ޕެރިސިޗް، ކޯމޯ އަށް ބަދަލު ވަނީ

ކްރޮއޭޝިއާގެ އިވާން ޕެރިސިޗް، އިޓާލިއަން ލީގުގެ ކޯމޯ އަށް ބަދަލުވާާން އެއްބަސްވެއްޖެ އެވެ.

އުމުރުން 35 އަހަރުގެ ކުޅުންތެރިޔާ މިހާރު ކުޅެމުން އަންނަނީ ކްރޮއޭޝިއާގެ ހަޑުކް ސްޕްލިޓް އަށެވެ. ޓޮޓެންހަމް ދޫކޮށްލުމަށްފަހު، އެންމެ ފުރަތަމަ އޭނާ އެ ކުލަބަށް ބަދަލުވީ ލޯނު އެއްބަސްވުމެއްގެ ދަށުންނެވެ. އެހެން ނަމަވެސް، ފަހުން ވަނީ އެ ކުލަބާ އެކު ދާއިމީ އެއްބަސްވުމެއް އެކުލަވާލައިފަ އެވެ. އެއީ ޓޮޓެންހަމާ އެކު އޭނާ ސޮއި ކޮށްފައި އޮތް އެއްބަަސްވުމުގެ މުއްދަތު ހަމަވުމުންނެވެ.

މީޑިއާ ތަކުގައި ބުނެފައިވާ ގޮތުން ކޯމޯ އިން ވަނީ ޕެރިސިޗް ހޯދުމުގެ ޝައުޤުވެރިކަން ފާޅުކޮށް، އޭނާއާ މަޝްވަރާ ކޮށްފަ އެވެ. އެ މަޝްވަރާތުގައި، ކޯމޯ އަށް ބަދަލުވުމަށް ޕެރިސިޗް އަނގަބަހުން އެއްބަސްވެފައިވާ ކަމަށާއި، ކުރިއަށް އޮތް ދުވަސްތަކުގައި ލިޔެ ކިޔުންތައް ފުރިހަމަ ކުރުމުގެ މަސައްކަތް ކުރިއަށް ދާނެ ކަމަށް ވެސް ވަނީ ބުނެފަ އެވެ. ކޯމޯ އަށް ބަދަލުވާން ޕެރިސިޗް ބޭނުންވެފައި ހުރިއިރު، އެ ކުލަބުން އޭނާ އަށް ހުށަހަޅާނީ ދެ އަހަރުގެ އެއްބަސްވުމެއް ކަަމަށް ވެސް ރިޕޯޓުތައް ބުނެ އެވެ.

ކްރޮއޭޝިއާގެ ހަޑުކް ސްޕްލިޓް އަށް ބަދަލުވެ ޕެރިސިޗް ވަނީ އެ ކުލަބަށް ކުޅެދިން 12 މެޗުގައި އެއް ލަނޑު ޖަހައިފަ އެވެ. ސީނިއާ ކެރިއަރުގައި އޭނާ ވަނީ ބޮރޫޝިއާ ޑޯޓްމަންޑު، ވުލްވްސްބާގް، އިންޓަ މިލާން، ބަޔާން މިއުނިކް އަދި ޓޮޓެންހަމް ފަދަ ކުލަބުތަކަށް ވެސް ކުޅެފަ އެވެ.

ސްޕެއިންގެ ކުރީގެ ތަޖުރިބާކާރު މިޑްފީލްޑަރު ސެސް ފެބްރިގާޒް އިރުޝާދު ދެމުން އަންނަ ކޯމޯ އަކީ، 21 އަހަރަށް ފަހު އިޓާލިއަން ލީގަށް ޕްރޮމޯޓުވީ ކުލަބެކެވެ. އެ ކުލަބުން ވަނީ ދާދި ފަހުން ކުރިން ބާސެލޯނާ އަށް ކުޅުނު ސްޕެއިންގެ ސާޖީ ރޮބާޓޯ ވެސް ހޯދައިފަ އެވެ. އަދި ބައެއް އެހެން ކުޅުންތެރިން ހޯދުމުގެ މަސައްކަތް ވެސް އަންނަނީ ކުރަމުންނެވެ.