އިތުރު ތިން އަހަރު އާރްބީ ލައިޕްޒިގުގައި މަޑު ކުރުމަށް އެ ޓީމަށް ކުޅެމުން އަންނަ ސްޕެއިންގެ ޒުވާން އެޓޭކިން މިޑްފީލްޑަރ ޑެނީ އޮލްމޯ ނިންމައިފި އެވެ.

ޖަރުމަނުގެ މީޑިއާތަކުގައި ބުނެފައިވާ ގޮތުން އޮލްމޯ މިހާރު ވަނީ އެ ނިންމުން ނިންމައި، އައު އެއްބަސްވުމުގައި ސޮއި ވެސް ކޮށްފަ އެވެ. ކުރިއަށް އޮތް ދުވަސްތަކުގެ ތެރޭގައި ލައިޕްޒިގުން އެކަން ރަސްމީކޮށް އިއުލާން ކުރާނެ ކަމަށް ވެސް ވަނީ ބުނެފަ އެވެ. ލައިޕްޒިގާއެކު އޭނާ ހަދާފައިވާ އެއްބަސްވުމުގެ މުއްދަތު ހަމަވާން އޮތީ އަންނަ އަހަރު އެވެ. އޮމްލޯ ހޯދުމަށް ޔޫރަޕުގެ ގިނަ ކުލަބުތަކުން ޝައުޤުވެރިކަން ފާޅު ކުރަން ފެށުމުން، ލައިޕްޒިގުން ވަނީ އޭގެ ކުރިން އެއްބަސްވުން އައު ކުރުމަށް ހުށަހަޅައިފަ އެވެ. ލައިޕްޒިގާއެކު އޮލްމޯ ސޮއި ކުރި އައު އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ޖޫން މަހުގެ ނިޔަލަށް ކަމަށް މީޑިއާތަކުގައި ވަނީ ބުނެފަ އެވެ.

އައު އެއްބަސްވުމާއެކު އޮމްލޯގެ ރިލީސް ކްލޯސްގެ އަގު ބޮޑުވާނެ އެވެ. އެހެންކަމުން އޭނާގެ ރިލީސް ކްލޯސްގެ އަގު ގާތްގަނޑަކަށް 60 މިލިއަން ޔޫރޯ އަށް އަރާނެ ކަމަށް މީޑިއާތަކުން ވަނީ ލަފާކޮށްފަ އެވެ. ޑައިނަމޯ ޒަގްރެބް ދޫކޮށް އޮލްމޯ ލައިޕްޒިގަށް ބަދަލުވީ 2020 ވަނަ އަހަރު އެވެ. އެ ފަހަރު އޭނާ އެކުލަބާއެކު ސޮއި ކުރީ ހަތަރު އަހަރު ދުވަހުގެ އެއްބަސްވުމެއްގަ އެވެ.

އޮލްމޯ ވަނީ މިހާތަނަށް ލައިޕްޒިގަށް ކުޅެދިން 122 މެޗުގައި 21 ލަނޑު ޖަހައިފައެވެ. އެ ޓީމާއެކު އޭނާ ވަނީ ޖަރުމަނު ކަޕް އެ ފަހަރު ކާމިޔާބުކޮށްފައެވެ.