވެ. މީގެ އިތުރުން ޒަހަވީ އަކީ ބާސެލޯނާގެ ކޯޗު ހަންސީ ފްލިކްގެ އެޖެންޓު ކަމަށްވާއިރު، ޓާ ހޯދުމުގައި ބާސެލޯނާ އިން ކުރި ހޯދާނެ ކަމަށް ބެލެވޭ ކަމަށް ރިޕޯޓުތައް ބުނެ އެވެ.

ޓާ ވަނީ މިހާތަނަށް ލެވަކޫސަން އަށް ކުޅެދިން 376 މެޗުގައި 16 ލަނޑު ޖަހައިފަ އެވެ. ލެވަކޫސަން އާއެކު އޭނާ ވަނީ ޖަރުމަނު ލީގު، ޖަރުމަނު ކަޕް އަދި ޖަރުމަނު ސުޕަ ކަޕް ކާމިޔާބު ކޮށްފަ އެވެ. އޭނާ އަންނަނީ 2016 ވަނަ އަހަރުން ފެށިގެން ޖަރުމަނުގެ ޤައުމީ ޓީމަށް ވެސް ކުޅެމުންނެވެ.