އިސްރާއީލާއި ލުބުނާނުގެ ހިޒްބުﷲ އާ ދެމެދު ހަނގުރާމަ ހުއްޓާލުމުގެ އެއްބަސްވުމެއް ވިތާ 24 ގަޑިއިރު ނުވަނީސް، ދެކުނު ލުބުނާނަށް އިސްރާއީލުން ޑްރޯން ހަމަލާއެއްދީ މަދުވެގެން 3 މީހުން ޒަޚަމްވެއްޖެކަމަށް ރިޕޯޓުތައް ބުނެފިއެވެ.

ބުރާސްފަތި ދުވަހު ދެކުނު ލުބުނާނުގެ މަރްކަބާ އަވަށުގައި އެއްގަމު އުޅަނދަކަށް އަމާޒު ކޮށް މި ހަމަލާ ދިން ކަމަށް އިސްރާއީލުގެ އާމީ ރޭޑިއޯއިން އިތުރު ތަފްސީލެއް ނުދީ ރިޕޯޓުކޮށްފައިވެއެވެ.

ހިޒްބުﷲ ގެ ހަނގުރާމަވެރިންނާއި އިޒްރޭލާ ދެމުދު 14 މަސް ދުވަހަށްވުރެ ގިނަ ދުވަހު ހިނގި ހަނގުރާމައިގައި ބޮޑެތި ގެއްލުންތަކެއް ލިބި، ލުބުނާނަށް ދެމުންދިޔަ އަނިޔާވެރި ހަމަލާތަކުގެ މަޤްޞަދުތައް ހާސިލުނުވުމާ ގުޅިގެން، އިސްރާއީލަށް މަޖުބޫރުވީ ހިޒްބުﷲ އާ ދެކޮޅަށް ކުރަމުން ދިޔަ ހަނގުރާމަ ހުއްޓާލުމަށެވެ.

ހަނގުރާމަ ހުއްޓާލުމުގެ އެއްބަސްވުން ރަސްމީކޮށް އަމަލުކުރަން ފެށުނީ ބުދަ ދުވަހުގައެވެ.

2023 ވަނަ އަހަރުގެ އޮކްޓޯބަރު މަހު އިސްރާއީލުން ޣައްޒާ ގައި ފެށި ނަސްލު ފޮހެލުމުގެ ހަނގުރާމަ ފެށުމާއެކު، ޖެހިގެން އައި ދުވަހު ހިޒްބުﷲ އިން ފަލަސްތީނުގެ ރައްޔިތުންނާ ބައިވެރިވުމުގެ ގޮތުން އިސްރާއީލަށް ގިނަ އަދަދެއްގެ ހަމަލާތައް ދީފައިވެއެވެ.

ހަނގުރާމަ ހުއްޓާލުމުގެ އެއްބަސްވުން އިއުލާންކުރުމާއެކު، ހިޒްބުﷲ އިން އިންޒާރު ދީފައިވަނީ އިސްރާއީލުން ލުބުނާނަށް އިތުރު ހަމަލާއެއް ދޭން އުޅެފިނަމަ އެކަމަށް ފުރިހަމައަށް ތައްޔާރަށް ތިބިކަމަށެވެ. އަދި ހަނގުރާމަ ހުއްޓާލުމުގެ އެއްބަސްވުމަކީ ހިޒްބުﷲ އިން ހިންގި އެތައް ހާސް ކާމިޔާބު އޮޕަރޭޝަންތަކުގެ ސަބަބުން ވެވުނު އެއްބަސްވުމެއްކަމަށް ބުނެފައިވެއެވެ.

އަނެއްކޮޅުން، ބުދަ ދުވަހުގެ އެއްބަސްވުމާއެކު ދެކުނު ލުބުނާނުގެ ރަށްވެހިން އެނބުރި އެމީހުންގެ ގެދޮރަށް ދާން ފެށުމާއެކު ބުރާސްފަތި ދުވަހު އިސްރާއީލުގެ ސިފައިންވަނީ ދެކުނު ލުބުނާނުގެ ބޯޑަރު އަވަށް ތަކުގެ ރައްޔިތުންނަށް އިންޒާރުދީ، އެމީހުންގެ ގެދޮރަށް އެނބުރި ނުދިއުމަށް އަންގާފައެވެ.

އިތުރު އެންގުމެއް އަންގަންދެން، 10 އަވަށަކާއި އޭގެ ވަށައިގެންވާ ސަރަހައްދުތަކަށް އެނބުރި ދިއުމަކީ މަނާ ކަމެއް ކަމަށް އިޒްރޭލުން އަންގާފައިވެއެވެ.

މަނާ ކޮށްފައިވާ ސަރަހައްދަށް އެނބުރިދާ ކޮންމެ މީހަކީވެސް އަމިއްލައަށް ނުރައްކަލަކަށް ހުށަހެޅޭ މީހެއް ކަމަށް ބުނެ އިސްރާއީލު ސިފައިން އިންޒާރުދީފައިވެއެވެ.