އަންހެން ވޮލީ މުބާރާތުގެ ޓިކެޓް ވިއްކަން ފަށައިފި

މާދަމާ ފެށުމަށް ހަމަޖެހިފައިވާ ވުމަންސް ވޯލްޑް ޗެމްޕިއަންޝިޕް ސެންޓްރަލް ޒޯންގެ ކޮލިފިކޭޝަން ވޮލީ މުބާރާތުގެ ޓިކެޓް ވިއްކަން ފަށައިފި އެވެ.

ވޮލީބޯލް އެސޯސިއެޝަނުން ބުނީ، މިމުބާރާތުގެ މެޗުތަކުގެ ޓިކެޓް ވިއްކުމަށް ހަމަޖެހިފައި ވަނީ 50 ރުފިޔާ އަށް ކަމަށާއި ޓިކެޓް ވިއްކަމުންދާނީ ސޯޝަލް ސެންޓަރުން ކަމަށެވެ.

މިމުބާރާތުގައި ވާދަކުރާ އީރާން އަދި ނޭޕާލްގެ ވޮލީ ޓީމުތައް މާލެ އައިސްފައިވާ އިރު، މިއަދު ވަނީ ޓީމުތަކުގެ ފަރިތަކުރުންތައް ވެސް ކުރިއަށް ގެންގޮސްފަ އެވެ.

މީގެ އިތުރުން މުބާރާތް ކުރިއަށް ގެންދިއުމަށްޓަކައި ޒުވާނުންގެ މަރުކަޒު އެތެރޭ ކޯޓު ވަނީ ރަނގަޅު ފެންވަރަކަށް މަރާމާތުކޮށްފަ އެވެ. ހަމަ އެއާއެކު ޗޭންޖިން ރޫމުތައް ވެސް ޒަމާނީ ފެންވަރަކަށް ނިންމުމަށް އެންމެ ފަހުގެ މަސައްކަތްތައް ކުރެވެމުންދާ ކަމަށް ވެސް ވީއޭއެމުން މައުލޫމާތުދެ އެވެ.

މި މިމުބާރާތަކީ 2018 ވަނަ އަހަރު އޮންނަ ވުމެންސް ވޯލްޑް ޗެންޕިއަންޝިޕްގައި ވާދަކުރާ އޭޝިއާ ސަރަހައްދުގެ ޓީމެއް ކަނޑައެޅުމަށް ބާއްވާ ކޮލިފިކޭޝަން ބުރެވެ.

މިމުބާރާތުގެ ފުރަތަމަ މެޗުގައި މާދަމާ ރާއްޖެއާއި ނޭޕާލް ބައްދަލުކުރާއިރު، މުބާރާތުގެ ދެ ވަނަ މެޗުގައި އަންނަ ހޮނިހިރު ދުވަހު ބައްދަލުކުރާނީ ނޭޕާލްއާއި އީރާނެވެ. އަދި އަންނަ އާދިއްތަ ދުވަހު ކުޅޭ މެޗުގައި ބައްދަލުކުރާނީ ރާއްޖެއާއި އީރާނެވެ. މިމުބާރާތުގެ މެޗުތައް ކުޅުމަށް ހަމަޖެހިފައި ވަނީ ޒުވާނުންގެ މަރުކަޒު އިންޑޯ ހޯލުގައި ކޮންމެ ދުވަހަކުވެސް ހަވީރު 5:00 ގައެވެ. މިއީ ބައިނަލްއަގުވާމީ ވޮލީމުބާރާތެއް ރާއްޖޭގައި ބާއްވާ ފުރަތަމަ ފަހަރެވެ.