ހުޅަނގު އައްސޭރީގައި އިތުރު ގެތަށް އިޒްރޭލުން ނިންމުމުން އެކަމަށް އދ. އިން ފާޑުކިޔައިފި
މިއީ ދާއިމީ ސުލްހައަށް އެޅޭ ހުރަހެއް: ތަރުޖަމާނު
އިޒްރާއީލްގެ ބޮޑުވަޒީރު ބެންޖަމިން ނަތަންޔާހޫ
އިޒްރާއީލްގެ ސަރުކާރުން ހުޅަނގު އައްސޭރީގައި އިތުރު ގެތަށް އިމާރާތްކުރުމަށް ނިންމާފައިވާ ނިންމުމަށް އދ އިން ފާޑުކިޔައިފި އެވެ.
އދ. ގެ ސެކެޓްރީ ޖެނެރަލް އެންޓޯނިއޯ ގުޓެރެޒްގެ ތަރުޖަމާނު ސްޓެފާން ޑުޖާރިކް ވިދާޅުވީ އިޒްރާއީލްގެ ސަރުކާރުން އަޅާ މިފަދަ ފިޔަވަޅުތަކުގެ ސަބަބުން ސުލްހައަށް އިތުރު ހުރަހެއް އެޅިގެންދާ ކަމަށެވެ. އަދި، އިޒްރާއީލް ސަރުކާރުން އަމިއްލައަށް ނަގާ މިފަދަ ނިންމުންތަކުގެ ސަބަބުން ފަލަސްތީނުގެ މިނިވަން ދައުލަތެއް ގާއިމްކުރުމަށް ކުރިއަށްދާ މަސައްކަތްތަކަށްވެސް ބުރޫ އަރާ ކަމަށެވެ.
ފަލަސްތީނުގެ މައްސަލަ ހައްލުކުރުމަށް ދެވަނަ ޕްލޭނެއް ނެތް ކަމަށާއި އިޒްރާއީލްގެ ނިންމުންތަކަކީ ކަންބޮޑުވާ ނިންމުންތަކެއް ކަމަށް ވެސް އޭނާ ވިދާޅުވި އެވެ.
ހުޅަނގު އައްސޭރީގައި އިތުރު 2،500 ގެ އިމާރާތްކުރުމަށް ނިންމާފައިވާ ކަމަށް އިޒްރާއީލްގެ ބޮޑު ވަޒީރު ބެންޖަމިން ނަތަންޔާހޫ އިއުލާން ކުރައްވާފައި ވަނީ އަންގާރަ ދުވަހު އެވެ.
އިޒްރާއީލްގެ މި ނިންމުމަށް އެމެރިކާ އިން ތާއީދުކުރާނޭ ކަމަށް ގިނަ ފަރާތްތަކުން އެއްބަސްވެފައިވެ އެވެ. މިއީ ރައީސް ޑޮނާލްޑް ޓްރަމްޕް މަގާމާއި ހަވާލުވެވަޑައިގަތުމަށްފަހު އިޒްރޭލުން މިގޮތަށް އިއުލާންކުރި ދެވަނަ ފަހަރެވެ. އަދި، އިޒްރޭލްގެ ނިންމުންތަކަށް ތާއީދުކޮށް، އެހީތެރި ވާނޭ ކަމުގެ އިޝާރާތެއް ވެސް ޓްރަމްޕް ވަނީ ކުރައްވާފަ އެވެ.
