އިންޓަރ މިލާނަށް ކުޅެމުން އަންނަ ކްރޮއޭޝިއާގެ އިވާން ޕެރިސިޗް ޕްރިމިއަރ ލީގުގެ ޓޮޓެންހަމަށް ބަދަލުވާން ނިންމައިފިއެވެ.

ކުޅިވަރު ނޫސްވެރިޔާ ފެންރީޒިއޯ ރޮމާނޯ ބުނި ގޮތުގައި ޓޮޓެންހަމަށް ސޮއި ކުރުމާއި، މެޑިކަލް ޓެސްޓުތައް ހެދުމަށްޓަކައި ޕެރިސިޗް އޭނާގެ އެޖެންޓާއެކު އަންނަ ހަފްތާގައި ލަންޑަނަށް ދަތުރުކުރާނެއެވެ. އަދި މިހާރު ޕްލޭން ޝެޑިއުލް ކުރެވިފާ ކަމަށް ވެސް ރޮމާނޯ ބުންޏެވެ. މީގެ އިތުރުން ރޮމާނޯ ބުނި ގޮތުގައި ޕެރިސިޗް ޓޮޓެންހަމަށް ބަދަލުވާނީ ދެ އަހަރުގެ އެއްބަސްވުމެއްގެ ދަށުންނެވެ.

އުމުރުން 33 އަހަރުގެ ޕެރިސިޗް ވަނީ އިންޓަރ މިލާންގެ އިތުރުން ބްރޫޝިއާ ޑޯޓްމަންޑާއި، ވުލްވްސްބާގުއާއި، ބަޔާން މިއުނިކަށް ވެސް ކުޅެފައެވެ. 2015 ވަނަ އަހަރުގެ ތެރޭގައު އިންޓަރ މިލާނަށް ބަދަލުވި ޕެރިސިޗް ވަނީ އެ ޓީމަށް 208 މެޗު ކޫލެދީފައެވެ. އަދި އޭނާ ވަނީ އެ ޓީމަށް 49 ލަނޑު ޖަހައިދީފައެވެ. އަދި އޭނާ ވަނީ އެ ޓީމާއެކު އިޓާލިއަނ ލީގު، ކޮޕާ އިޓާލިއާ އަދި އިޓާލިއަން ސުޕަ ކަޕް ވެސް ކާމިޔާބުކޮށްފައެވެ.

ޕެރިސިޗް އަކީ ކްރޮއޭޝިއާގެ ގައުމީ ޓީމުގެ ވެސް ކުޅުންތެރިއެކެވެ. 2011 ވަނަ އަހަރުން ފެށިގެން އޭނާ އަންނަނީ ކްރޮއޭޝިއާގެ ގައުމީ ޓީމަށް ކުޅެމުންނެވެ. އަދި މިހާތަނަށް އޭނާ ވަނީ ގައުމީ ޓީމަށް 113 މެޗު ކުޅެދީ 32 ލަނޑު ޖަހާފައެވެ. އޭނާ ވަނީ ގައުމީ ޓީމާއެކު 2018 ވަނަ އަހަރުގެ ފީފާ ވޯލްޑް ކަޕްގެ ފައިނަލް ވެސް ކުޅެފައެވެ.