މުސްތަގުބަލާމެދު އޮލްމޯ ވަރަށް އަވަހަށް ގޮތެއް ނިންމާނެ

މުސްތަގުބަލާމެދު ވަރަށް އަވަހަށް ގޮތެއް ނިންމާނެކަމަށް، ޖަރުމަނުގެ އާރުބީ ލައިޕްޒިގަށް ކުޅެމުން އަންނަ ސްޕެއިންގެ ޒުވާން އެޓޭކިންގ މިޑްފީލްޑަރ ޑެނީ އޮލްމޯ ބުނެފިއެވެ.

އޮލްމޯ މިހެން ބުނީ އޭނާ ހޯދުމުގެ ޝައުގުވެރިކަން ޔޫރަޕުގެ ބައެއް ކުލަބުތަކުން ފާޅުކޮށްފައި ވަނިކޮށެވެ. އަނެއްކޮޅުން ލައިޕްޒިގުން ވަނީ އޭނާއަށް އައު އެއްބަސްވުމެއްވެސް ހުށަހަޅައިފައެވެ. ލައިޕްޒިގާއެކު އޭނާ ހަދާފައިވާ ހަތަރު އަހަރު ދުވަހުގެ އެއްބަސްވުން ހަމަވާނީ އަންނަ 2024 ވަނަ އަހަރުއެވެ. ޑައިނަމޯ ޒަގްރެބް ދޫކޮށް އޮލްމޯ ލައިޕްޒިގަށް ބަދަލުވީ 2020 ވަނަ އަހަރުއެވެ. އޭގެ ފަހުން އޮލްމޯ އަންނަނީ ލައިޕްޒިގުގައި މޮޅު ކުޅުމެއް ދައްކަމުންނެވެ.

އޮލްމޯ ބުނީ، އޭނާ މިހާރުވެސް އަންނަނީ ލައިޕްޒިގާއެކު މަޝްވަރާކުރަމުން ކަމަށާއި، ކުލަބުގެ ހުށަހެޅުމެއް އޭނާއަށް ލިބިފައިވާކަމަށެެވެ. އެހެންކަމުން ކުރިއަށް އޮތް ދުވަސްތަކުގެ ތެރޭގައި އެކަމުގައި އޭނާ ގޮތެއް ނިންމާނެކަމަށް އޮލްމޯ ވަނީ ބުނެފައެވެ. އޭނާ ބުނީ، ލައިޕްޒިގަކީ އޭނާ ވަރަށް ލޯބިވާ ކުލަބެއް ކަމަށާއި، ފާއިތުވި ތިން އަހަރުގެ ތެރޭގައި އެ ކުލަބުގައި އޭނާއަށް އެތައް ކަމެއް ކުރެވިފައިވާކަން އިހުސާސް ކުރެވޭ ކަމަށެވެ.

ލައިޕްޒިގުން އޮލްމޯ ބަހައްޓަން ބޭނުންވާތީ، މިދިޔަ މަހު އޭނާއަށް އައު އެއްބަސްވުމެއް ހުށަހެޅިކަމަށް ރިޕޯޓުތައް ބުނެއެވެ. އެކަމާމެދު މިހާރު ގޮތެެއް ނިންމުން އޮތީ އޮލްމޯގެ އަތްމަތީގައި ކަމަށްވެސް މީޑިއާތަކުގައި ވަނީ ބުނެފައެވެ. އޮލްމޯ ވަނީ މިހާތަނަށް ލައިޕްޒިގަށް ކުޅެދިން 120 މެޗުގައި 21 ލަނޑު ޖަހައިފައެވެ. އެ ޓީމާއެކު އޭނާ ވަނީ ޖަރުމަނު ކަޕް އެ ފަހަރު ކާމިޔާބުކޮށްފައެވެ.