ބާސެލޯނާގެ ކޯޗަކަށް އެރްނެސްޓޯ ވަލްވަރޑޭ ހަމަޖައްސައިފި

ކުރިޔަށް އޮތް ސީޒަނަށް ބާސެލޯނާގެ ކޯޗަކަށް އެރްނެސްޓޯ ވަލްވަރޑޭ ހަމަޖައްސައިފި އެވެ.

އުމުރުން 53 އަހަރުގެ ވަލްވަރޑޭ ބާސާގެ ކޯޗުކަމާ ހަވާލުވީ، މިދިޔަ ހަފްތާގައި އެތުލެޓިކް ކްލަބްގެ ކޯޗުކަމުން އިސްތިއުފާ ދިނުމަށް ފަހު އެވެ. ވަލްވަރޑޭ ވަނީ އެތުލެޓިކްގައި ހަތަރު ސީޒަން ހޭދަކޮށްފައެވެ.

ދެ އަހަރު ދުވަހުގެ އެއްބަސްވުމެއްގެ ދަށުން ބާސާގެ ކޯޗުކަމާ ވަލްވަރޑޭ ހަވާލުވެފައިވާއިރު، މިއީ އޭނާ އަށް ކުރެވޭނެ ތަފާތު ތަޖުރިބާއެއް ކަމަށް ދެކޭ ކަމަށް ބާސާގެ ރައީސް މާރިއާ ބާޓެމިއޯ ވިދާޅުވި އެވެ.

ބާޓިމިއޯ ވިދާޅުވީ، ވަލްވަރޑޭގެ ގާބިލުކަމާ އޭނާގެ ތަޖުރިބާއާ މެދު އެއްވެސް ޝައްކެއް ނެތް ކަމަށާއި، އޭނާއަކީ ޒުވާން ކުޅުންތެރިންނަށް އިސްކަންދޭ މޮޅު ކޯޗެއް ކަމަށެވެ.

އެގޮތުން ބާޓިމިއޯ ވިދާޅުވީ، ވަލްވަރޑޭގެ ވިސްނުން ބާސާގެ ވިސްނުމާ ވަރަށް އެއްގޮތް ކަމަށާއި، އޭނާ ފަރިތަކުރުންތައް ވެސް ކުރިޔަށްގެންދަނީ ބާސާ އިން އާންމުގޮތެއްގައި ކުރިޔަށްގެންދާ ގޮތަށް ކަމަށެވެ.

ވަލްވަރޑޭ ކޯޗުކަމަށް ހަމަޖެއްސުމާ އެކު، ބާސާގެ ކޯޗެއް ގޮތުގައި ހުރި ލުއިސް އެންރީކޭ އެޓީމަށް އިރުޝާދު ދިން އެންމެ ފަހު މެޗަކަށްވެގެން ގޮސްފައިވަނީ ނިމިގެންދިޔަ ހޮނިހިރު ދުވަހުގެ ރޭ އޮތް ކޮޕާ ޑެލްރޭ ފައިނަލް މެޗަވެ. އެ މެޗު އަލަވޭސްއާ ވާދަކޮށް ބާސާ އިން 1-3 ގެ ނަތީޖާއަކުން މެޗު ކާމިޔާބުކޮށް މުބާރާތުގެ ތަށި ވަނީ އުފުލާލާފައެވެ.

ބާސާގެ ކުޅުންތެރިޔެއްގެ ގޮތުގައި ވެސް ހަރަކާތްތެރިވެފައިވާ އެންރީކޭ ވަނީ އެޓީމަށް އިރުޝާދުދިން ތިން އަހަރުގައި އެޓީމަށް ނުވަ ތަށި ކާމިޔާބުކޮށްދީފައެވެ.

މި ސީޒަނުގައި ބާސާ އަށް ސްޕެނިޝް ލީގު ގެއްލުނުއިރު، އެޓީމު ވަނީ ޔުއެފާ ޗެމްޕިއަންސް ލީގުގެ ކުއާޓާ ފައިނަލުން ވެސް ކަޓާފައެވެ. މި ސީޒަނުގައި ބާސާ އަށް ލިބުނު ހަމައެކަނި ތައްޓަކީ ކޮޕާ ޑެލްރޭ އެވެ.