އާ އެއްބަސްވުމުގައި ވަރަށް އަވަހަށް މެސީ ސޮއިކުރާނެ: ބާސެލޯނާ

ބާސެލޯނާ އަށް ކުޅެމުން އަންނަ އާޖެންޓީނާގެ ފޯވާޑް ލިއޮނެލް މެސީ އާ އެއްބަސްވުމުގައި ވަރަށް އަވަހަށް ސޮއިކުރާނެ ކަމަށް އެ ކްލަބުގެ ޓެކްނިކަލް ސެކެޓްރީ ރޮބާޓް ފެނާންޑޭޒް ބުނެފި އެވެ.

ނޫސްވެރިންނަށް މައުލޫމާތު ދެމުން ފެނާންޑޭޒް ބުނީ މެސީ ބާސާގައި 2021 ވަނަ އަހަރުގެ ނިޔަލަށް މަޑުކުރަން އެއްބަސްވެފައިވާ ކަމަށާއި، އެއްބަސްވުމުގައި ވަރަށް އަވަހަށް ސޮއިކުރާނެ ކަމަށެވެ.

ބާސާގެ މެނޭޖްމަންޓް ތެރޭގައި މައްސަލަތައް ޖެހިފައިވާ ކަމަށް ބުނެ ރިޕޯޓްތައް ފެތުރެމުން އަންނަ ދަނޑިވަޅެއްގައި ފެނާންޑޭޒް ބުނީ ސޮއި ނުކޮށް ލަސްކުރަނީ ރަނގަޅު ދަނޑިވަޅެއްގައި އެކަން ކުރުމަށް ކަމަށެވެ.

ހަނީމޫނަށް ފަހު އެނބުރި އައިސް ޓީމް ސްކޮޑާ ގުޅުމަށް ފަހު މެސީ އެއްބަސްވުމުގައި ސޮއިކުރާނެ ކަމަށް ސީޒަން ފެށުމުގެ ކުރިން ރިޕޯޓްތައް ބުނެފައި ވެއެވެ. އެހެން ނަމަވެސް އެކަން އެގޮތަށް ހިނގާފައެއް ނުވެއެވެ.

މެސީގެ އެއްބަސްވުމާ ގުޅިގެން ބާސާގެ ރައީސް ޖޯސެފް މާރިއޯ ބާޓަމައު ދާދި ފަހުން ވިދާޅުވީ، މެސީގެ އެއްބަސްވުމާ ގުޅިގެން ކްލަބާއި މެސީއާ ދެމެދު ހިޔާލުތަފާތުވުންތަކެއް ހުރި ނަމަވެސް އެކަން ވަރަށް ގާތުން ބަލަމުން އަންނަ ކަމަށާއި، އާ އެއްބަސްވުމުގެ ކަންތައް ވަރަށް އަވަހަށް ނިމޭނެ ކަމަށެވެ.

އެގޮތުން އޭނާ ވިދާޅުވީ މެސީގެ ބައްޕަ އާއި އެކު ގަވައިދުން ބައްދަލުވުންތަކެއް ބާއްވަމުން އައިސް ދެފަރާތުން ބޭނުންވާ ގޮތަށް އެއްބަސްވުން ނިންމާލެވޭނެ ކަމަށެވެ.

އުމުރުން 30 އަހަރުގެ މެސީ މިހާތަނަށް ބާސާގައި 13 ސީޒަން ހޭދަކޮށްފައި ވާއިރު، އޭނާ ވަނީ އެކުލަބަށް 508 ލަނޑު ކާމިޔާބު ކޮށްދީފައެވެ.