މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގެ ބޯޑަށް ކުރިމަތިލުމަށް ހުޅުވާލި ފުރުސަތުގައި ކުރިމަތިލި މީހުންގެ ތެރެއިން ޕީއެންސީގެ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީގެ ދަރިކަލުން މުހައްމަދު އިމްތިނާން ސައުދުﷲ އަށް ރައީސް ޑރ. މުހައްމަދު މުއިއްޒު އިސްކަންދެއްވައިފިއެވެ.

ރައީސް ޑރ. މުހައްމަދު މުއިއްޒު މަޖިލީހަށް ފޮނުއްވި ސިޓީގައި ވިދާޅުވެފައިވަނީ މީރާގެ ބޯޑުގެ 4 މެންބަރުންގެ މެންބަރުކަމުގެ މުއްދަތު، 31 އޮގަސްޓް 2025 އަށް ހަމަވާތީ، ޓެކްސް ނެގުމާއި ބެހޭ އިދާރީ ގާނޫނުގެ 4 ވަނަ މާއްދާގެ (ބ) ގެ 2 ވަނަ ނަންބަރުގައިވާ ގޮތުގެމަތިން މީރާގެ ބޯޑަށް 4 މެންބަރުން އައްޔަންކުރުމަށްޓަކައި އާންމުކޮށް އިއުލާންކުރުމުން އެކަމަށް އިޖާބަދެއްވި ބޭފުޅުންގެ ނަންފުޅުތަކާއި މައުލޫމާތު އަދި އެމަނިކުފާނު އިސްކަންދެއްވާ ތަރުތީބު ފޮނުއްވާ ކަމަށެވެ.

ރައީސް އިސްކަންދެއްވި ތަރުތީބުގައި އެއްވަނައިގައި ވަނީ ޕީއެންސީގެ ތިނަދޫ އުތުރު ދާއިރާގެ މެންބަރު ސައުދުﷲ ހިލްމީގެ ދަރިކަލުން މުހައްމަދު އިމްތިނާން ސައުދުﷲއެވެ. ދެވަނައަށް އިނީ ހ. ސިތާރާވާދީ އިސްމާއިލް ހަމްދޫނެވެ. 3 ވަނައިގައި އިނީ ގދ. ގައްދޫ / ނިވައިދޮށުގެ އައިޝަތް ޝަޒްރާއެވެ. އަދި ހަތަރުވަނައިގައި އިނީ މ. ޖަވާހިރުވާދީ އިދުހާމް ހުސައިންއެވެ.

މީގެ އިތުރުން އުމަރު އަހުމަދު ހުސައިން މ. ސުހްރާ، މުހައްމަދު އަހުމަދު ދަފްތަރު ނަންބަރު ރސ 5204، ހދ. ހަނިމާދޫ / މުރިނގު މުމްތާޒް އަބްދުއްރަޝީދު އަދި ސ. މީދޫ / އުއިގަސްދޮށުގެ މަރްޔަމް ޖުވައިރިއްޔާ ހިމެނެއެވެ.