މުޅި ދުނިޔެ އިންތިޒާރުކުރަމުންދާ ރެއާލް މެޑްރިޑާއި ބާސެލޯނާ މިރޭ ބައްދަލުކުރާ މެޗަށް ރެއާލް މެޑްރިޑުން ވަރަށް ބޮޑަށް ތައްޔާރުވެފައިވާ ކަމަށް ރެއާލްގެ ކޯޗު ޒައިނުއްދީން ޒިދާން ބުނެފި އެވެ.

މެންޗެސްޓާ ބަލިކޮށް ޔޫއެފާ ސުޕަކަޕްވެސް ރެއާލްއަށް ކާމިޔަބުކޮށްދިން ކޯޗު ޒިދާން ބުނީ ސްޕޭނުގެ އެންމެ ވަރުގަދަ ދެ ޓީމުގެ ކުރިމަތިލުން ކަމަށްވާ އެލްކްލެސިކޯ މެޗު ކުޅުމަކީ ކޮންމެ ކުޅުންތެރިއެއްވެސް ބޭނުންވާނޭ ކަމަށްކަމަށާއި އެގޮތުން ރެއާލްގެ ހުރިހާ ކުޅުންތެރިންވެސް ތިބީ މިރޭގެ މެޗަށް ކެއްމަދުވެފާކަމަށެވެ. އަދި މިރޭގެ މި މެޗަކީ ކޮންމެ ކުޅުންތެރިއަކު ވެސް އެންމެ މޮޅަށް ކުޅެން ބޭނުންވާ މެޗު ކަމަށާއި އެގޮތުން ކުޅުންތެރިން ތައްޔާރަށް ތިބިކަމަށް ޒިދާން ބުންޏެވެ.

ޒިދާން ބުނީ މެޗުގެ ޕްރެޝަރަށް އޭނާ އެއްވެސް ވަރަކަށް ނުވިސްނާ ކަމަށާއި އަދި މި މެޗުގް ޕްރެޝަރު އޭނާ ސިފަކުރަނީ އެހެން މެޗުތަކު ކުރިން ވެސް ކުރިމަތިވާ ޕްރެޝަރުފަދައިން ކަމަށެވެ.

މިރޭގެ މެޗާ ބެހޭ ގޮތުން އިތުރަށް ވާހަކަދައްކަމުން ޒިދާން ބުނީ އެންމެ ފަހުން ބާސެލޯނާއާ ދެކޮޅަސް ރެއާލް ކުޅުނު މެޗުން ބަލިވެފައިވީނަމަވެސް ޓީމާމެދު އެއްވެސް ޝަކުވާއެއްނެތް ކަމަށެވެ. އަދި ރެއާލް މެޑްރިޑު ދަނީ އަހަރަކަށްފަހު އަހަރެއް ކުރިއެރުން ހޯދަމުން ކަމަށެވެ.

މި ދެ ޓީމު މިރޭގެ މެޗަށް ނުކުންނައިރު ދެ ޓީމުގެ މެދުގައިވަނީ ވަރަށް ބޮޑު ވާދަވެރިކަމެއް އުފެދިފަ އެވެ.

ގިނަ ބަޔަކު ސިފަކުރާ ގޮތުގައި މިރޭގެ މި ކުރިމަތި ލުމަކީ ދުނިޔޭގައި މިހާރު ތިބި އެންމެ މޮޅު ދެ ފުޓްބޯޅަ ކުޅުންތެރިންކަމަށްވާ ކްރިސްޓިއާނޯ ރޮނާލްޑޯއާއި ލަޔޮނަލް މެސީގެ ކުރިމަތިލުމެކެވެ.

ސްޕޭނުގެ ބޮޑު ދެ ބާރު ކަމަށްވާ ޗެމްޕިއަން ރެއާލް މެޑްރިޑާއި ވާދަވެރި ބާސެލޯނާގެ ފުރަތަމަ ކުރިމަތިލުން މިރޭ ދަންވަރު ރާއްޖޭ ގަޑިން 1:00  ޖަހާއިރު ފެށިގެންދާއިރު މި މިމެޗް ކުޅުމަށް ހަމަޖެހިފައި ވަނީ ބާސެލޯނާގެ އަމިއްލަ ދަނޑުކަމަށްވާ ކޭމްޕްނޯގައެވެ.