ފިނިފެންމާ ލޯންޗް ގޮއްވާލި ހާދިސާއާއި ގުޅިގެން ސުވާލު އުފައްދަންޖެހުނީ އެކަން ކުރިކަމަށް ބުނާ ބަޔަކު ކައިރިކޮށްގެން އުޅޭތީ - އަދުރޭ

ކުރީގެ ރައީސް އަބްދުﷲ ޔާމީނާއި އަނބިކަނބަލުން އުމުރާއިން ވަޑައިގެން ހުޅުލެއިން މާލެއަށް އައި ރިޔާސީ ލޯންޗް، ފިނެފެންމާގައި އެއްޗެއް ގޮއްވާލީ ހާދިސާއާއި ގުޅިގެން ސުވާލު އުފައްދަވަންޖެހުނީ އެމަނިކުފާނުގެ އަރިހުގައި މިއަދު ތިއްބެވި ބޭބޭފުޅުންގެ ސަބަބުން ކަމަށް މަޖިލީހުގެ ރައީސް އަދި ޕީއެންސީގެ ޗެއަރޕާސަން އަބްދުއްރަހީމް އަބްދުﷲ ވިދާޅުވެއްޖެއެވެ.

ޕީއެންސީން ބޭއްވި ނޫސްވެރިންގެ ބައްދަލުވުމުގައި އަބްދުއްރަހީމް ވިދާޅުވީ ފިނިފެންމާ ލޯންޗް ގޮއްވާލި ހާދިސާއަކީ ރައީސް ޔާމީން ކުޅުއްވި ޑްރާމާއެއްކަމަށް ސުވާލު އުފެއްދުމުގެ ޖާގަ އެބައޮތް ކަމަށެވެ. އަދި ސުވާލު އުފެއްދޭ ކަންތައް ފެންނަމުންދާ ކަމަށެވެ. އަބްދުއްރަހީމް ވިދާޅުވީ އެ ހާދިސާއާއި ގުޅިގެން ރައީސް ޔާމީން ވިދާޅުވީ ހާދިސާ ހިނގުމާއެކީގައި ލޯންޗުން ބޭރަށް ނުކުމެވަޑައިގެން އެއްގަމަށް ބަލާލި އިރު ފެންނަން ހުރީ ނޫކުލައިގެ ޓީޝާޓެއް ލައިގެން ހުރި ބޭފުޅެއް ކަމަށެވެ. އަދި އެއީ ސިފައިންގެ މާލޭ އޭރިއާގެ ކުރީގެ ކޮމާންޑަރު ކެޕްޓަން އަހްމަދު ފަޔާޒް އަލީ ރިޒާ (ޕާޕާ) ކަމަށެވެ.

އަދި އެ ވާހަކަ ރައީސް ޔާމީން ވިދާޅުވީ އެންމެންގެ ހާޒިރުގައި ކަމަށާއި، އެކަން ކުރީ ޕާޕާ ކަމަށް ވިދާޅުވި ކަމަށެވެ.

އަބްދުއްރަހީމް ވިދާޅުވީ އޭނާ އުފެއްދެވި ސުވާލާއި ގުޅިގެން ދައުލަތުގެ މުއައްސަސާތަކުން ތަހުގީގުކުރައްވަން ބޭނުންވާނަމަ އެކަން ކުރައްވާނެ ކަމަށެވެ.

ރިޔާސީ ލޯންޗް ގޮއްވާލުމާއި ގުޅޭގޮތުން އަބްދުއްރަހީމް ދެއްކެވި ވާހަކައާއި ގުޅިގެން ނޫސްވެރިޔާ އިތުރަށް ސުވާލުކުރުމުން މަޖިލީހުގެ ރައީސްކަންވެސް ކުރައްވާ އަބްދުއްރަހީމް ވަނީ ވަރަށްބޮޑަށް ރުޅިގަދަވެ، އޭނާގެ ސުވާލަށް ނޫސްވެރިޔާ ޖަވާބުދޭން ނުޖެހޭނެ ކަމަށާއި، އެކަމާއި ގުޅޭ އިތުރު އެއްޗެއް ވިދާޅުވާން ބޭނުން ނުވާކަމަށް ބުނެ ރުޅިވެރިގޮތަކަށް ނޫސްވެރިއާއަށް ޖަވާބުދެއްވާފައެވެ.

އަބްދުއްރަހީމް ވިދާޅުވީ ސަންގު ޓީވީގައި ދެއްވި އިންޓަރވިއުގައި ވިދާޅުވީ ފިނިފެންމާ ލޯންޗް ގޮވުން އެއީ ރައީސް ޔާމީން ކުޅުއްވި ޑްރާމާއެއް ނޫންތޯ ސުވާލުކުރައްވަން ކެރިވަޑައިގަންނަވާ ކަމަށެވެ. އެހިސާބަށް ރައީސް ޔާމީންގެ ވާހަކަފުޅުތައް ގޮސްފައިވާ ކަމަށެވެ. އަބްދުއްރަހީމް ވިދާޅުވީ ލޯންޗް ގޮއްވާލުމުން ރައީސް ޔާމީން ވިދާޅުވެފައިވަނީ، ލޯންޗުކޮޅުން ބޭރަށް ނުކުމެވަޑައިގެންނެވި އިރު ބޮޑު ފާލަމާއި ދިމާލުން ނޫކުލައިގެ ޓީޝާޓެއް ލައިގެން ހުރި މީހަކު ފެނިވަޑައިގެންނެވި ކަމަށާއި، އަދި އެކަން ކުރީ އެމީހާކަން ކަށަވަރުކުރެވުނު ކަމަށެވެ.