ގަތަރާމެދު ގަލްފްގެ ބައެއް ގައުމުތަކުން ދަތިކުރުމުގެ ފިޔަވަޅު އަޅާފައި އޮންނަތާ ހަތަރު މަހެއްހާ ދުވަސް ވެފައިވަނިކޮށް، ދެގައުމުގެ ގުޅުން ރަނގަޅުކޮށް އެއްބާރުލުން އިތުރުކުމަށް ވާހަކަ ދެއްކުމަށް އީރާނުގެ ޚާރިޖީ ވަޒީރު މުހައްމަދު ޖަވާދް ޒާރިފް ގަތަރުގެ އަމީރު ޝައިޚް ތަމީމް ބިން ހަމަދް އަލް ޘާނީއާ ބައްދަލުކުރައްވައިފިއެވެ.
މިއީ ޖޫން މަހުގެ ފަސްވަނަ ދުވަހު ސައުދީ އަރަބިއްޔާއާއި، ޔުނައިޓެޑް އަރަބް އެމިރޭޓްސްއާ، ބަހްރެއިނާ މިސްރުން ގަތަރާ ޑިޕްލޮމެޓިކް ގުޅުން ކަނޑާލައި އެ ގައުމަށް ދަތިކުރުމުގެ ފިޔަވަޅު އެޅިފަހުން އީރާނުގެ ޚާރިޖީވަޒީރު ގަތަރަށް ކުރެއްވި ފުރަތަމަ ދަތުރުފުޅެވެ.
އަންގާރަ ދުވަހު ބޭއްވުނު ބައްދަލުވުމާ ބެހޭގޮތުން ގަތަރު ނިއުސް އޭޖެންސީން ގެނެސްދިން ބަޔާނެއްގައި ބުނީ އެ ބައްދަލުވުމުގައި ދެގައުމުގެ ގުޅުންރަނގަޅުކޮށް އެކި ދާއިރާތަކުން އެއްބާރުލުން ދެވިދާނެ ގޮތްތައް ބެލުމުގެ އިތުރުން މިހާރު ދިމާވެފައިވާ ހާލަތާ ގުޅޭގޮތުން ވިސްނުން ހިއްސާކުރެއްވި ކަމަށެވެ.
ޒާރިފް ގަތަރަށް ވަޑައިގެންފައި މިވަނީ ގަތަރުން އީރާނާއެކު އޮތް ޑިޕްލޮމެޓިކް ގުޅުން އޯގަސްޓްމަހުގެ ތެރޭގައި ފުރިހަމައަށް އަލުން ގާއިމް ކުރުމާއެކުއެވެ.
މިދިޔަ 2016 ވަނަ އަހަރުގެ ޖެނުއަރީ މަހު ގަތަރުންވަނީ ތެހެރާނުގައި ހުންނަވާ ގަތަރުގެ އެމްބަސެޑަރ އަނބުރާ ގެންގޮސްފައެވެ. ގަތަރުން އެކަން ކޮށްފައިވަނީ ސައުދީއަރަބިއްޔާއިން ޝީއީ ދީނީ ލީޑަރަކަށް މަރުގެ އަދަބު ދިނުމުން އީރާނުގައި ހުންނަ ސައުދީ އަރަބިއްޔާގެ ޑިޕްލޮމެޓިކް މިޝަންއަށް ހަމަލާ ދިނުމާ ގުޅިގެންނެވެ.
އީރާނުގެ ދައުލަތުގެ މީޑިއާއިންވަނީ ޒާރިފް ދޯހާގައި ބައްދަލުވުމުގައި އިންނެވި ފޮޓޯތައް ދައްކާފައެވެ.އަދި ޒާރިފްއާ ހަވާލާދެއްވާ އެގައުމުގެ ދައުލަތުގެ މީޑިއާއިން ބުނެފައިވަނީ "ސަރަހައްދީ އެއްވެސް މައްސަލައަކީ އަސްކަރީ ހައްލެއް އޮތް މައްސަލަތަކެއް ނޫން"ކަމަށެވެ.
"ހުރިހާ ފަރާތަކުންވެސް އިސްކަންދޭންވީ ސަރަހައްދުގެ ހަމަޖެހުމާ ސަލާމަތްތެރިކަން އިއާދަ ކުރުމަށް އިސްނެގުމަށް" ޒާރިފް ވިދާޅުވިކަމަށް ބުނެފައިވެއެވެ.
ހޯމަ ދުވަހު ޒާރިފް ވަނީ އޮމާނުގެ އޮފިޝަލުންނާވެސް ބައްދަލުކުރައްވާފައެވެ. އޭގެ ތެރޭގައި 1970ން ފެށިގެން އޮމާނުގެ ވެރިކަން ކުރެއްވި އަދި ހުޅަނގާ އިރާނާދެމެދު މެދުވެރިއެއްގެ ދައުރު އަދާކޮށްދެއްވާ ސުލްތާން ޤަބޫސް ބިން ސާއިދް ހިމެނިވަޑައިގަންނަވައެވެ.
އެމެރިކާގެ އަސްކަރީ ބޭސްތަކުގެ ތެރެއިން މެދުއިރުމަތީގައި މެދުއިރުމަތީގައި އޮންނަ މައި އަސްކަރީ ބޭސް އޮންނަ ގަތަރާ، ގަލްފް ކޯޕަރޭޝަން ކައުންސިލްގެ ގައުމުތަކާމެދު އުފެދިފައި އޮތް މައްސަލަ ހައްލުކުރުމަށް ކުވެއިތުން މެދުވެރިއެއްގެ ދައުރު އަދާކޮށް ކުރި މަސައްކަތްތައްވަނީ ނާކާމިޔާބު ވެފައެވެ.
ސައުދީ އިސްވެ އޮވެ އިތުރު ގައުމުތަކަކާއެކު ގަތަރާ ގުޅުންކަނޑާލީ އެ ގައުމުން ޓެރެރިޒމަށް ފަންޑުކުރާ ކަމަށް ތުހުމަތުކޮށްފައެވެ. ގަތަރުންވަނީ އެ ތުހުމަތުތައް ދޮގުކޮށްފައެވެ.
ގަތަރާމެދު ފިޔަވަޅު އެޅި ގައުމުތަކުން ޖޫން މަހުގެ 22 ވަނަ ދުވަހުވަނީ 13 ނުކުތާއެއްގެ މައްޗަށް ހިމެނޭ ޑިމާންޑްތަކެއް ގަތަރަށް ހުށަހަޅާފައެވެ. އޭގެ ތެރޭގައި އަލްޖަޒީރާ ބަންދުކުރުމާއި އީރާނާ ގުޅުން ކަނޑާލުންވެސް ހިމެނޭއިރު ގަތަރުންވަނީ އެ ޑިމާންޑްތަކަށް ދެކޮޅުހަދާފައެވެ.
