ސީޝިލްސް އިން ފަސޭހަކަމާއެކު، ރާއްޖެ ބަލިކޮށްފި

ސީޝެލްސް އާއި ދެކޮޅަށް ރާއްޖެއިން ކުޅުނު ބައިނަލްއަގްވާމީ އެކުވެރިކަމުގެ ދެވަނަ މެޗުން ބަލިވެއްޖެއެވެ.

ހުކުރު ދުވަހުގެރޭ ގައުމީ ފުޓުބޯޅަ ދަނޑުގައި ކުޅުނު މި މެޗުން ރާއްޖެ ބަލިވީ 4-0 ގެ ނަތީޖާއަކުންނެވެ. މިއީ ބައިނަލްއަގްވާމީ އަންހެން ފުޓުބޯޅައިގައި ސީޝެލްސްއިން ހޯދި ފުރަތަމަ މޮޅެވެ. ސީޝެލްއަކީ އަންހެން ފުޓުބޯޅައިގައި ފީފާ ރޭންކިންގައި ހިމެނޭ ޓީމެއް ނޫނެވެ.

ރާއްޖޭގެ ފުރަތަމަ އެގާރައިން ގިނަ ބަދަލުތަކެއް ފެނިގެންދިޔަ މި މެޗުގައި ސީނިއާ ކުޅުންތެރިންނަށް ވަނީ ރެސްޓު ދީފައެވެ.

މި މެޗު ފަށައިގެން ސީޝެލްސްއިން ވަނީ ރާއްޖޭގެ ގޯލަށް ނުރައްކާކޮށް ގިނަ ހަމަލާތަކެއް އުފައްދާފައެވެ. އެގޮތުން މެޗުގެ 10 ވަނަ މިނެޓުގައި ސީޝެލްސްގެ ނަތާޝާ ބިބީ ފޮނުވާލި ހަމަލާ ދިޔައީ ގޯލުގެ އަރިމަތީ ދަނޑިކައިރިން ބޭރަށެވެ. އަދި އޭގެ މިނެޓެއް ފަހުން ސީޝެލްސްއިން ވަނީ ލަނޑު ޖަހާ ލީޑު ނަގައިފައެވެ. ލިބުނު ހިލޭ ޖެހެމަކުން މި ލަނޑު އެޓީމަށް ކާމިޔާބު ކޮށްދިނީ ރީނާއެވެ. މި ލަނޑަށްފަހުވެސް ސީޝެލްސްގެ ނަތާޝާއަށް ވަނީ ލަނޑު ޖަހަން ހުސް ދެ ފުރުސަތެއްލިބި ބޭކާރުވެފައެވެ.

މެޗުގެ ދެވަނަ ހާފުގައިވެސް ދިވެހި ޓީމުން ވަނީ އައު ކުޅުންތެރިންނަށް ފުރުސަތު ދީފައެވެ. މި ހާފުގައިވެސް ސީޝެލްސްއިން ރާއްޖޭގެ ގޯލަށް ނުރައްކާކޮށް ގިނަ ހަމަލާތަކެއް އުފައްދާފައިވާއިރު، މި ހާފުގައި ސީޝެލްސްއިން ޖެހި ތިން ލަނޑުގެ ތެރެއިން ދެ ލަނޑު އެޓީމަށް ކާމިޔާބު ކޮށްދީފައިވަނީ ނަތާޝާއެވެ. ސީޝެލްސްއިން މެޗުގައި ދެން ކާމިޔާބުކުރި ލަނޑު އެޓީމަށް ކާމިޔާބު ކޮށްދިނީ ކެޕްޓަން ޕަސްކަލީނާ އެވެ.

މާލޭގައި ކުރިއަށްދާ ބައިނަލްއަގްވާމީ އެކުވެރިކަމުގެ ސިލްސިލާ މެޗުތަކުގައި ރާއްޖެ ކުޅޭ ފަހު މެޗު އޮންނާނީ އަންނަ ބުރާސްފަތި ދުވަހުއެވެ. މި މެޗުގައި ރާއްޖެއިން ނުކުންނާނީ ސައުދި އަރަބިއްޔާއާ ދެކޮޅަށެވެ.