ރާއްޖެ ޓީވީގެ ޙާލު ކިހިނެއް ޕްރޮގްރާމްގައި ދައްކަނީ ރައީސް މުޢިއްޒު އަށް އަޑު އަހަން ފަސޭހަ ވާހަކަ ތަކެއް ނޫން: ރައީސް ޔާމީން
ރައީސް ޔާމީން ވިދާޅުވީ، މީޑިއާތައް ކޮންޓްރޯލް ކުރަން ސަރުކާރުން ބޭނުން ވަނީ ދެ ސަބަބަކާ ހުރެ ކަމަށް
ޙާލު ކިހިނެއް ޕްރޮގްރާމްގައި ރަށެއްގެ ރައްޔިތަކު އާމިރުއާ ވާހަކަ ދައްކަނީ
ރާއްޖެ ޓީވީ އިން ގެނެސްދޭ ޙާލު ކިހިނެއް ޕްރޮގްރާމްގައި ދައްކަނީ ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އަށް އަޑު އަހަން ފަސޭހަ ވާހަަކަ ތަކެއް ނޫން ކަމަށް، ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމް ވިދާޅުވެއްޖެ އެވެ.
ރައީސް ޔާމީން މިހެން ވިދާޅުވެފައި ވަނީ އެމަނިކުފާނުގެ ޕާޓީ، ޕީއެންއެފް އިން ބޭއްވި ބައްދަލުވުމުގައި ވާހަކަ ދައްކަވަމުންނެވެ. އެގޮތުން މިހާރު ރައްޔިތުންގެ މަޖިލީހަށް ހުށަހަަޅައިގެން އުޅޭ، މީޑިއާތައް ކޮންޓްރޯލް ކުރާ ބިލާ ގުޅޭ ގޮތުން ވާހަކަ ދައްކަވަމުން ރައީސް ޔާމީން ވިދާޅުވީ، މީޑިއާތައް ކޮންޓްރޯލް ކުރަން ސަރުކާރުން ބޭނުން ވަނީ ދެ ސަބަބަކާ ހުރެ ކަމަށެވެ.
އޭގެ ތެރެގައި އެއް ސަބަބަކީ ރާއްޖެ ޓީވީ ކަމަށް ރައީސް ޔާމީން ވިދާޅުވި އެވެ. އެގޮތުން ރާއްޖެ ޓީވީ އިން ރަށް ރަށަށް ގޮސްގެން ގެނެސްދޭ ޙާލު ކިހިނެއް ޕްރޮގްރާމް ގައި ދައްކަނީ ރަައީސް މުޢިއްޒު އަށް އަޑު އަހަން ފަސޭހަ ވާހަކަ ތަކެއް ނޫން ކަމުގައި ރައީސް ޔާމީން ވިދާޅުވި އެވެ.
އެ ބިލުގެ އަނެއް ސަބަބަކީ ޗެނަލް ތޭރަ ދެކެ އިންތިހާ އަށް ރުޅި އައުން ކަމަށް ވެސް ރައީސް ޔާމީން ވިދާޅުވި އެވެ. އެގޮތުން އެ ޗެނަލް އިން ގެނެސްދިން ބެލްކަނި ވީޑިއޯ ޑޮކިއުމަންޓާއި، ޕީއެންއެފްގެ ޖަލްސާ ތަކުގެ ސަބަބުން ސަރުކާރު ރުޅި އަންނަ ކަމަށާއި، ބޭނުން ވަނީ އެކަންކަން ހުއްޓުވަން ކަމަށެވެ.
އެގޮތުން ދާދި ފަހުން ޕީއެންއެފް އިން ބޭއްވި ވޭކްއަޕް ޖަލްސާއާ ގުޅުވައިގެން، ޗެނަލް ތޭރައިގެ ބްރޯޑްކާސްޓިން މެދު ކަނޑާލުމަށް ވެސް މޯލްޑިވްސް ބްރޯޑްކާސްޓިން ކޮމިޝަން އިން އަންގާފައިވާ ކަމަށް ރައީސް ޔާމީން ވިދާޅުވެފައިވެ އެވެ.
އަނެއް އަމާޒަކީ ރާއްޖެ ޓީވީ. ރާއްޖެ ޓީވީ އިން ރާއްޖެ ތެރޭގެ ރަށް ރަށަށް، އާމިރު އާއި ޓީމުން ގޮސްފައި ޙާލު ކިހިނެއް ޕްރޮގްރާމް އެބަ ގެންދޭ. މީގަ އަންނަނީ މުޢިއްޒު އަށް އަޑު އަހާލަން ފަސޭހަ ވާހަކަ ތަކެއް ނޫން. އެހެންވީމާ އަޅުގަނޑަށް ހީވާ ގޮތުން ކަމަށް ވަންޏާ މައިގަނޑު ދެ ސަބަބު. މި ދެ ޓީވީ އިން ގައިމު ވެސް މުޢިއްޒު އެދިވަޑައިގަންނަވާ ގޮތަކަށް ކަންކަމެއް ނުކުރޭ.ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމް
އިތުރަށް ވާހަކަ ދައްކަވަމުން ރައީސް ޔާމީން ވިދާޅުވީ، ރައީސް މުޢިއްޒު ޕްރޮމޯޓު ކުރަން އުފައްދާފައިވާ އެމްއެމްޓީވީ އަށް، ރައީސް މުޢިއްޒު ބޭނުންފުޅުވާ މިންވަރަށް އެމަނިކުފާނު ޕްރޮމޯޓު ނުކުރެވޭ ކަމަށެވެ. އަދި އެމްއެމްޓީވީ އަކީ "މަންމަނު" ޓީވީއެއް ކަމަށް ރައީސް ޔާމީން ސިފަ ކުރެއްވި އެވެ.
ރާއްޖެ ޓީވީ އިން މިހާރު ގެނެސް ދެމުން އަންނަ ޙާލު ކިހިނެއް ޕްރޮގްރާމް އަކީ ރާއްޖޭގެ އެކި ރަށް ރަށުގެ ރައްޔިތުންގެ ވާހަކަތަކާއި، މިހާރު ރައްޔިތުންގެ ދިރިއުޅުމުގެ ޙާލަތާއި، މި ސަރުކާރު ވެރިކަަށް އައި ފަހުން ދިމާވެފައިވާ ދަތިތަކާއި، ރަށް ރަށުގައި ތަރަައްޤީގެ މަޝްރޫއުތައް މަޑު ޖެހިި، އަދި މަޝްރޫއުތައް ނުހިނގާތީ އެކަމުގެ ވާހަކަތައް ގެނެސްދޭ ޕްރޮގްރާމް އެކެވެ.
މިހާތަނަށް ގިނަ ރަށް ތަކަކުން އަދި މާލެ އިން ވެސް ޙާލު ކިހިނެއް ޕްރޮގްރާމް ގެނެސް ދީފައިވާއިރު، ރައީސް މުޢިއްޒު އާއި މި ސަރުކާރަށް ފާޑު ކިޔައި ވާހަކަ ދައްކަމުން އަންނަ ރައްޔިތުންގެ އަަދަދު އިތުރުކަން ވެސް ފާހަގަ ކުރެވެ އެވެ.
