އިޒްރޭލުން އަނިޔާވެރި ޖަރީމާތައް ހިންގާ ސުލްހަ އަށް ނުރައްކާ ކުރަނީ އެމެރިކާ އާއި ހުޅަނގުގެ ގައުމުތަކުގެ ދެފުށް ދެގޮތް ކަމުން ކަމަށް އީރާނުގެ ރައީސް މަސްއޫދު ޕެޒެޝްކިއާން ވިދާޅުވެއްޖެއެވެ.
އާދިއްތަ ދުވަހު ޔޫރަޕިއަން ކައުންސިލްގެ ރައީސް ޗާލްސް މިޝެލްއާއެކު ފޯނުން ވާހަކަފުޅު ދައްކަވަމުން ޕެޒެޝްކިއާން ވިދާޅުވެފައިވަނީ އިސްރާއީލުގެ ސަރުކާރުން މިހާރު ސަރަހައްދީ އަދި ބައިނަލްއަޤްވާމީ ސުލްހައާއި ސަލާމަތަށް އިތުރު ނުރައްކާތަކެއް ކުރިމަތިކުރަމުން ގެންދާ ކަމަށެވެ.
ޕެޒެޝްކިއާން މި މޭރުމުން ވާހަކަފުޅު ދެއްކެވީ ޣައްޒާގައި ފަލަސްތީނުގެ ގެދޮރު ގެއްލިފައިވާ މީހުން ވަގުތީ ހިޔަލެއްގެ ގޮތުގައި ބޭނުން ކުރާ ސްކޫލަކަށް އިސްރާއީލް ސިފައިން ހޮނިހިރު ދުވަހު ދިން އަނިޔާވެރި ހަމަލާގައި 100 އަށްވުރެ ގިނަ އާންމު ރައްޔިތުން މަރުވި ހަދިސާ ދުނިޔޭގެ އެތައް ގައުމަކުން ކުށްވެރި ކޮށްފައިވާ ދަނޑިވަޅެއްގައެވެ.
ޣައްޒާގެ ސަރުކާރުގެ މީޑިއާ އޮފީހުން ބުނެފައިވަނީ ހޮނިހިރު ދުވަހުގެ ހެނދުނު އިސްރާއީލުގެ ބާރުތަކުން ޣައްޒާ ސިޓީގެ އަލް-ދަރާޖް ސަރަހައްދުގައި ހުރި އަލް-ތާބިއީން ސްކޫލަށް ދިން ބޮމުގެ ހަމަލާގައި 100 އަށްވުރެ ގިނަ ފަލަސްތީން މީހުން މަރުވެ އަދި އެތައް ބަޔަކަށް އަނިޔާވެފައިވާ ކަމަށެވެ.
ޣައްޒާގައި އެންމެ ފަހުން މި ހިނގި އަނިޔާވެރި ހަމަލާއަށް އިޝާރާތްކުރައްވަމުން، ޔޫރަޕިއަން ކައުންސިލްގެ ރައީސް ވިދާޅުވީ އިސްރާއީލުގެ ހަމަލާތައް ހުއްޓުވުމާއި، ހަނގުރާމަ ހުއްޓާލުމާއި، ޣައްޒާގެ ރައްޔިތުންނަށް އެހީ ފޯރުކޮށްދިނުމާއި، އަދި މިނިވަން ފަލަސްޠީނު ދައުލަތެއް ގާއިމް ކުރުމަށް ޔޫރަޕިއަން ކައުންސިލުން ތާއީދު ކުރާ ކަމަށެވެ.
