އެމްބަސީ ބަންދުކޮށް ޗެޑްއިން ޤަތަރުގެ ޑިޕްލޮމޭޓުން ފައިބަން އަންގައިފި
ޑިޕްލޮމޭޓުން ޗެޑްއިން ފޭބުމަށް 10 ދުވަހުގެ މުހުލަތެއް ވަނީ ދީފަ
ޗެޑްގެ ފޮރިން މިނިސްޓަރު ޙުސައިން އިބްރާޙިމް ޠާހާ
މެދުތެރޭ އެފްރިކާގެ ޤައުމެއް ކަމުގައިވާ ޗެޑްގައި ހުރި ޤަތަރުގެ އެމްބަސީ ބަންދުކޮށް، އެ ޤައުމުގައި ތިބި ޤަތަރުގެ ޑިޕްލޮމޭޓުން ޤައުމުން ފޭބުމަށް އަންގައިފިއެވެ.
ޗެޑްގެ ސަރުކާރުން މި ނިންމުން ނިންމާފައި ވަނީ، ލީބިއާ މެދުވެރިކޮށް، ޗެޑްގައި ހަމަނުޖެހުން އުފައްދަން ޤަތަރުން މަސައްކަތް ކުރާކަމަށް ތުޙުމަތުކޮށެވެ.
"ޗެޑްގެ އެތެރޭގައި ހަމަނުޖެހުން އުފެއްދުމަށް ލީބިއާއިން ކުރަމުންދާ މަސައްކަތަށް ޤަތަރުން ކެނޑިނޭޅި އެހީވަމުންދާތީ، އެ ޤައުމުގެ އެމްބަސީ ބަންދުކޮށް އެމްބެސެޑަރާއި ޑިޕްލޮމޭޓުން ޤައުމުން ބޭރުކުރުމަށް ނިންމައިފީމެވެ." ޗެޑްގެ ފޮރިން މިނިސްޓްރީން ނެރުނު ބަޔާނެއްގައިވެއެވެ.
މި ބަޔާނުގައި ބުނެފައިވަނީ ޤަތަރުގެ ޑިޕްލޮމޭޓުން ޗެޑްއިން ފޭބުމަށް 10 ދުވަހުގެ މުހުލަތެއް އެ ފަރާތްތަކަށް ދޭކަމަށެވެ.
ޗެޑްގެ ބަޔާނުގައި އިތުރަށް ބުނެފައިވަނީ ޗެޑް އާއި ޗެޑްގެ ވަށައިގެންވާ ޤައުމުތައް ހަލަބޮލި ކުރުމަށް ޤަތަރުން ކުރަމުންދާ މަސައްކަތް ހުއްޓައިލުމަށް ގޮވާލާ ކަމަށެވެ.
މި ނިންމުމާއި އެކު ޤަތަރުގައި ހުންނަ ޗެޑްގެ ޑިޕްލޮމެޓިކް މިޝަން ބަންދުކުރުމަށް ވެސް ޗެޑްއިން ވަނީ ނިންމާފައެވެ.
ޗެޑްގެ މި ނިންމުމާއި ގުޅިގެން ޤަތަރުން އަދި އެއްޗެއް ބުނެފައެއް ނުވެއެވެ. ނަމަވެސް ސަރަޙައްދުގެ ކަންކަން އެނަލައިޒް ކުރާ ފަރާތްތަކުން ބުނާގޮތުގައި ޗެޑްގެ މި ނިންމުމަކީ އެ ޤައުމުން ބަޔާންކޮށްފައިވާ ސަބަބުތަކާއި ޚިލާފަށް، ސައުދީ އަރަބިއާގެ ޕްރެޝަރަށް ލެނބި ނިންމާފައިވަ ނިންމުންތަކެކެވެ.
