މާޒިޔާގެ ފަރިތަކުރުންތައް ފަށައިފި
މާޒިޔާ އަކީ ފުޓުބޯޅަ ސީޒަނަށް ތައްޔާރުވުމުގެ ގޮތުން މިހާތަނަށް ފަރިތަކުރުންތައް ފެށި ހަމައެކަނި ކުލަބެވެ.
މާޒިޔާ އިން ކުރިއަށް ގެންދިޔަ ފަރިތަކުރުމުގެ ތެރެއިން
ރާއްޖޭގެ އެންމެ ފަހުގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަންގެ ފަރިތަކުރުންތައް ފަށައިފި އެވެ.
މާޒިޔާ އިން އެ ޓީމުގެ ފަރިތަކުރުންތައް ފަށާފައި ވަނީ، އަންނަ އަހަރު ރާއްޖޭގެ ފުޓުބޯޅަ ސީޒަން ފެށުމުގެ މަސައްކަތް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ނޯމަލައިޒިން ކޮމެޓީން ފަށާފައި ވަނިކޮށެވެ. އެގޮތުން އެ ކޮމެޓީން މަސައްކަތް ކުރަމުން އަންނަނީ ޖަނަވަރީ މަހުގެ ތެރޭގައި ރާއްޖޭގެ ފުޓުބޯޅަ ސީޒަން ފެށުމަށެވެ.
އެފްއޭއެމްގެ ނޯމަލައިޒިން ކޮމެޓީގެ ޗެއާމަން އަޙުމަދު ޒުހޫރު މީގެ ކުރިން "ރާއްޖެ އެމްވީ" އަށް ވިދާޅުވެފައި ވަނީ ޖަނަވަރީ މަހުގެ 24 ވަަނަ ދުވަހު ސީޒަން ހުޅުވާ މެޗު ކުޅުމަށް ތާވަލްކޮށްފައިވާނެ ކަމަށެވެ. އަދި އެކަންކަމުގެ ތަފްސީލުތައް މިހާރު ކުލަބުތަކާ ހިއްސާކޮށްފައިވާނެ ކަމަށާއި، ރާްއްޖޭގެ ލީގު ފަށަން މަސައްކަތް ކުރަމުން އަންނަނީ ފެބްރުވަރީ މަހުގެ 25 ވަނަ ދުވަހު ކަމަށެވެ. ޒުހޫރު ވިދާޅުވީ ސީޒަން ފެށުން ލަސް ކުރުމަށް ބައެއް ކުލަބުތަކުން އެދެމުން އަންނަ ކަމަށާއި، އެހެން އެދެނީ ކުލަބުތަކަށް ދިމާވެފައިވާ މާލީ މައްސަލައިގެ ސަބަބުން ކަމަށެވެ.
މާޒިޔާގެ ފަރިތަކުރުންތައް އެ ޓީމުގެ ކޯޗު ޑްރަގަން ޑުކަނޯވިޗްގެ އިރުޝާދުގެ ދަށުން ބުދަ ދުވަހު ފަށާފައިވާއިރު، މާޒިޔާ އަކީ ފުޓުބޯޅަ ސީޒަނަށް ތައްޔާރުވުމުގެ ގޮތުން މިހާތަނަށް ފަރިތަކުރުންތައް ފެށި ހަމައެކަނި ކުލަބެވެ.
