ޒާހިޔާ، ޤައުމީ އަންހެން ޓީމުން ރިޓަޔާ ކޮށްފި

ޤައުމީ އަންހެން ފުޓުބޯޅަ ޓީމުގެ ކުރީގެ ކެޕްޓަން ފާތިމަތު ޒާހިޔާ، ޤައުމީ ޓީމުން ރިޓަޔާ ކޮށްފި އެވެ.

ޤައުމީ ޓީމުން ރިޓަޔާވާން ނިންމިއިރު، ޒާހިޔާގެ އުމުރުން މިހާރު 31 އަހަރެވެ. ޒާހިޔާ ވަނީ ޤައުމީ ޓީމަށް ދިހަ އަހަރު ވަންދެން ކުޅެދީފަ އެވެ. ޤައުމީ ޓީމުން ރިޓަޔާވާން ނިންމިއިރު، އެންމެ ފަހުން ޤައުމީ ޓީމާ އެކު ޒާހިޔާ ކުޅެފައި ވަނީ މިއަހަރުގެ އަންހެން ސާފް ޗެމްޕިއަންޝިޕުގަ އެވެ. ނޭޕާލުގައި ކުރިއަށްދާ އެ މުބާރާތަށްފަހު ޒާހިޔާ ވަނީ ޤައުމީ ޓީމަށް ކުޅުން ހުއްޓާލަން ނިންމާފައިވާކަން އިއުލާން ކޮށްފަ އެވެ.

އެގޮތުން ޤައުމީ ޖާޒީގައި ޒާހިޔާ ކުޅެފައިވާ އެންމެ ފަހުން މެޗަކީ އަންހެން ސާފް ޗެމްޕިއަންޝިޕުގައި ރާއްޖެ އިން ބޫޓާނާ ދެކޮޅަށް ކުޅުނު މެޗެވެ. އެ މެޗުން ރާއްޖެ ބަލިވެފައި ވަނީ 13-0 ގެ ތަފާތު ބޮޑު ނަތީޖާ އަކުންނެވެ. ޤައުމީ ލެވެލްގެ އިތުރުން، ކުލަބު ލެވެލްގައި ވެސް ހުނަރުވެރި ކުޅުމެއް ދައްކާފައިވާ ޒާހިޔާ ކުޅުން ހުއްޓާލަން ނިންމިކަން އިއުލާން ކުރުމާއެކު، ރާއްޖޭގެ ފުޓުބޯޅައިގައި މަސައްކަތް ކުރަމުން އަންނަ ކޯޗުންނާއި، ކުޅުންތެރިން އަންނަނީ އޭނާ އަށް ހިތްވަރު ދިނުމުގެ ގޮތުން އެކި އެކި މެސެޖުތައް ހިއްސާ ކުރަމުންނެވެ.

ޒާހިޔާ ވަނީ އެންމެ ފަހުން ކުޅުނު އަންހެން ސާފު ޗެމްޕިއަންޝިޕުގެ ދެ މުބާރާތުގައި ވެސް ކުޅެފަ އެވެ. މީގެ ކުރިން 2018 ވަނަ އަހަރުހެ ތެރޭގައި ޒާހިޔާ އަށް ވަނީ އަނިޔާ ވެސް ވެފަ އެވެ. ރާއްޖޭގެ ޤައުމީ އަންހެން ޓީމުން ބަހުރެއިންއާ ދެކޮޅަށް ކުޅުނު މެޗުގައި ލިބުނު އަނިޔާގެ ސަބަބުން ޒާހިޔާގެ އަތް ވަނީ ބިންދައިގެން ގޮސްފަ އެވެ. އެ އަނިޔާ އަށް ފަހު އަލުން އެނބުރި ޒާހިޔާ ކުޅުމުގެ ތެރެއަށް އައީ ގިނަ ދުވަސްތަކެއްވީ ފަހުންނެވެ. އެއީ ރާއްޖެ އިން ބޭރުން އަދި ރާއްޖެ އިން ހޯދި ފަރުވާތަކަށްފަހު އެވެ.