ބުދަ ދުވަހު ހަވީރު، ޣައްޒާ ސްޓްރިޕްގެ އުތުރުގައިވާ ބައިތު ލަހިޔާ އަދި ދެކުނުގައިވާ ޚާން ޔޫނިސް އަށް ބޮން އެޅުމުގެ ސަބަބުން  މާބަނޑު އަންހެނަކާއި ފަލަސްތީނުގެ އިތުރު ދެ މީހުން ޝަހީދުވެއްޖެއެވެ.

ވަފާ ނިއުސް އިން ބުނިގޮތުގައި ބަނޑަށް ތިން މަހުގެ އަންހެނަކު ޝަހީދުވީ އިސްރާއީލުން ބައިތް ލަހިޔާގެ ތާލް އަލް-ޒައާތަރު ސަރަހައްދަށް ދިން ހަމަލާގައެވެ. އެ ހަމަލާގައި މަދުވެގެން ފަސް އާންމުން ޒަޚަމްވެފައިވެއެވެ.

އޮކްޓޯބަރު 7 އިން ފެށިގެން އިސްރާއީލުން ގެންދަނީ ޣައްޒާ ގައި ފަލަސްތީނު ރައްޔިތުންނާ ދެކޮޅަށް ނަސްލު ނައްތާލުމުގެ ނުރައްކާތެރި ހަނގުރާމައެއް ކުރަމުންނެވެ. ހަނގުރާމައިގައި މިހާތަނަށް މަދުވެގެން 44،282 ފަލަސްތީނު މީހުން މަރުވެ، 104،880 މީހުން ޒަޚަމްވެފައިވެއެވެ.

މީގެ އިތުރުން، މަދުވެގެން 10،000 މީހުން ވަނީ ގެއްލިފައެވެ. އެމީހުން ވަނީ އިމާރާތްތަކުގެ ދަށުގައި މަރުވެފައިކަމަށް ލަފާކުރެވެއެވެ.

ފަލަސްތީނުގެ އަދި ބައިނަލްއަޤްވާމީ ޖަމްޢިއްޔާތަކުން ބުނާގޮތުގައި މަރުވި ނުވަތަ އަނިޔާވެފައިވާ މީހުންގެ ގިނަ އަދަދަކީ އަންހެނުންނާއި ކުޑަކުދިންނެވެ.

އިސްރާއީލުގެ އަނިޔާވެރި ހަމަލާތަކުގެ ސަބަބުން ޣައްޒާ ސްޓްރިޕްގެ ހުރިހާ ކަންކޮޅަކުން ގާތްގަނޑަކަށް ދެ މިލިއަން މީހުން ވަނީ މަޖުބޫރުން ގެދޮރު ދޫކޮށް ހިޖުރަކޮށްފައެވެ. ހިޖުރަކުރި މީހުންގެ ބޮޑު ބައި ތޮއްޖެހިފައިވަނީ މިސްރާއި ޣައްޒާގެ ބޯޑަރުގައިވާ ރަފަހް ސިޓީއަށެވެ.