އިންޓަ އިން ކޯމޯ ބަލިކޮށްފި

އިޓާލިއަން ލީގުގައި ކޯމޯއާ ދެކޮޅަށް ކުޅުނު މެޗުން އިންޓަ މިލާން މޮޅުވެއްޖެ އެވެ.

އިންޓަގެ އަމިއްލަ ދަނޑުގައި ހޯމަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-0 އިންނެވެ. މެޗުގައި އިންޓަ އިން އެ ޓީމުގެ ދެ ލަނޑު ވެސް ޖެހީ ދެ ވަނަ ހާފުގަ އެވެ.

މެޗުގެ ދެ ވަނަ ހާފު ފަށައިގެން ތިން ވަނަ މިނެޓުގައި އިންޓަ އަށް ލީޑު ނަގައިދިނީ ކާލޯސް އަގުސްޓޯ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ހަކަން ޗަނޮގްލޫ އެވެ. މެޗުގައި އިންޓަގެ ދެ ވަނަ ލަނޑު އެ ޓީމުން ޖެހީ، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގަ އެވެ. އެ ލަނޑު އިންޓަ އަށް ޖަހައިދިނީ މާކަސް ތުރަމް އެވެ. އެއީ ޕިއޮޓް ޒިއެލިންސްކީ ތަނަވަސްކޮށްދިން ފުރުސަތެއްގައި ތުރަމް ޖެހި ލަނޑެކެވެ.

މޮޅާއެކު އިންޓަ އިން ވަނީ ލީގު ރޭހުގެ ވާދަވެރިކަން ބޮޑު ކޮށްފަ އެވެ. މިހާތަނަށް ލީގުގައި ކުޅުނު 16 މެޗުން 37 ޕޮއިންޓާ އެކު އިންޓަ އޮތީ ތިން ވަނައިގަ އެވެ. އެއް ވަނައިގައި އޮތް އެޓަލަންޓާ އާއި ދެ ވަނައިގައި އޮތް ނަޕޯލީ ވަނީ އިންޓަ އަށް ވުރެ އެއް މެޗު އިތުރަށް ކުޅެފަ އެވެ. 17 މެޗުން އެޓަލަންޓާ އަށް ލިބެނީ 40 ޕޮއިންޓެވެ. ދެ ވަނައިގައި ނަޕޯލީ އަށް ލިބެނީ 38 ޕޮއިންޓެވެ.