ޕެރިސިޗް ޓޮޓެންހަމަށް ސޮއިކޮށްފި

އިންޓަރ މިލާނަށް ކުޅެމުން އައި ކްރޮއޭޝިއާގެ އިވާން ޕެރިސިޗް ޕްރިމިއަރ ލީގުގެ ޓޮޓެންހަމަށް ސޮއިކޮށްފިއެވެ.

އުމުރުން 33 އަހަރުގެ ޕެރިސިޗް ޓޮޓެންހަމަށް ސޮއިކުރީ ފްރީ ޓްރާންސްފާއެއްގައެވެ. އޭނާ ޓޮޓެންހަމަށް ބަދަލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އޭނާ ޓޮޓެންހަމަށް ބަދަލުވިއިރު، އޭނާ އަކީ އެ ޓީމުގެ ކޯޗު އެންޓޯނިއޯ ކޮންޓޭ ބޭނުންވި ކުޅުންތެރިއެކެވެ.

ޕެރިސިޗް ވަނީ އިންޓަރ މިލާންގެ އިތުރުން ބްރޫޝިއާ ޑޯޓްމަންޑާއި، ވުލްވްސްބާގުއާއި، ބަޔާން މިއުނިކަށް ވެސް ކުޅެފައެވެ. 2015 ވަނަ އަހަރުގެ ތެރޭގައު އިންޓަރ މިލާނަށް ބަދަލުވި ޕެރިސިޗް ވަނީ އެ ޓީމަށް 208 މެޗު ކުލެދީފައެވެ. އަދި އޭނާ ވަނީ އެ ޓީމަށް 49 ލަނޑު ޖަހައިދީފައެވެ. އަދި އޭނާ ވަނީ އެ ޓީމާއެކު އިޓާލިއަން ލީގު، ކޮޕާ އިޓާލިއާ އަދި އިޓާލިއަން ސުޕަ ކަޕް ވެސް ކާމިޔާބުކޮށްފައެވެ. އިންޓަރ މިލާންގައި ހުރުމަށްފަހު، 2019 ވަނަ އަހަރު އޭނާ ވަނީ ލޯނު އެއްބަސްވުމެއްގެ ދަށުން ޖަރުމަނުގެ ބަޔާން މިއުނިކަށް ކުޅެފައެވެ. ބަޔާންއާއެކު އޭނާ ވަނީ ޖަރުމަނު ލީގުގެ އިތުރުން ޔުއެފާ ޗެމްޕިއަންސް ލީގު ކާމިޔާބުކޮށްފައެވެ.

ޕެރިސިޗް އަކީ ކްރޮއޭޝިއާގެ ގައުމީ ޓީމުގެ ވެސް ކުޅުންތެރިއެކެވެ. 2011 ވަނަ އަހަރުން ފެށިގެން އޭނާ އަންނަނީ ކްރޮއޭޝިއާގެ ގައުމީ ޓީމަށް ކުޅެމުންނެވެ. އަދި މިހާތަނަށް އޭނާ ވަނީ ގައުމީ ޓީމަށް 113 މެޗު ކުޅެދީ 32 ލަނޑު ޖަހާފައެވެ. އޭނާ ވަނީ ގައުމީ ޓީމާއެކު 2018 ވަނަ އަހަރުގެ ފީފާ ވޯލްޑް ކަޕްގެ ފައިނަލް ވެސް ކުޅެފައެވެ.