ޤަތަރުގެ 2400 ހައްޖާޖީންނަށް 4000 މީޓަރުގެ ސަރަހައްދެއް ސައޫދީން ޚާއްޞަ ކޮށްފި

ސައޫދީ އަރަބިއްޔާއާއި ގުޅިފައިވާ ބައެއް ޢަރަބި ޤައުމުތަކުން ގުޅުން ކަނޑާލާފައިވާ ޤަތަރުން މިއަހަރު ހައްޖަށްދާ 2400 ހައްޖާޖީންނަށް 4000 ސްކުއަރ މީޓަރުގެ ސަރަހައްދެއް ޚާއްޞަ ކޮށްފައިވާ ކަމަށް ސައޫދީ އަރަބިއްޔާއިން ބުނެފިއެވެ.

ސައޫދީން މިގޮތަށް ހާމަކޮށްފައި މިވަނީ ސައޫދީގެ އަލް އަރަބިއްޔާ ނޫހަށް ސައޫދީގެ ހައްޖު އެންޑް އުމްރާ މިނިސްޓްރީގެ އަންޑަރ ސެކްރެޓަރީގެ ތަރުޖަމާން ޑރ ހުސައިން އަލް ޝާރިފް އެވެ.

ޝާރިފް ވިދާޅުވީ މިއަހަރު ޤަތަރުން ހައްޖަށްދާ 2400 ހައްޖާޖީންނަށް 4000 ސްކުއަރ މީޓަރގެ ސަރަހައްދެއް ޚާއްޞަ ކޮށްފައިވާނޭ ކަމަށެވެ. އަދި މުޅި ދުނިޔެއިން ވެސް އަންނަ ހައްޖާޖީންނަށް ޖަހައިދޭ ޓެންޓް ތަކުގެ ތެރެއިންވެސް އެންމެބޮޑު އެއްޓެންޓްތައް ޚާއްޞަ ކުރާނީ ޤަތުރު ހައްޖުވެރިންނަށް ކަމަށެވެ.

އޭނާ ވިދާޅުވީ ޤަތުރު ހައްޖުވެރިންނަށް ޚާއްޞަ ކުރާ ސަރަހައްދަކީ އެމީހުން އެންމެ ބޮޑަށް ތިބެން ބޭނުންވާ ސަރަހައްދުން ކަމަށާއި އެއީ އަލް ޖަމްރާތު ބްރިޖްއަށް ދެވެން އޮންނަ މައި މަގު ކަމުގައިވާ ސޫކް އަލް އަރަބް މަގާއި އިންވެގެން ކަމަށެވެ.

މީގެ އިތުރުން ސައޫދީން ވަނީ އިލެކްޓްރޯނިކް ހުއްދައާއި ނުލައި، އެއްގަމު މަގުން، ޤަތަރުގެ ހައްޖުވެރިން ސައުދީއަށް ވަނުމަށް ހުއްދަ ދިނުމަށާއި، އެކަމަށް މަގުފަހި ކުރުމަށް ޤަތަރު-ސައުދީ އެއްގަމު ބޯޑަރު ހުޅުވާލުމަށް ސައުދީ ރަސްގެފާނު، ސަލްމާން ބިން އަބްދުލްއަޒީޒް އަލް ސައުދު އަމުރު ކުރައްވާފައެވެ.

ސައުދީ ރަސްގެފާނު މިފަދައިން ނިންމެވީ ޤަތަރުގެ ކުރީގެ އަމީރު، ޝައިޚް ޢަބްދުﷲ ބިން އަލީ ބިން ޢަބްދުﷲ ޤާސިމް އަލް ޘާނީ، ސައުދީގެ ވަލީ އަހުދު މުޙައްމަދު ބިން ސަލްމާން ބިން އަބްދުލްއަޒީޒް އަލް ސައުދު އާއި ބައްދަލުކުރައްވައި، ކުރިއަށް ގެންދެވި މަޝްވަރާތަކާއި ގުޅިގެންނެވެ.

ސައުދީ ރަސްގެފާނުގެ ޚާއްސަ ޤަރާރަކުން ނިންމަވާފައިވާ ނިންމެވުމުގައި ވަނީ، ސަލްވާ ބޯޑަރު ހުޅުވާލުމަށާއި، ހައްޖުގެ އަޅުކަމުގައި ބައިވެރިވާން ބޭނުންވާ ޤަތަރުގެ ހުރިހާ ރައްޔިތުންނަށް، އިލެކްޓްރޯނިކް ހުއްދައާއި ނުލައި، އެ ފުރުޞަތު ފަހި ކޮށްދިނުމަށެވެ.

މީގެ އިތުރުން ދައްމާމްގައި ހުންނަ ކިންގް ފަހަދު އިންޓަރނޭޝަނަލް އެއާޕޯޓާއި، އަލް އަހްސާ އިންޓަރނޭޝަނަލް އެއާޕޯޓްގައި ތިބި ޤަތަރުގެ ހައްޖުވެރިން، އެއްވެސް އަގަކާއި ނުލައި، މައްކާއަށް ގެންދިއުމަށް ވެސް ރަސްގެފާނު ވަނީ އަމުރު ކުރައްވާފައެވެ. އަދި ހައްޖަށް ދާން ބޭނުންވެފައި، ޤަތަރުގައި ތިބި ފަރާތްތައް ހައްޖަށް ގެންދިއުމަށް ދޯހާ އާއި ޖިއްދާ އާއި ދެމެދު ސީދާ ފްލައިޓަތަކެއް އުދުހުމަށް ސައުދީ އަރަބިއަން އެއާލައިންސްއަށް ވެސް އަންގަވާފައިވެއެވެ.