ފުދިއްޖެ-ފުނޑިއްޖެ ހިނގާލުން ކުރިއަށް ގެންދިއުމަށް ކުރި މަސައްކަތަށް ތައުރީފް ހައްގު، ނަމަވެސް އެ ހިނގާލުމާއި ޕެރޭޑަކާއި ތަފާތެއް ނެތް: ޔާމީން
މިހިނގާލުމުގައި އެމަނިކުފާނުގެ ގެކޮޅު ކައިރީގައި އެމްޑީޕީން ހަޅޭލެވި
ކުރީގެ ރައީސް އަބްދުﷲ ޔާމީން
ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)އިން ކުރިއަށް ގެންދިޔަ ފުދިއްޖެ-ފުނޑިއްޖެ ހިނގާލުން ކުރިއަށް ގެންދިއުމަށް ކުރި މަސައްކަތްތަކައް ތައުރީފް ހައްގު ކަމަށާއި، ނަމަވެސް އެ ހިނގާލުމާއި ޕެރޭޑަކާއި ތަފާތެއް ނެތް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
އާދިއްތަ ދުވަހުގެ ރޭ ކުރިއަށް ގެންދިޔަ ޕީއެންއެފް ޖަލްސާގެ އޯޑިއަންސްގައި އިންނަވައި ޔާމީން ވިދާޅުވީ މި ހިނގާލުމުގައި އެމަނިކުފާނުގެ ގެކޮޅު ކައިރީގައި އެމްޑީޕީން ހަޅޭލެވި ކަމަށާއި، އެނޫން ސަރަހައްދެއް ހަޅޭލުމަށް މަޑު ކުރަން ވެސް ނޭނގުނު ކަމަށެވެ.
ފުދިއްޖެ-ފުނޑިއްޖެ ހިނގާލުމަށް އިޝާރާތް ކުރައްވައި ޔާމީން ވިދާޅުވީ މި ހަރަކާތް ކުރިއަށް ގެންދިޔުމަށް އެމްޑީޕީން ބުރަ މަސައްކަތްތަކެއް ކުރި ކަމަށާއި، ގިނަ ރައްޔިތުންތަކެއް މި ހިނގާލުމަށް ނުކުތް ކަމަށެވެ. އަދި މި މަސައްކަތްތަކަށް ތައުރީފް ހައްގު ކަމަށް އެމަނިކުފާނު ވިދާޅުވިއެވެ. ނަމަވެސް މި ހިނގާލުމުން ސަރުކާރު ޕްރެޝަރަށް ނުދާ ކަމަށާއި، ނަތީޖާ ނުނެރެވޭ ކަމަށް ޔާމީން ވިދާޅުވިއެވެ. ޔާމީން ވިދާޅުވީ މި ހިނގާލުން ސިފަވެގެން ދިޔައީ ސިފައިން ކުރިއަށް ގެންދާ ބޭންޑް ނުވަތަ ޕެރޭޑެއް ގޮތަށް ކަމަށެވެ.
މީގެ އިތުރުން ޔާމީން ވިދާޅުވީ މި ހިނގާލުމުގައި ރައީސް ޑރ.މުހައްމަދު މުއިއްޒު ސަރުކާރުގެ ބޮޑެތި ފާޑުކިޔުންތައް އަމާޒުވާ ބޮޑެތި ވާހަކަތައް ގޮވާލަން ނުކެރުނު ކަމަށެވެ. އެގޮތުން މި ސަރުކާރުގެ ކޮރަޕްޝަނާއި، ނޫމަޑި މައްސަލާގެ ވާހަކަތައް ދައްކާލަން ނުކުރެވުނު ކަމަށް ޔާމީން ވިދާޅުވިއެވެ.
31 ޖެނުއަރީ 2025ވީ ހުކުރު ދުވަހު މާލޭގައި އެމްޑީޕީން ވަނީ ސުލްހަވެރި ހިނގާލުމެއް ކުރިއަށް ގެންގޮސްފައެވެ. މި ހިނގާލުމުގައި ގިނަ އަދަދެއްގެ އާއްމު ރައްޔިތުން ބައިވެރިވެ ސަރުކާރާ ދެކޮޅަށް އަޑު އުފުވާލާފައިވެއެވެ. އަދި ރައީސް މުއިއްޒުގެ އިސްތިއުފާއަށް ވަނީ ގޮވާލާފައެވެ.
