ކެނެޑާއިން އިންޑިއާގެ ހައި ކޮމިޝަނަރާއި އިތުރު ފަސް ޑިޕްލޮމެޓުން ހޯމަ ދުވަހު ބޭރުކޮށްލައިފިކަމަށް އެގައުމުގެ މީޑިއާތަކުން ރިޕޯޓުކޮށްފިއެވެ.
ކެނެޑާގެ ސަރުކާރުގެ އިސް އޮފިޝަލަކު މީޑިއާއަށް މައުލޫމާތު ދެމުން ބުނެފައިވަނީ، ކެނެޑާގައި ހިނގާފައިވާ "އަނިޔާވެރި ޖަރީމާއަކާ" އިންޑިއާ ސަރުކާރާ ގުޅުން ހުރި ކަމަށް ބެލޭ އައު މަޢުލޫމާތުތަކެއް ފުލުހުން ވަރަށް އަވަހަށް ހާމަކުރާނެ ކަމަށެވެ.
ހޯމަ ދުވަހު ނިއު ދިއްލީން އިޢުލާނު ކޮށްފައިވަނީ، ކެނެޑާއަށް ފޮނުވާފައިވާ އެ ޤައުމުގެ ހައި ކޮމިޝަނަރު ސަންޖޭ ކުމާރު ވަރުމާ އަނބުރާ ގެންނަން ނިންމާފައިވާ ކަމަށެވެ.
ކެނެޑާގެ ސިކް ލީޑަރެއް ކަމަށްވާ ހަރުދީޕް ސިންގ ނިއްޖާރު މަރާލި މައްސަލައިގެ ތަޙްޤީޤުގައި ސުވާލު ކުރަން ބޭނުންވާ ފަރާތްތަކުގެ ތެރޭގައި ހައިކޮމިޝަނަރު ސަންޖޭ ހިމެނޭ ކަމަށް ކެނެޑާ ސަރުކާރުން ބުނެފައިވާ ކަމަށް އިންޑިއާ އިން ތުހުމަތުކޮށްފައިވެއެވެ.
ރޯޔަލް ކެނޭޑިއަން މައުންޓެޑް ޕޮލިސްގެ ކޮމިޝަނަރު މައިކަލް ޑުހެމް ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި "ޢާންމު ސަލާމަތަށް ނުރައްކާވާފަދަ ކަމެއްގައި" އިންޑިއާ ސަރުކާރުގެ އޭޖެންޓުންނާ ގުޅުންހުރި ކަމަށް ވަނީ ބުނެފައެވެ.
2023 ވަނަ އަހަރުގެ ޖޫން 18 ވަނަ ދުވަހު، ބްރިޓިޝް ކޮލަމްބިއާގައި ހުރި ސިކުންގެ ފައްޅިއެއްގެ ޕާކިންގ އޭރިއާގައި ހުއްޓާ ބަޑިޖަހައި ނިއްޖާރު ވަނީ މަރާލާފައެވެ. 2023 ވަނަ އަހަރުގެ ސެޕްޓެމްބަރު މަހު، ކެނެޑާގެ ބޮޑުވަޒީރު ޖަސްޓިން ޓްރޫޑޯ ވިދާޅުވެފައިވަނީ، ނިއްޖާރު މަރާލި މައްސަލައިގައި އިންޑިއާ ސަރުކާރުގެ އޭޖެންޓުންގެ އަތެއް އޮތް ކަމަށް ބެލެވޭ "އިތުބާރުހުރި ތުހުމަތުތަކެއް" ކެނެޑާގެ އިންޓެލިޖެންސް އޭޖެންސީތަކުން ބަލަމުންދާ ކަމަށެވެ.
