ޣައްޒާ، ލުބްނާނު، ސީރިޔާ އަށް އިޒްރޭލުން ބޮން އަޅާ އެތައް ބަޔަކު މަރާލައިފި

ޣައްޒާގެ އުތުރުގައިވާ ޖަބާލިޔާގައި އިޒްރޭލުގެ ބާރުތަކުން ދިން ހަމަލާއެއްގައި 36 މީހުން މަރާލުމާއި، ލުބްނާނުގެ ވެރިރަށް ބެއިރޫތުގެ އުތުރުގައިވާ އަލްމާޓް އަވަށަށް ދިން ހަމަލާގައި 23 މީހުން މަރާލުމާ ގުޅިގެން ފަލަސްޠީނުގެ އަދި ލުބްނާނުގައި މަރުވި މީހުންގެ އާއިލާތަކުން ގެންދަނީ ހިތާމަ ފާޅުކުރަމުންނެވެ.

ޣައްޒާގެ ރައްޔިތުންނަށް ހުއްޓުމެއް ނެތި އިޒްރޭލުން އަނިޔާވެރި މަރުގެ ހަމަލާތައް ދެމުންދާތާ 400 ދުވަސް ހަމަވި ދުވަހު ޖަބާލިޔާ އަށް މި ދިން ހަމަލާއަކީ ކުރިން އެއްވެސް އިންޒާރެއް ދިނުމަކާ ނުލާ ކުއްލިއަކަށް ދިން ވަރުގަދަ ހަމަލާއެއް ކަމަށާއި، ހަމަލާގެ ބާރު ގަދަ ކަމާއެކު މީހުންގެ ހަށިތައް ކުދިކުދި ވެގެން ދިޔަ ކަމަށް އަލް ޖަޒީރާ އިން ރިޕޯޓުކޮށްފައިވެއެވެ.

ޖަބާލިޔާގެ ވަޒަންވެރިން ހަމަލާ އަށް ފަހު ބުނީ، އެއްވެސް ފަރާތަކުން އެހީ އެއް ލިބުމަށް އުއްމީދު ނުކުރާ ކަމުގައެވެ.

ޣައްޒާގެ މެޑިކަލް ވަސީލަތްތަކުން ބުނިގޮތުގައި އާދީއްތަ ދުވަހު އިޒްރޭލުގެ ބާރުތަކުން ޣައްޒާގެ އެކި ސަރަހައްދުތަކަށް ދިން ހަމަލާތަކުގައި މަދުވެގެން 49 ފަލަސްޠީނު މީހުންގެ ފުރާނަ ވަނީ ގެއްލިފައެވެ. އެއާއެކު ލުބުނާނުގައި، އެދުވަހު އިޒްރޭލުގެ ހަމަލާތަކުގައި މަރުވި މީހުންގެ އަދަދު 38 ށް އަރާފައިވާ ކަމަށް ސިއްޙީ ވުޒާރާއިން ބުންޏެވެ.

އަނެއްކޮޅުން، އިޒްރޭލުގެ ބާރުތަކުން ސީރިއާގެ ވެރިރަށް ދިމިސްގަށް ވެސް ބޮންއެޅިއެވެ. އިޒްރޭލުން އާންމުން ދިރިއުޅޭ އިމާރާތަކަށް ހަމަލާދީ މަދުވެގެން 7 މީހުން މަރާލިކަމަށް ސީރިއާގެ ދިފާއީ ވުޒާރާއިން ބުންޏެވެ.

އޮކްޓޯބަރ 7، 2023 އިން ފެށިގެން ޣައްޒާގައި އިޒްރޭލުން ހިންގަމުންދާ ނަސްލު ނައްތާލުމުގެ ހަނގުރާމައިގައި މަދުވެގެން 43،603 ފަލަސްޠީނުން މަރުވެ، 102،929 މީހުން ޒަޚަމްވެފައިވެއެވެ.

ޣައްޒާ ގައި ހަނގުރާމަ ފެށި ފަހުން ލުބްނާނަށް އިޒްރޭލުން ދިން ހަމަލާތަކުގައި މަދުވެގެން 3،189 މީހުން މަރުވެ، 14،078 މީހުން ޒަޚަމްވެފައިވެއެވެ.