ވިނަރެސް ކައިރީގައި ހިނގި ނުރައްކާތެރި އެކްސިޑެންޓުގައި ކާރު ދުއްވަން އިން މީހާގެ ބަންދަށް 1 މަސް ދުވަސް
ޝަރީއަތް ނިމެންދެން ބަންދުކޮށްފައި ހުއްޓާ އިކްރާމް މިނިވަންވީ ވަކީލެއްގެ ފުރުސަތު ނުދޭތީ ހައިކޯޓުގައި ބަންދު އިސްތިއުނާފުކޮށްގެން
ވިނަރެސް ކައިރި ހިނގި އެކްސިޑެންޓުގައި ކާރު ދުއްވަން އިން މީހާ
ވިނަރެސް ކައިރީގައި ހިނގި ނުރައްކާތެރި އެކްސިޑެންޓުގައި ކާރު ދުއްވަން އިން މީހާގެ ބަންދަށް 1 މަސް ދުވަސް ޖަހައިފިއެވެ.
ފުލުުހުން ބުނީ 2024 ޖުލައި 31 ވަނަ ދުވަހު ހުޅުމާލެ ފޭސް 2 ގައި ހިނގި ނުރައްކާތެރި އެކްސިޑެންޓާ ގުޅިގެން ހައްޔަރުކޮށް އަދި ފަހުން ހައި ކޯޓުން ދޫކޮށްލާފައިވާ މ. ލޭންޑްއޮފްގާޑްން، އިބްރާހިމް އިކްރާމް، ކޯޓު އަމުރެއްގެ ދަށުން އިއްޔެ ހައްޔަރުކޮށް ދެވަނަ ފަހަރަށް އޭނާގެ ބަންދާއި މެދު ގޮތެއް ނިންމުމަށް ކްރިމިނަލް ކޯތަށް ހާޒިރުކުރުމުން ބަންދަށް 30 ދުވަސް ދީފައިވާ ކަމަށެވެ. މިއީ ހައިކޯޓުގެ އަމުރާއެކު އޭނާ މިނިވަން ވިފަހުން އަލުން ހައްޔަރުކޮށް ބަންދުގެ މުއްދަތު ދިން ދެވަނަ ފަހަރެވެ.
މި މަހުގެ 4 ވަނަ ދުވަހު އޭނާ ފުރަތަމަ ކޯޓަށް ހާޒިރުކުރުމުން ދީފައިވަނީ 3 ދުވަހުގެ ބަންދުގެ މުއްދަތެކެވެ. އިކްރާމް މިނިވަންވީ އޭނާ ޝަރީއަތް ނިމެންދެން ބަންދުގައި ބަހައްޓަން ކްރިމިނަލް ކޯޓުން ކުރި އަމުރު ހައިކޯޓުގައި އިސްތިއުނާފުކުރުމުންނެވެ. އޭނާއަށް ވަކީލެއްގެ އެހީތެރިކަން ހޯދުމުގެ ފުރުސަތު ނުދީ ޝަރީއަތް ނިމެންދެން ބަންދުކޮށްފައި ބެހެއްޓުމަކީ ޤާނޫނީ ގޮތުން ރަނގަޅު ކަމެއް ނޫން ކަމަށް ހައިކޯޓުން ނިންމާފައިވެއެވެ. އޭނާ މިނިވަންވީ 1 ސެޕްޓެމްބަރުގައެވެ.
ބާރު ސްޕީޑްގައި ދުއްވާފައި ކާރެއް ކޮންޓްރޯލް ނުވެ ގޮސް މަގުގެ އެއްފަރާތުގައި މަޑުކޮށްގެން އިން ސައިކަލެއްގައި ޖެހިގެންނެވެ. އެކްސިޑެންޓު ހިނގުމުން ކާރު ދުއްވި މީހާ ވަނީ ފިލައިގެން ގޮސްފައެވެ. އަދި ފަހުން އޭނާއެކު އެ ކާރުގައި ތިބި އިތުރު 2 މީހަކު ވަނީ ހައްޔަރުކޮށްފައެވެ.
އެކްސިޑެންޓް ވީޑިއޯ ސޯޝަލް މީޑިއާގައި އާއްމުވެފައިވާއިރު، ކާރު ދުއްވާފައި ދަނީ ވަރަށް ބާރު ސްޕީޑްގައެވެ. ކޮންޓްރޯލް ނުވެ ސައިކަލު ދުއްވާލޭނުން ގޮސް މަގުގެ އެއްފަރާތުގައި މަޑުކޮށްގެން އިން ސައިކަލުގައި ވަރަށް ބާރަށް ޖެހެއެވެ. ސައިކަލުގައި އިން މީހާ ވިއްސާގެން ގޮސް ވެއްޓެނީ އެސަރަހައްދުގައި އިން ފިހާރަ ކައިރިއަށެވެ. އަދި ދުވާރު ކައިރީގައި އިންދާފަ އިން ގަސް ވެސް ވިއްސާގެން ދެއެވެ. މީގެ އިތުރުން އެ ސަރަހައްދުގައި ޕާކު ކޮށްފައި އިން އެހެން ސައިކަލަކަށް ވަނީ ގެއްލުން ލިބިފައެވެ.
މި އެކްސިޑެންޓްގައި ސައިކަލުގައި އިން ފިރިހެން މީހާއަށް ވަރަށް ބޮޑަށް އަނިޔާވެފައިވެއެވެ.
