ޣައްޒާގެ ހަނގުރާމަ ހުއްޓުމަކަށް ގެނައުމުގެ އެއްވެސް ހަގީގީ ނިޔަތެއް އެމެރިކާގެ ނެތް ކަމަށް ހަމާސް އިސް މެމްބަރަކު ވިދާޅުވެއްޖެއެވެ.

ލުބުނާނުގައި ހަމާސް ތަމްސީލުކުރައްވާ އުސާމާ ހަމްދާން ހޮނިހިރު ދުވަހު ވިދާޅުވެފައިވަނީ އެމެރިކާއިން ހުށަހަޅާފައިވާ ހަނގުރާމަ ހުއްޓުވުމުގެ އައު ޕްރޮޕޯސަލް ގައި ޣައްޒާއިން އިޒްރޭލު ސިފައިން މުޅިން ފޭބުން ހިމެނިފައި ނުވާ ކަމަށެވެ.

ހަމްދާން ފާހަގަކުރެއްވި ގޮތުގައި ކުރިއަށްދާ ހަނގުރާމަ ހުއްޓުވުމުގެ މަޝްވަރާތަކުގައި މިނިވަން ކުރާނީ ފަލަސްޠީނުގެ ކޮންކޮން ޤައިދީންނެއް ކަމެއް ބަޔާންކޮށްފައި ނުވާއިރު، އެއްބަސްވުމުގައި ފަލަސްޠީނު ޤައިދީން މިނިވަންކުރާނެ ސާފު މިންގަނޑުތަކެއް ކަނޑައަޅަންޖެހޭނެ ކަމަށް ހަމާސް އިން ދެކޭ ކަމަށެވެ.

ހަމާސްގެ އިސް އޮފިޝަލް އިތުރަށް ވިދާޅުވެފައިވަނީ އެމެރިކާއިން މަސައްކަތް ކުރަމުންދަނީ ފަލަސްތީންގައި ޖަރީމާތައް ހިންގުމަށް އިތުރު ވަގުތު އިޒްރޭލަށް ދިނުމަށް ކަމަށެވެ. ނަން ހާމަނުކުރުމަށް ޝަރުތުކޮށް މިޞްރުގެ އޮފިޝަލަކު ހޮނިހިރު ދުވަހު ބުނެފައިވަނީ ޣައްޒާގައި ހަނގުރާމަ ހުއްޓުވުމާ ގުޅޭގޮތުން ހަމާސްއާއި އިޒްރޭލުގެ މަންދޫބުންގެ މެދުގައި ނުރަސްމީ މަޝްވަރާ ބައްދަލުވުމެއް ބުދަ ދުވަހު ޤާހިރާގައި އޮންނާނެ ކަމަށެވެ.

މި ފަރާތުން ބުނެފައިވާ ގޮތުގައި ބުދަ އަދި ބުރާސްފަތި ދުވަހު ބޭއްވުމަށް ހަމަޖެހިފައިވާ މަޝްވަރާތަކުގައި މެދުވެރިންގެ ގޮތުގައި ހަރަކާތްތެރިވާ މިޞްރު، ޤަޠަރު އަދި އެމެރިކާގެ މަންދޫބުންނާއި އިޒްރޭލުގެ ޓީމު ބައިވެރިވާނެއެވެ.

މިދިޔަ ހަފްތާގައި ބޭއްވުނު މަޝްވަރާތަކުގައި ބައިވެރިވި މިޞްރު، އެމެރިކާ އަދި އިޒްރޭލުގެ މަންދޫބުން ޤަޠަރުގެ ވެރިރަށް ދޯހާގައި މިހާރުވެސް ތިބި ކަމަށް ރިޕޯޓްތައް ބުނެއެވެ. މަންދޫބުން މިވަގުތު ކުރަމުންދާ މަސައްކަތަކީ ގާހިރާގައި ބޭއްވުމަށް ހަމަޖެހިފައިވާ މަޝްވަރާތައް ފެށުމުގެ ކުރިން ސުލްހައިގެ ޕްރޮޕޯސަލް ގައި ހިމެނޭ "ޓެކްނިކަލް ޕޮއިންޓް" ތަކަށް މަޝްވަރާ ކުރުން ކަމަށްވެސް ޚަބަރުތައް ބުނެއެވެ.

ދޯހާގައި ބޭއްވި ތިން ދުވަހުގެ މަޝްވަރާތަކަށް ފަހު ނެރުނު ގުޅިފައިވާ ބަޔާނެއްގައި މެދުވެރިންގެ ދައުރު އަދާ ކުރާ ތިން ގައުމުން ބުނެފައިވަނީ ހަމާސް އަދި އިޒްރޭލަށް ސުލްހައަށް ވާސިލް ވެވޭނެ "ފާލަމެއްގެ ގޮތުގައި ހުށަހެޅުމެއް" ހުށަހަޅާފައިވާ ކަމަށެވެ. މިއީ އ.ދ. ގެ ސަލާމަތީ މަޖިލީހުގެ ޤަރާރު ނަންބަރު 2735 އާ އެއްގޮތްވާ ގޮތުގެ މަތިން ހުށަހަޅާފައިވާ ހުށަހެޅުމެއް ކަމަށްވެސް ބުނެފައިވެއެވެ. މިޤަރާރުގައި ގައްޒާގައި ހިނގަމުންދާ ހަނގުރާމަ ވަގުތުން، ފުރިހަމަ އަށް ނިމުމަކަށް ގެނައުމަށް ގޮވާލާފައިވެއެވެ.

ޣައްޒާއަށް އިސްރާއީލުން ދެމުންދާ ލާއިންސާނީ ހަމަލާތަކުގައި މިހާތަނަށް 40،000 ށް ވުރެ ގިނަ ފަލަސްޠީނު މީހުން ޝަހީދުވެފައިވެއެވެ. މީގެ ތެރޭގައި ގިނައީ އަންހެނުންނާއި ކުޑަކުދިންނެވެ. އަދި އެތައް ހާސް މީހުން ޒަޚަމްވެފައިވެއެވެ. މީގެ އިތުރުން އެތައް ހާސް މީހުން ވަނީ ގެއްލިފައެވެ.