ސްޕެނިޝް ލީގުގައި ރަޔޯ ވަޔެކާނޯއާ ދެކޮޅަށް ކުޅުނު މެޗުން ފަހު ވަގުތު ބާސެލޯނާ މޮޅުވެއްޖެ އެވެ.

ވަޔެކާނޯގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗު ބާސެލޯނާ އިން ކާމިޔާބު ކުރީ 2-1 އިންނެވެ. އެއީ މެޗުގައި ވަޔެކާނޯ އިން ލަނޑު ޖަހައި ލީޑު ނަގާފައި ވަނިކޮށް، ފަހަތުން އަރައި ދެ ލަނޑު ޖަހައިގެންނެވެ. ބާސެލޯނާ އިން ދެ ލަނޑު ވެސް ޖެހީ މެޗުގެ ފަހު ހާފުގަ އެވެ.

މެޗު ފަށައިގެން ނުވަ ވަނަ މިނެޓުގައި ވަޔެކާނޯ އިން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލީޑު ނަގައިދިނީ އުނާއީ ލޮޕޭޒް އެވެ. މެޗުގެ ނަތީޖާ ހަމަހަމަ ކުރުމަށް ބާސެލޯނާ އިން ކުރި މަސައްކަތް އެ ޓީމަށް ކާމިޔާބު ކުރެވުނީ މެޗުގެ 60 ވަނަ މިނެޓުގަ އެވެ. ބްރެޒިލްގެ ރަފީނިއާ ތަނަވަސްކޮށްދިން ފުރުސަތެއްގައި ބާސެލޯނާ އަށް އެ ލަނޑު ޖަހައިދިނީ ޕެޑްރީ އެވެ.

އޭގެ ފަހުން މެޗުން ބާސެލޯނާ މޮޅުވީ، މެޗުގެ ފަހު ދިހަ މިނެޓުގެ ތެރޭގައި ޖެހި ލަނޑުންނެވެ. އެ ލަނޑު ބާސެލޯނާ އަށް ޖަހައިދިނީ އައު ސީޒަނަށް އެ ޓީމުން ހޯދި ސްޕެއިންގެ ޑެނީ އޮލްމޯ އެވެ. މިއީ ބާސެލޯނާ އަށް ބަދަލުވީ ފަހުން އެ ޓީމަށް އޭނާ ކުޅެދިން ފުރަތަމަ މެޗެވެ. ރަޖިސްޓްރީ ނުވުމުގެ ސަބަބުން ކުރިން ކުޅުނު ދެ މެޗުގައި އޭނާ ނުކުޅެ އެވެ. އޮލްމޯ ލަނޑު ޖަހަން ފުރުސަތު ތަނަވަސްކޮށްދިނީ ޔަމީން ޔަމާލް އެވެ.

މިހާތަނަށް ކުޅުނު ތިން މެޗުން ވެސް ބާސެލޯނާ މޮޅުވެފައިވާއިރު، މިވަގުތު އެ ޓީމު އެއް ވަނައިގައި އޮތީ ނުވަ ޕޮއިންޓާއެކު އެވެ. ލީގުގައި ބާސެލޯނާގެ ހަތަރު ވަނަ މެޗުގައި އެ ޓީމު ނިކުންނާނީ ރެއާލް ވަލަޑޮލިޑާ ދެކޮޅަށެވެ.