ނިމިދިޔަ ޔޫރޯ ފުޓްބޯޅަ މުބާރާތުގެ ރަންބޫޓު ހޯދި އެޓޭކިން މިޑްފީލްޑަރު ޑެނީ އޮލްމޯ ގަތުމަށް ބާސެލޯނާއިން ކުރާ މަސައްކަތުގައި އޭނާގެ މިހާރުގެ ކުލަބު ލައިޕްޒިގުން އެހީތެރިވާން ފަށައިފި އެވެ.

ސްޕޭނުގެ މީޑިއާ ރިޕޯޓްތައް ބުނާ ގޮތުން ލައިޕްޒިގުން ވަނީ ބާސެލޯނާ އަށް ބަދަލުވާން އޮލްމޯ ބޭނުންވާތީވެ، އޭނާގެ ރިލީޒް ކްލޯސް އަކީ 60 މިލިއަން ޔޫރޯ ކަމަށް ނިންމައިފަ އެވެ. މި ގޮތަށް ނިންމީ މި އަދަދަށް ބޮޑުކޮށް، ބޭނުން އަގެއް ކިއުމުގެ ބާރު ޖުލައި 20ގެ ފަހުން ކުލަބަށް ލިބިފައިވަނިކޮށެވެ.

ބާސެލޯނާއިން މިހާރު ވަނީ އޮލްމޯގެ އެޖެންޓާއެކު މަޝްވަރާތައް ފުރިހަމަކޮށް، އަނގަބަހުން ގިނަ ކަންތައްތަކަށް އެއްްބަސްވެފަ އެވެ. މި ގޮތުން އޭނާ އަށް ދޭން ނިންމާފައިވަނީ ހަ އަހަރުގެ ކޮންޓްރެކްޓެވެ. އަދި ފުރަތަމަ ދެ އަހަރު ދޭނީ ކުޑަ މުސާރައެކެވެ. އޭގެ ފަހުން އޮލްމޯގެ މުސާރައަށް ވަރަށް ބޮޑު ކުރިއެރުމެއް ގެންނާނެ އެވެ. އުމުރުން މިހާރު 26 އަހަރުގެ ކުޅުންތެރިޔާ މި ގޮތަށް އެއްބަސްވެ ބާސެލޯނާ އަށް ބަދަލުވާން ބޭނުންވަނީ އޭނާ އެންމެ ކުޅޭ ހިތްވާ ކުލަބަކީ އެއީ ކަމުގައިވާތީ އެވެ.

އޮލްމޯ 2014 ވަނަ އަހަރު ޑީނަމޯ ޒެގްރެބަށް ބަދަލުވީ ބާސެލޯނާގެ ޔޫތު އެކަޑަމީ ލަމާސިއާގައި އަށް އަހަރު ހޭދަކުރުމަށްފަހު އެވެ. އޭގެ ފަހުން ލައިޕްޒިކަށް ބަދަލުވެ އެކުލަބުގައި އޭނާ ދައްކަމުން އަންނަ ކުޅުމުގެ ސަބަބުން އިނގިރޭސިވިލާތުގެ މެންޗެސްޓާ ސިޓީން ވެސް އޭނާ ގަތުމަށް މަސައްކަތް ކުރި އެވެ. ނަމަވެސް ސިޓީ އާއި އެނޫން ވެސް ބޮޑެތި ކުލަބުތަކުގެ ހުށަހެޅުން އޭނާ ދޫކޮށްލީ ބާސެލޯނާއާއެކު ކުރެވެމުންދިޔަ މަޝްވަރާތަކުގެ ތެރެއިން އެކުލަބަށް ބަދަލުވުމުގެ ފުރުސަތު ލިބޭނެ ކަމުގެ އުއްމީދުގަ އެވެ.

އޮލްމޯގެ އިތުރުން އަންނަ ސީޒަނަށް ބާސެލޯނާއިން ގަންނަން ބޭނުންވާ އެންމެ މުހިންމު ކުޅުންތެރިއަކީ ސްޕޭނުގެ ގައުމީ ޓީމުގައި ޔޫރޯގައި މޮޅު ކުޅުމެއް ދެއްކި ނިކޯ ވިލިއަމްސް އެވެ. މި ވިޔަފާރީގެ ކަންކަން އަންނަ ހަފުތާގައި ނިންމުމަށް ބާސެލޯނާއިން އުއްމީދުކުރާއިރު ކުޅުންތެރިޔާއާއެކު މިހާރު ވަނީ އަނގަބަހުން ހުރިހާ ކަމަކަށް އެއްބަސްވެފަ އެވެ.

ކުޅުންތެރިން ގަތުމުގައި ބާސެލޯނާ އަށް މަޑުޖެހުން އައިސްފައިވަނީ މާލީ ދަތިތަކުގެ ސަބަބުން ސްޕެނިޝް ލީގުން އެކުލަބަށް ކުޅުންތެރިން ރަޖިސްޓަރީ ކުރުމުގެ ހުއްދަ ދިނުމުގައި ހުރި އުނދަގޫތައް ހައްލު ނުވާތީ އެވެ.