އެލްޗޭ ބަލިކޮށް، ބާސެލޯނާ ދެ ވަނައިގައި

ސްޕެނިޝް ލީގުގައި އެލްޗޭއާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން ލީގު ތާވަލްގެ ދެ ވަނަ މަގާމަށް ޖެހިލައިފި އެވެ.

އާދީއްތަ ދުވަހުގެ ރޭ އެލްޗޭއާ ދެކޮޅަށް ކުޅުނު މެޗު ބާސެލޯނާ އިން ކާމިޔާބު ކުރީ 3-1 އިންނެވެ. މެޗުގެ ފުރަތަމަ ހާާފުގައި ބާސެލޯނާ އިން ދެ ލަނޑު ޖެހިއިރު، އެލްޗޭ އިން ވެސް ލަނޑެއް ޖެހި އެވެ. ދެ ވަނަ ހާފުގައި ބާސެލޯނާ އިން ވަނީ ތިން ވަނަ ލަނޑެއް ވެސް ޖަހައިފަ އެވެ.

މެޗު ފަށައިގެން ނުވަ ވަނަ މިނެޓުގައި ބާސެލޯނާ އަށް ލީޑު ނަގައިދިނީ ސްޕެއިންގެ ޒުވާން ކުޅުންތެރިޔާ ޔަމީންް ޔަމާލް އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ އަލެހާންޑްރޯ ބާލްޑޭ އެވެ. އޭގެ ދެ މިނެޓު ފަހުން ފެރާން ޓޮރޭސް ވަނީ ބާސެލޯނާގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެއީ ފާމިން ލޮޕޭޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މެޗުގެ ފުރަތަމަ ހާފުގެ ފުރިހަމަ ވަގުތު ހަަމަވާން ތިން މިނެޓަށް ވެފައި ވަނިކޮށް އެލްޗޭ އިން ވަނީ ލަނޑު ޖަހައި ފަރަގު ކުޑަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ރަފާ މިރް އެވެ. ނަމަވެސް ދެ ވަނަ ހާފުގައި ބާސެލޯނާ އިން ވަނީ ތިން ވަނަ ލަނޑެއް ޖަހައިފަ އެވެ. އެގޮތުން މެޗުގެ 61 ވަނަ މިނެޓުގައި އެ ލަނޑު ބާސެލޯނާ އަށް ޖަހައިދިނީ މާކަސް ރަޝްފޯޑު އެވެ.

މެޗަށް ފަހު ވާހަކަ ދައްކަމުން ބާސެލޯނާގެ ކޯޗު ހަންސީ ފްލިކް ބުނެފައި ވަނީ، އެ މެޗުގައި ބާސެލޯނާ އިން ރަނގަޅަށް ކުރި ވަރަށް ގިނަ ކަންތައްތައް އޭނާ އަށް ފެނުނު ކަމަށެވެ. ހަމަ އެހެންމެ، ބާސެލޯނާ އަށް ގޯސްކޮށް ކުރެވުނު ކަންކަން ވެސް ފާހަގަ ވެފައިވާ ކަމަށް ފްލިކް ބުންޏެވެ. އެ މެޗަކީ އުނދަގޫ މެޗަކަށް ވީ ނަމަވެސް، ތިން ޕޮއިންޓު ލިބުމުން ހިތްހަމަ ޖެހިފައި ހުރިކަން ފާހަގަކޮށް ފްލިކް ބުނީ، އަދި ވެސް ބާސެލޯނާ އަށް ކުރިއެރުން ތަކެއް ހޯދޭނެ ކަމަށެވެ.

މޮޅާއެކު ބާސެލޯނާ ދެ ވަނައިގައި އޮތީ މިހާތަނަށް ކުޅެފައިވާ 11 މެޗުން 25 ޕޮއިންޓާ އެކު އެވެ. ބާސެލޯނާ އާއި، އެއް ވަނައިގައި އޮތް ރެއާލް މެޑްރިޑްއާ ދެމެދު އޮތީ ފަސް ޕޮއިންޓުގެ ފަރަގެކެވެ. އެއް ވަަނައިގައި ރެއާލް އޮތީ 11 މެޗުން 30 ޕޮއިންޓާ އެކު އެވެ.